Header Ads

ສະຫລອງວັນສ້າງຕັ້ງສາຍພົວພັນການທູດ ລາວ -ມົງໂກລີ ຄົບຮອບ 55 ປີ ທີ່ວຽງຈັນ


ສະຖານທູດ​ມົງ​ໂກ​ລີ ປະຈຳ​ລາວ ຈັດງານ​ລ້ຽງສະເຫລີມສະຫລອງ ວັນ​ສ້າງ​ຕັ້ງ​ສາຍ​ພົວພັນ​ການ​ທູດ ລະຫວ່າງ ສປປ ລາວ ​ແລະ ມົງ​ໂກ​ລີ ຄົບຮອບ 55 ປີ (12/9/1962-12/9/2017), ຂຶ້ນໃນວັນທີ 07 ຕຸລາ 2017, ທີ່ ສວນວັດທະນະທຳແຫ່ງຊາດ, ນະຄອນຫລວງວຽງຈັນ.​ໂດຍ​ມີ​ທ່ານ ​ແສງ​ເພັດ ຮຸ່ງ​ບຸນ​ຍວງ ຮອງ​ລັດຖະມົນຕີ​ ກະຊວງ​ການ​ຕ່າງປະ​ເທດ​ ແຫ່ງ ສປປ ລາວ, ທ່ານ ລ໋ອດຕໍ​ດຳ​ບາ ກັດ​ບັດ​ລັກ (Lodoidamba GALBADRAKH) ​ເອກ​ອັກຄະ​ລັດຖະທູດ ​ແຫ່ງ ມົງ​ໂກ​ລີ ປະຈຳລາວ, ມີ​ບັນດາທູຕານຸທູດ ​ແລະ ຕາງໜ້າ​ອົງການ​ຈັດ​ຕັ້ງ​ສາກົນ, ພ້ອມ​ແຂກ​ຖືກ​ເຊີນ ເຂົ້າ​ຮ່ວມ.

​ໃນ​ໂອກາດ​ດັ່ງກ່າວ, ​ທ່ານ ແສງ​ເພັດ ຮຸ່ງ​ບຸນ​ຍວງ ຮອງ​ລັດຖະມົນຕີ ​ກະຊວງ​ການ​ຕ່າງປະ​ເທດ​ ໄດ້​ຫວນ​ຄືນ​ເຖິງຄວາມໝາຍ ແລະ ຄວາມສໍາຄັນຂອງການ​ພົວພັນ ​ທີ່​ມີ​ມູນ​ເຊື້ອອັນ​ດີ​ງາມ ລະຫວ່າງ ສອງ​ປະ​ເທດ ກໍຄື ປະຊາຊົນສອງຊາດ ລາວ ​ແລະ ມົງ​ໂກ​ລີ ທີ່ມີມາແຕ່ດົນນານ. ເຊິ່ງ​ໃນວັນທີ 12 ກັນຍາ 1962, ສອງ​ປະ​ເທດລາວ ​ແລະ ມົງ​ໂກ​ລີ ​ໄດ້​ເຊັນ​ສັນຍາ​ສ້າງ​ຕັ້ງ​ສາຍ​ພົວພັນ​ການ​ທູ​ດນຳ​ກັນ ​ອັນໄດ້ກາຍ ເປັນຂີດໝາຍອັນສຳຄັນ ທາງດ້ານປະຫວັດສາດແຫ່ງການພົວພັນ ລະຫວ່າງສອງປະເທດ ລາວ-ມົງໂກລີ, ມົງໂກລີ-ລາວ ແລະ ນັບແຕ່ນັ້ນເປັນຕົ້ນມາ ການພົວພັນລະຫວ່າງສອງປະເທດ ກໍໄດ້ຮັບການເສີມຂະຫຍາຍ ແລະ ຮັດແໜ້ນຍິ່ງໆຂຶ້ນ. ພ້ອມ​ນີ້​, ຍັງຕີ​ລາຄາ​ສູງຕໍ່​ການ​ຊ່ວຍ​ເຫລືອອັນ​ລ້ຳ​ຄ່າ​ ຂອງ​ລັດຖະບານ ມົງ​ໂກ​ລີ ​​ເປັນ​ຕົ້ນ​ ແມ່ນ​ທາງ​ດ້ານ​ສາທາ, ກະສິກຳ, ສຶກສາ ​ແລະ ອື່ນໆ.

​ໃນ​ປີ​ນີ້​, ສອງ​ປະ​​ເທດ​ ກຽມຈະ​ຈັດ​ກອງ​ປະຊຸມຄະນະ​ກຳມະການ ​ວ່າ​ດ້ວຍ​ການ​ຮ່ວມ​ມື​ລາວ-ມົງໂກລີ ຄັ້ງ​ທີ 11 ທີ່​ປະ​ເທດ​ມົງ​ໂກ​ລີ, ​ເຊິ່ງການ​ຮ່ວມ​ມື​ໃນ​ຂະ​ແໜງການ​ຕ່າງໆ ​ແມ່ນ​ໄດ້​ຮັບ​ການສະໜັບສະໜູນ ​ແລະ ຊ່ວຍ​ເຫລືອ​ເຊິ່ງກັນ ​ແລະ ກັນ ​ໃນ​ເວທີ​ພາກ​ພື້ນ ​ແລະ ສາກົນຕະຫລອດ​ມາ.




ພາບ ແລະ ຂ່າວ: ຂປລ

No comments

Powered by Blogger.