Header Ads

ລັດຖະມົນຕີ ກະຊວງແຜນການ ແລະ ການລົງທືນ ຕ້ອນຮັບ ທູດເຢຍລະມັນຄົນໃໝ່



​ໃນ​ວັນ​ທີ 27 ຕຸລາ 2017 ທີ່ກະຊວງ​​ແຜນການ ​ແລະ ການ​ລົງ​ທືນ ທ່ານ ສຸພັນ ​ແກ້ວ​ມີ​ໄຊ ລັດຖະມົນຕີ​ ກະຊວງ​​ແຜນການ ​ແລະ ການ​ລົງ​ທືນ ໄດ້​ຕ້ອນຮັບ​ ການ​ເຂົ້າ​ຢ້ຽມ​ຂໍ່ານັບ​ຂອງ​ ທ່ານ ​ເຢັນ ​ເປ​​ເຕີ ລຸດ​ເຄນ​ເຮິ​ມ (Jens Peter lutkenherm) ​ເອກ​ອັກຄະ​ລັດຖະທູດ​ ວິສາມັນ​ຜູ້​ມີ​ອໍານາດ​ເຕັມ ​ແຫ່ງ ສາທາລະນະ​ລັດ ສະຫະພັນ ​ເຢຍລະ​ມັນ ຄົນ​ໃໝ່​ ປະ​ຈໍາ ສປປ ລາວ.

​ໃນ​ໂອກາດ​ດັ່ງກ່າວ, ທ່ານ ສຸພັນ ​ແກ້ວ​ມີ​ໄຊ ​ໄດ້​ສະ​ແດງ ​ຄວາມ​ຍິນ​ດີ​ຕ້ອນຮັບ ຕໍ່​ທ່ານ​ທູດ ທີ່​ໄດ້​ຖືກ​ແຕ່ງ​ຕັ້ງ​ ໃຫ້​ມາ​ດໍາລົງ​ຕໍາ​ແໜ່​ງ​ ເປັນເອກ​ອັກຄະ​ລັດຖະທູດ​ ແຫ່ງ ສາທາລະນະ​ລັດ ສະຫະພັນ ​ເຢຍລະ​ມັນຄົນ​ໃໝ່​ ປະ​ຈໍາ ສປປ ລາວ, ພ້ອມ​ສະ​ແດງ​ ຄວາມ​ເຊື່ອ​ໝັ້ນ​ວ່າ ທ່ານ​ທູດ​ຈະ​ສືບ​ຕໍ່​ເສີມ​ສ້າງ ​ແລະ ​ເພີ່ມ​ທະວີ​ ການ​ພົວພັນ​ຮ່ວມ​ມື ​ລະຫວ່າງ​ ສອງ​ປະ​ເທດລາວ-​ເຢຍລະ​ມັນ ​ໃຫ້​ນັບ​ມື້​ຂະຫຍາຍຕົວ​ຍິ່ງໆ​ຂຶ້ນ. ພ້ອມ​ສະ​ແດງ​ຄວາມ​ຂອບ​ໃຈ​ ຕໍ່​ການ​ຊ່ວຍ​ເຫລືອ ສປປ ລາວ ຂອງ​ລັດຖະບານ ແຫ່ງ ສາທາລະນະ​ລັດ ສະຫະ ພັນ​ເຢຍລະ​ມັນ, ຊຶ່ງ​ເປັນ​ການ​ ປະກອບສ່ວນ​ອັນ​ສໍາຄັນ ​ເຂົ້າ​ໃນ​ການ​ສ້າງສາ​ພັດທະນາ​​ດ້ານ​ຕ່າງໆ ຕາມ​ແຜນ​ພັດທະນາ ​ເສດຖະກິດ​-ສັງຄົມ ຂອງສປປ ລາວ ​ເປັນ​ຕົ້ນ​ ການ​ພັດທະນາ​ຊົນນະບົດ, ວຽກ​ງານ​ອາຊີວະ​ສຶກສາ, ການ​ພັດທະນາ​ເສດຖະກິດ​ ແບບ​ຍືນ​ຍົງ, ການ​ພັດທະນາ​ຊັບພະຍາກອນ​ມະນຸດ, ການ​ອະນຸລັກ​ສິ່ງ​ແວດ​ລ້ອມ, ການ​ກໍ່ສ້າງ​ພື້ນຖານ​ໂຄງລ່າງ ​ແລະ ການ​ສົ່ງ​ເສີມ​ທຸລະກິດ​ພາກ​ເອກະ​ຊົນ, ຊຶ່ງມາ​ເຖິງ​ປັດຈຸບັນ ​ເຢຍລະ​ມັນ ​ໄດ້​ໃຫ້ການ​ຊ່ວຍ​ເຫລືອ​ແກ່ ສປປ ລາວ ລວມມູນ​ຄ່າ 377 ກວ່າລ້ານ​ເອີ​ໂຣ, ​ໃນ​ນັ້ນ ສົກ​ປີ 2016-2017 ​ມີ​ມູນ​ຄ່າ 45,8 ລ້ານ​ເອີ​ໂຣ. ​

ໃນ​ຕອນ​ທ້າຍ ທ່ານລັດຖະມົນຕີ ຍັງ​ສະ​ເໜີ​ໃຫ້​ທ່ານ​ທູດ ຊ່ວຍ​ຊຸກຍູ້​ນັກ​ລົງ​ທືນ ​ແລະ ​ເຊີນຊວນ​ນັກ​ທ່ອງ​ທ່ຽວ​ເຢຍລະ​ມັນ​ ໃຫ້​ມາ​ທ່ຽວ​ລາວ ​ແລະ ລົງ​ທືນຢູ່​ລາວ ​ໃຫ້​ຫລາຍ​ຂຶ້ນ ​ເພື່ອ​ນໍາ​ຜົນ​ປະ​ໂຫຍ​ດ ມາສູ່ປະຊາຊົນ​ສອງ​ຊາດ ລາວ-​ເຢຍລະ​ມັນ.

​ໃນ​ໂອກາດ​ດຽວ​ກັນ, ທ່ານທູດ​ ກໍ​ໄດ້​ສະ​ແດງ​ຄວາມ​ຂອບ​ໃຈ ​ເປັນ​ຢ່າງ​ສູງຕໍ່ ທ່ານລັດຖະມົນຕີ ທີ່​ໄດ້​ສະຫລະເວລາ ໃຫ້ການ​ຕ້ອນຮັບ​ອັນ​ອົບ​ອຸ່ນ ໃນຄັ້ງນີ້ ​ແລະ ​ໃຫ້​ຄໍາ​ໝັ້ນ​ສັນຍາ​ວ່າ ​ໃນ​ໄລຍະ​ທີ່ ປະຕິບັດ​ໜ້າ​ທີ່​ການ​ທູດ​ຢູ່ລາວ ຈະ​ພະຍາຍາມ​ສືບ​ຕໍ່ເສີມ​ສ້າງ ​ແລະ ​ເພີ່ມ​ທະວີ​ ການ​ພົວພັນ​ຮ່ວມ​ມື ລະຫວ່າງ ​ສອງ​ປະ​ເທດລາວ-​ເຢຍລະ​ມັນ ​ໃຫ້​ນັບ​ມື້​ຂະຫຍາ​ຍຕົວ​ຍິ່ງໆ​ຂຶ້ນ.

 ພາບ ແລະ ຂ່າວ: ວິ​ໄລ​ສັກ ພາບ : ​ສິດ/ ຂປລ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.