Header Ads

ລັດຖະມົນຕີກະຊວງການຕ່າງປະເທດ ຕ້ອນຮັບ ທູດເຢຍລະມົນ ຄົນໃໝ່ ປະຈຳ ລາວ



ໃນຕອນບ່າຍຂອງວັນທີ10 ຕຸລາ 2017, ທີ່ ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ເຢັນ ​ເປ​ເຕີ ລຸດ​ເຄນ​ເຮິ​ມ (Jens Peter Lutkenherm), ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສາທາລະນະລັດ ສະຫະພັນ ເຢຍລະມັນ ຄົນໃໝ່ ປະຈຳ ສປປ ລາວ.

ໃນໂອກາດດັ່ງກ່າວ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຍິນດີຕໍ່ທ່ານທູດ ທີ່​ໄດ້​ຖືກ​ແຕ່ງ​ຕັ້ງ​ໃຫ້​ມາ​ດຳລົງ​ຕຳ​ແໜ່ງເປັນ​ ເອກ​ອັກຄະ​ລັດຖະທູດ ແຫ່ງ ສສ. ​ເຢຍລະ​ມັນ ຄົນ​ໃໝ່ ປະຈຳ ສປປ ລາວ, ພ້ອມ​ທັງສະແດງຄວາມເຊື່ອໝັ້ນ​ວ່າ ທ່ານ​ທູດຈະ​ສືບຕໍ່​ເສີມ​ສ້າງ ​ແລະ ​ເພີ່ມ​ທະວີ​ການ​ພົວພັນ​ຮ່ວມ​ມື​ລະຫວ່າງ​ສອງ​ປະ​ເທດ ລາວ-​ເຢຍລະ​ມັນ ​ໃຫ້​ນັບ​ມື້​ຂະຫຍາຍຕົວ​ຍິ່ງໆຂຶ້ນ.

ໃນການໂອ້ລົມກັນຄັ້ງນີ້, ທັງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່​ດີ ລະຫວ່າງສອງປະເທດ ໃນ​ໄລຍະ​ຜ່ານ​ມາ, ພ້ອມທັງສະແດງຄວາມຊົມເຊີຍຕໍ່ ວັນສ້າງຕັ້ງສາຍພົວພັນການທູດ ລາວ-ເຢຍລະມັນ ທີ່ຈະວຽນມາ ຄົບຮອບ 60 ປີ ໃນປີ 2018 ທີ່ຈະມາເຖິງນີ້ (31/01/1958-31/01/2018), ຊຶ່ງສອງຝ່າຍເຫັນດີ ທີ່ຈະຮ່ວມກັນຈັດພິທີສະ​ເຫຼີມສະຫຼອງວັນສຳຄັນດັ່ງກ່າວ ຢ່າງເປັນຂະບວນຝົດຟື້ນ ແລະ ມີຄວາມໝາຍ.

ທ່ານລັດຖະມົນຕີ ໄດ້ຖືເອົາໂອກາດດັ່ງກ່າວ ສະ​ແດງ​ຄວາມ​ຂອບ​ໃຈຕໍ່ການຊ່ວຍເຫຼືອ ສປປ ລາວ ຂອງລັດຖະບານ ສສ. ເຢຍລະມັນ, ຊຶ່ງເປັນການປະກອບສ່ວນອັນສຳຄັນ ເຂົ້າໃນການສ້າງສາພັດທະນາໃນດ້ານຕ່າງໆ ຕາມແຜນພັດທະນາເສດຖະກິດ-ສັງຄົມຂອງ ສປປ ລາວ ເປັນຕົ້ນ​ແມ່ນ: ການພັດ​ທະ​ນາ​ຊົນ​ນະ​ບົດ, ວຽກງານອາຊີວະສຶກສາ, ການພັດທະນາ ເສດຖະກິດແບບຍືນຍົງ, ການພັດທະນາຊັບພະຍາກອນມະນຸດ,ການ ອະນຸລັກສິ່ງແວດລ້ອມ, ການກໍ່ສ້າງພຶ້ນຖານໂຄງລ່າງ ແລະ ການສົ່ງເສີມທຸລະກິດພາກເອກະຊົນ, ຊຶ່ງມາເຖິງປັດຈຸບັນ ເຢຍລະມັນໄດ້ໃຫ້ການຊ່ວຍເຫຼືອແກ່ ສປປ ລາວ ລວມມູນຄ່າປະມານ 377.1 ລ້ານເອີໂຣ, ໃນນັ້ນ ​ສົກປີ 2016-2017ແມ່ນມີມູນຄ່າ 45,8 ລ້ານ​ເອີ​ໂຣ. ໃນຕອນທ້າຍ, ທ່ານລັດຖະມົນຕີ ຍັງສະ​ເໜີ​ໃຫ້​ທ່ານ​ທູດ ຊ່ວຍ​ຊຸກຍູ້​ນັກລົງທຶນ​ ​ແລະ ເຊີນຊວນ​ນັກ​ທ່ອງທ່ຽວ​ເຢຍລະມັນ ໃຫ້​ມາ​ທ່ຽວລາວ ແລະ ​ລົງທຶນ​ຢູ່ລາວໃຫ້ຫຼາຍຂຶ້ນ ເພື່ອນຳຜົນປະໂຫຍດມາສູ່ປະຊາຊົນສອງຊາດ ລາວ-ເຢຍລະມັນ.

ໃນເວລາດຽວກັນ, ທ່ານທູດ ເຢັນ ​ເປ​ເຕີ ລຸດ​ເຄນ​ເຮິ​ມ ກໍໄດ້ສະແດງຄວາມຂອບໃຈເປັນຢ່າງສູງຕໍ່ ທ່ານ ສະເຫຼີມໄຊ ກົມມະສິດ, ທີ່ໄດ້ໃຫ້ການຕ້ອນຮັບອັນອົບອຸ່ນ ແລະ ໃຫ້​ຄຳໝັ້ນສັນຍາ​ວ່າ ​ໃນ​ໄລຍະ​ທີ່​ປະຕິບັດໜ້າທີ່​ການ​ທູດ​ ຢູ່ ສປປ ລາວ ຈະ​ພະຍາຍາມ​ສືບຕໍ່​ເສີມ​ສ້າງ ​ແລະ​ ເພີ່​ມທະວີ​ການພົວພັນ​ຮ່ວມ​ມືລະຫວ່າງ​ສອງ​ປະ​ເທດ ລາວ-​ເຢຍລະ​ມັນ ໃຫ້​ນັບ​ມື້​ນັບ​ຂະຫຍາຍຕົວ​​ຍິ່ງໆຂຶ້ນ.

ແຫຼ່ງຈ່າວ: ກະຊວງການຕ່າງປະເທດ

No comments

Powered by Blogger.