Header Ads

ຮອງນາຍົກລັດຖະມົນຕີເປັນປະທານ ໄຂກອງປະຊຸມຄະນະກຳມະການອະໄພຍະໂທດລະດັບຊາດ



ກອງປະຊຸມຄະນະກຳມະການ ອະໄພຍະໂທດລະດັບຊາດ ໄດ້ໄຂຂຶ້ນໃນຕອນເຊົ້າ ຂອງວັນທີ 23 ຕຸລາ 2017 ທີ່ໄອຍະການປະຊາຊົນສູງສຸດ, ໂດຍໃຫ້ກຽດເຂົ້າຮ່ວມເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ທັງເປັນປະທານຄະນະກຳມະການ ອະໄພຍະໂທດລະດັບຊາດ; ມີ ທ່ານ ຄຳສານ ສຸວົງ ປະທານສານປະຊາຊົນສູງສຸດ, ທັງເປັນຮອງປະທານ ຄະນະກຳມະການ ອະໄພຍະໂທດລະດັບຊາດ ພ້ອມດ້ວຍບັນດາທ່ານ ໃນຄະນະກຳມະການດັ່ງກ່າວ ເຂົ້າຮ່ວມ.



ໃນໂອກາດກ່າວເປີດ ກອງປະຊຸມ, ທ່ານຮອງນາຍົກລັດຖະມົນຕີ ໄດ້ກ່າວວ່າ: ກອງປະຊຸມຄັ້ງນີ້ ເປັນກອງປະຊຸມທີ່ສຳຄັນ ຊຶ່ງຈະໄດ້ພ້ອມກັນປຶກສາຫາລື ຄົ້ນຄວ້າພິຈາລະນາ ສອງບັນຫາສຳຄັນ ຄື: ຄົ້ນຄວ້າປະກອບຄຳເຫັນໃສ່ບາງເນື້ອໃນ ຂອງຮ່າງລັດຖະບັນຍັດ ຂອງປະທານປະເທດ ວ່າດ້ວຍການໃຫ້ອະໄພຍະໂທດ ໃຫ້ມີເນື້ອໃນຄົບຖ້ວນ, ຮັດກຸມ, ສອດຄ່ອງກັບ ສະພາບເງື່ອນໄຂຄວາມເປັນຈິງ ແລະ ອຸດົມສົມບູນຍິ່ງໆຂຶ້ນ; ແລະ ຮັບຟັງການລາຍງານ ສະພາບການຄົ້ນຄວ້າວຽກງານອະໄພຍະໂທດ ໃນປີ 2017 ເຊິ່ງໄດ້ຜ່ານການກວດກາ ຂອງພາກສ່ວນທີ່ກ່ຽວຂ້ອງ ທີ່ຮັບຜິດຊອບວຽກງານດັ່ງກ່າວ ໃຫ້ມີຄວາມຖືກຕ້ອງ, ຊັດເຈນ, ຍຸຕິທຳ ແລະ ໂປ່ງໃສ. ໃນຕອນທ້າຍ, ທ່ານປະທານກອງປະຊຸມ ໄດ້ຮຽກຮ້ອງໃຫ້ຜູ້ເຂົ້າຮ່ວມ ຈົ່ງຍົກສູງ​​ສະຕິຄວາມຮັບຜິດຊອບຂອງຕົນ ເຂົ້າໃນການຄົ້ນຄວ້າ ແລະ ກວດກາຄືນໃຫ້ລະອຽດ ເຖິງຄວາມຖືກຕ້ອງ ຕາມເງື່ອນໄຂທີ່ກຳນົດໄວ້, ໂດຍສະເພາະ ໃຫ້ຮັບປະກັນ “ຄົບຖ້ວນ, ຖືກຕ້ອງ, ຊັດເຈນ, ໂປ່ງໃສ ແລະ ທັນເວລາ”. ກອງປະຊຸມຄັ້ງນີ້, ຈະໄດ້ດຳເນີນໃນລະຫວ່າງວັນທີ 23-24 ຕຸລາ 2017.

ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ 
© ໂຕະນໍ້າຊາ | tonamcha.com    
___________

No comments

Powered by Blogger.