Header Ads

ອັດຕາເຂົ້າຮຽນຂອງເດັກຊັ້ນປະຖົມບັນລຸ 99% ຢູ່ແຂວງຫວງພະບາງ


ວັນ​ທີ 4 ຕຸລາ 2017 ນີ້, ພະ​ແນ​ກສຶກສາ​ທິການ ​ແລະ ກິລາ​ ແຂວງຫລວງພະ​ບາງ ​ໄດ້ຈັດ​ພິທີ​ຫວນ​ຄືນ​ມູນ​ເຊື້ອ​ ວັນ​ຄູ​ແຫ່ງ​ຊາດ 7 ຕຸລາຄອບ​ຮອບ 23 ປີ ​ໂດຍ​ເຂົ້າ​ຮ່ວມ​ຂອງ​ ທ່ານ ວົງ​ສະຫວັນ ​ເທບ​ພະຈັນ ຮອງ​ເຈົ້າ​ແຂວງຫລວງພະ​ບາງ, ທ່ານ ​ເອິງ ລໍ​ສະຫວັນ ຫົວໜ້າພະ​ແນ​ກສຶກສາ​ທິການ ​ແລະ ກິລາ​ແຂວງ.
ທ່ານ ​ເອິງລໍ​ ສະຫວັນ ຫົວໜ້າພະ​ແນ​ກສຶກສາ​ທິການ ​ແລະ ກິລາ​ ແຂວງຫລວງພະ​ບາງ ໄດ້ເລົ່າຄືນປະຫວັດຄວາມເປັນມາ​ ແລະ ມູນເຊື້ອແຫ່ງການກຳເນີດ ແລະ ເຕີບໃຫຍ່ຂອງວັນຄູແຫ່ງຊາດ ວັນທີ7 ຕຸລາ ພ້ອມສະແດງຄວາມຮູ້ບຸນຄຸນ ຕໍ່ບັນດາຄູ-ອາຈານ

ທີ່ໄດ້ຖ່າຍທອດວິຊາຄວາມຮູ້ ກ່ອນຈະມີວັນນີ້ກໍຍ້ອນ ມີຄູເປັນຜູ້ສິດສອນ​ ແລະ ຄູເປັນບຸກຄົນ ທີ່ມີຄວາມສຳຄັນທີສຸດຕໍ່ ການພັດທະນາເສດຖະກິດ-ສັງຄົມ ແລະ ປະເທດຊາດ. ສໍາລັບສະພາບ ການຈັດຕັ້ງປະຕິບັດ ຜົນການຮຽນ-ການສອນ ໃນໄລຍະ 1 ປີຜ່ານມາ ມີອັດຕາ​ເຂົ້າຮຽນຂອງ​ເດັກ 3-5 ປີບັນລຸ 59.33 %, ອັດຕາ​ເຂົ້າຮຽນສຸດ​ທິ ຊັ້ນ​ປະຖົມ​ບັນລຸ​ເກືອບ 99%, ອັດຕາ​ເຂົ້າຮຽນ ຊັ້ນ​ມັດທະຍົມ​ຕອນຕົ້ນ ບັນລຸ 90.70% ​ແລ​ະ ອັດຕາ​ເຂົ້າຮຽນຊັ້ນ​ມັດທະຍົມ​ຕອນ​ປາຍ ບັນລຸ 50.21%  ນອກ​ນີ້ ຍັງ​ສາມາດ​ສ້າງ​ໄດ້​ຕຳ​ແໜງ ຄູ​ຊຳນານ​ງານ 1 ຄົນ ​ແລະ ຕຳ​ແໜງຄູ​ວິຊາ​ການ 14 ຄົນ, ຍິງ 10 ຄົນ, ສົ່ງ​ນັກ​ຮຽນ​ເກັ່ງ​ ເຂົ້າ​ສອບ​ເສັງ​ລະດັບ​ຊາດ​ຍາດ​ ໄດ້​ທີ 1 ຊັ້ນ​ ມ7 ວິຊາ​ຄະນິດສາດ ​ແລະ ​ເຄມີ​ສາດ,  ທີ 3 ຊັ້ນມ4 ວິຊາ​ຟີ​ຊິກ​ສາດ, ໄດ້​ສົ່ງ​ນັກຮຽນ​ເຂົ້າຮຽນ ວິຊາ​ຊີບ​ຢູ່​ພາຍ​ໃນ ​ແລະ ຕ່າງ​ປະ​ເທດ, ສຳ​ເລັດ​ການ​ປະກາດ​ ຈົບ​ຊັ້ນ​ມັດທະຍົມ​ຕອນ​ຕົ້ນ​ບຳລຸງ​ໄດ້ 2 ​ເມືອງ​ຄື: ​ເມືອງ​ໂພນ​ໄຊ ​ແລະ ​ເມືອງ​ວຽງຄຳ. ພ້ອມ​ນີ້ ຍັງ​ໄດ້​ຊຸກຍູ້​ສົ່ງ​ເສີມ​ ຂະ​ບວນການດ້ານ​ກິລາ ​ແລະ ສິລະ​ປະ​ວັນນະຄະດີ ຂອງ​ແຂວງ ​ເຊິ່ງ​ໄດ້​ເຮັດ​ໃຫ້​ວຽກງານ​ດັ່ງກ່າວ​ ມີ​ຜົນສຳ​ເລັດ ​ແລະ ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ.

ຂ່າວ: ເພັດສາຄອນ ສິມມະວົງ/ ຂປລ

No comments

Powered by Blogger.