Header Ads

ແນວລາວສ້າງຊາດ ສ້າງຄວາມເຂົ້າໃຈກ່ຽວກັບການສ້າງຄອບຄົວ ແລະ ບ້ານສາມັກຄີປອງດອງ ທີ່ເຊກອງ




ແຂວງເຊກອງ : ຊຸດຝຶກອົບຮົມ ການສ້າງຄອບຄົວ ແລະ ບ້ານສາມັກຄີປອງດອງ ໄດ້ມີຂຶ້ນໃນຕອນເຊົ້າຂອງວັນທີ 18 ຕຸລາ 2017 ນີ້ ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການປົກຄອງແຂວງເຊກອງ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ຄໍາຫລ້າ ລີ້ງມະສອນ ຮອງປະທານສູນກາງແນວລາວສ້າງຊາດ (ສນຊ), ທ່ານ ຄໍາໄມ ດວງກັນຍາ ປະທານສູນກາງແນວລາວສ້າງຊາດແຂວງເຊກອງ, ມີບັນດາຮອງກົມ, ບັນດາອົງການຈັດຕັ້ງມະຫາຊົນອ້ອມຂ້າງແຂວງ ແລະ ພະນັກງານແນວລາວສ້າງຊາດ 4 ຕົວເມືອງເຂົ້າຮ່ວມ.



ທ່ານ ຄໍາຫລ້າ ລີ້ງມະສອນ ຮອງ ສນຊ ກ່າວວ່າ: ຈຸດປະສົງຂອງການເຕົ້າໂຮມຝຶກອົບອົບຮົມໃນຄັ້ງນີ້ກໍເພື່ອເປັນການສ້າງຄວາມເຂົ້າໃຈກ່ຽວກັບການສ້າງຄອບຄົວ ແລະ ສາມັກຄີປອງດອງ ໂດຍຕິດພັນກັບວຽກງານສາມສ້າງໃຫ້ແນວລາວສ້າງຊາດແຂວງ, ເມືອງ ແລະ ອົງການຈັດຕັ້ງມະຫາຊົນອ້ອມຂ້າງແຂວງເຊກອງໄດ້ຮັບຮູ້ເຂົ້າໃຈຢ່າງເປັນເອກະພາບກັນຕໍ່ກັບບັນດານິຕິກໍາ ແລະ ການຈັດຕັ້ງປະຕິບັດກ່ຽວກັບວຽກງານນີ້ໃຫ້ນັບມື້ໜັກແໜ້ນເຂັ້ມແຂງ.




ສໍາລັບອົງການແນວລາວສ້າງຊາດຍິ່ງແມ່ນຂົງເຂດການເມືອງ, ດັ່ງນັ້ນ ການສຶກສາອົບຮົມການເມືອງ-ແນວຄິດ ໂດຍສະເພາະການເຕົ້າໂຮມຄວາມສາມັກຄີຕາມພາລະບົດບາດ ຍິ່ງຕ້ອງໄດ້ເອົາໃຈໃສ່ ແລະ ຍົກສູງຄຸນນະພາບຂຶ້ນເລື້ອຍໆ ເພາະວ່າໂຄງການນີ້ມັນຕິດພັນກັບຍຸດທະສາດການພັດທະນາ ແລະ ການລົບລ້າງຄວາມທຸກຍາກຂອງປະເທດຊາດແຕ່ນີ້ຮອດປີ 2030, 2025 ແລະ 2020 ຂອງພັກເຮົາ. 


ທ່ານ ຮອງ ສນຊ ກ່າວຕື່ມອີກວ່າ: ຊຸດຝຶກອົບຮົມຄັ້ງນີ້ຈະໃຊ້ເວລາ 1 ວັນ ໂດຍບັນດານັກສໍາມະນາກອນ ແລະວິທະຍາກອນຈະໄດ້ມີການແລກປ່ຽນບົດຮຽນເຊິ່ງກັນ ແລະ ກັນ ໂດຍສະເພາະຕໍ່ນິຕິກໍາສອງສະບັບເປັນຕົ້ນ: ມາດຖານການສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບວຽກງານສາມສ້າງ; ຄໍາແນະນໍາໃນການຈັດຕັ້ງປະຕິບັດ ແລະພາລະບົດບາດ, ສິດ ແລະ ຫນ້າທີ່ຂອງແນວລາວສ້າງຊາດຂັ້ນທ້ອງຖິ່ນ.



ຂໍ້ມູນ: ນາລີວັນ/ແຂວງເຊກອງ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.