Header Ads

ບໍລິສັດເອກະຊົນ ທຸ້ມເງິນ 5 ຕື້ໂດລາ ເພື່ອສ້າງ ສູນການຄ້າ ແລະ ການບໍລິການ



ບໍລິສັດ​ ອາຄະ​ເນ ​ພັດທະນາ​ລາວ ​ເອສອີ​ແຊັດ ຈໍາກັດ ​ໄດ້​ລົງທຶນ 5 ຕື້​ໂດ​ລາ​ສະຫະ ລັດ ​ເພື່ອສ້າງສູນການຄ້າ ແລະ ການບໍລິການຢູ່​ໂຊນ A,B,C ​ໃນເຂດເສດຖະກິດສະເພາະ ທ່າແຂກ ແຂວງຄຳມ່ວນ ​ສຳ​ປະທານໃນ​ເນື້ອ​ທີ່​ 7 ​ເຮັກຕາ, ມີ​ອາຍຸ​ສຳ​ປະທານ 73 ປີ ​ແລະ ຄາດວ່າຈະໃຫ້ສຳ ເລັດການກໍ່ສ້າງໃນ 5 ປີ, ຮັບ​ເໝົາ​ກໍ່ສ້າງ​ໂດຍ ບໍລິສັດ ABI ​ແລະ​ ບໍລິສັດ​ໂມ​ດູລາ ລົງທຶນ​ກໍ່​ສ້າງ ຂົນ​ສົ່ງ ​ແລະ ພັດທະນາ​ເຕັກ​ໂນ​ໂລ​ຊີ ຈີ​ເອສຊີ.

ບໍລິສັດອາຄະ​ເນ​ພັດທະນາ​ລາວ ​ເອສອີ​ແຊັດ ເປັນໜຶ່ງ​ໃນ​ບັນດາ 22 ​ບໍລິສັດ ທີ່​ໄດ້​ເຂົ້າມາລົງ​ທຶນ, ​​​ໂດຍ​ມີ​ຈຸດປະສົງ​ ເພື່ອ​ການ​ລົງທຶນ​ພັດທະນາ​ໃນ​ຕອນ​ດິນ​ດັ່ງກ່າວ,​​ ໃຫ້ກາຍ​ເປັນ​ເຂດ​ການ​ຄ້າ ​ແລະ ບໍລິການ,​ ສະຖາບັນການເງິນ, ອຸດສາຫະກຳການທ່ອງທ່ຽວ ລະດັບສາກົນ ຄົບວົງຈອນ.

ພິທີວາງສີລາລຶກໂຄງການກໍ່ສ້າງສູນການຄ້າ ແລະ ການບໍລິການ ໄດ້ຈັດ​ຂຶ້ນໃນວັນທີ 8 ຕຸລາ 2017, ຢູ່ເຂດເສດຖະກິດສະເພາະທ່າແຂກ ແຂວງ ຄຳມ່ວນ ເປັນກຽດເຂົ້າຮ່ວມພິທີ ໂດຍ ທ່ານ ດາວໄຫລ ແກ້ວດວງດີ ຫົວໜ້າພະແນກແຜນການ ແລະ ການລົງທຶນແຂວງ, ທ່ານ ແສງເພັດ ຄຳສຸກຖາວົງ ຮອງເຈົ້າເມືອງທ່າແຂກ, ທ່ານ ສົມຈິດ ອາລິຍາພອນ ປະທານບໍລິສັດອາຄະເນ ພັດທະນາລາວ, ມີບັນດາພະແນກການທີ່ກ່ຽວຂ້ອງ ແລະ ແຂກຖືກເຊີນເຂົ້າຮ່ວມ.

ກິດຈະກຳຂອງໂຄງການດັ່ງກ່າວ, ປະກອບ​ມີ ການກໍ່ສ້າງອາຄານ​ສະ​ຖາ​ບັນ​ການ​ເງິນໜຶ່ງຫລັງ, ສູງ 65 ຊັ້ນ, ​ໂຮງ​ແຮມ​ລະດັບ 4 ດາວ ສູງ 35 ຊັ້ນ,  5 ດາວສູງ 40 ຊັ້ນ, ອາຄານ - ອາພາດເມັ້ນ 2 ຫລັງ ສູງ 45 ຊັ້ນ, ອາຄານຫ້າງ​ຊັບ​ພະ​ສິນຄ້າ 1 ຫລັງ, ສູງ 5 ຊັ້ນ, ອາຄານກວດພະຍາດແບບຄົບວົງຈອນ 5 ຊັ້ນ 1 ຫລັງ. ນອກຈາກ​ນີ້​, ຍັງ​ມີສວນສາທາລະນະ ​ແລະ ​ໂຄງ​ສ້າງ​ອື່ນໆ.

ຂ່າວ: ມະນີ​ທອນ/ຂປລ

No comments

Powered by Blogger.