Header Ads

ເຈົ້າແຂວງຖະແຫຼງຂ່າວການຈັດປີທ່ອງທ່ຽວລາວ ປີ 2018 ທີ່ແຂວງຈໍາປາສັກ



ວັນທີ 16 ພະຈິກ 2017, ອໍານາດການປົກຄອງແຂວງຈໍາປາສັກ ໄດ້ຈັດພິທີຖະແຫຼງຂ່າວການຈັດປີທ່ອງທ່ຽວລາວ ປີ 2018 ທີ່ແຂວງຈໍາປາສັກ. ພິທີຖະແຫຼງຂ່າວຄັ້ງນີ້ ຈັດຂຶ້ນຢູ່ໂຮງແຮມຈໍາປາສັກແກຣນ ເມືອງປາກເຊ ໂດຍການເຂົ້າຮ່ວມຂອງທ່ານ ປອ.ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ, ທ່ານ ບົວລິນ ວົງພະຈັນ ຄະນະປະຈໍາພັກແຂວງ ຮອງເຈົ້າແຂວງໆຈໍາປາສັກ, ທ່ານ ບົວທອງ ສຸວັນນະສານ ກໍາມະການພັກແຂວງ ຫົວໜ້າພະແນກ ຖວທ ແຂວງ. ມີບັນດາທ່ານໃນຄະນະປະຈໍາພັກແຂວງ, ຕາງໜ້າກົງສູນໃຫຍ່ ແຫ່ງ ສສ ຫວຽດນາມ ປະຈໍາ 4 ແຂວງພາກໃຕ້ລາວ, ກົງສູນໃຫຍ່ແຫ່ງຣາຊະອານາຈັກກໍາປູເຈຍປະຈໍາ 5 ແຂວງພາກໃຕ້ລາວ , ການນໍາພະແນກການອ້ອມຂ້າງ, ການນໍາເມືອງ,ສື່ມວນຊົນພາຍໃນແຂວງ, ບັນດາຜູ້ຕາງໜ້າອົງການຈັດຕັ້ງສາກົນ, ຜູ້ປະກອບການ ແລະ ຫົວໜ່ວຍທຸລະກິດດ້ານການທ່ອງທ່ຽວເຂົ້າຮ່ວມ.





ໃນໂອກາດຖະແຫຼງຂ່າວ, ທ່ານ ປອ.ບຸນຖອງ ດີວິໄຊ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຈໍາປາສັກ ກ່າວວ່າ: ຄືດັ່ງທີ່ພວກເຮົາຮັບຮູ້ນໍາກັນແລ້ວວ່າ ການທ່ອງທ່ຽວ ເປັນຂະແໜງການເສດຖະກິດໜຶ່ງ ທີ່ມີການຂະຫຍາຍຕົວວ່ອງໄວ ແລະ ກວ້າງຂວາງ ຂອງແຕ່ລະປະເທດຢູ່ໃນໂລກ; ປັດຈຸບັນ ຫຼາຍປະເທດໃນທົ່ວໂລກ ໄດ້ເອົາໃຈໃສ່ເປັນພິເສດຕໍ່ການພັດທະນາ, ສົ່ງເສີມການທ່ອງທ່ຽວ ແລະ ຖືເປັນປາຍແຫຼມຂອງພັດທະນາເສດຖະກິດສັງຄົມຂອງປະເທດ; ທັງນີ້ ກໍຍ້ອນວ່າການທ່ອງທ່ຽວໄດ້ນຳເອົາເງິນຕາຕ່າງປະເທດເຂົ້າມາ, ຊຸກຍູ້ການລົງທຶນທຸລະກິດທີ່ກ່ຽວຂ້ອງທັງທາງກົງ ແລະ ທາງອ້ອມ ເຊັ່ນ: ທຸລະກິດການທ່ອງທ່ຽວ, ທຸລະກິດເຮືອນພັກໂຮງແຮມ, ທຸລະກິດຮ້ານອາຫານການກິນດື່ມ, ການຂົນສົ່ງ, ການຂາຍເຄື່ອງທີ່ລະນຶກ ແລະ ອື່ນໆຢ່າງຫຼວງຫຼາຍ; ຈາກນັ້ນ ຍັງພົວພັນກັບການລົງທຶນກໍ່ສ້າງພື້ນຖານໂຄງລ່າງຖະໜົນຫົນທາງ, ສະໜາມບິນ, ທ່າເຮືອທ່າກໍາປັ່ນ, ລະບົບໂທລະຄົມມະນາຄົມ, ໄຟຟ້າ, ນໍ້າປະປາ ລວມທັງການສ້າງວຽກເຮັດງານທຳໃຫ້ແກ່ປະຊາຊົນໃນຂະແໜງການບໍລິການ ແລະ ການຜະລິດເປັນຕົ້ນແມ່ນການຜະລິດກະສີກຳ ແລະ ຫັດຖະກຳ ເພື່ອສົ່ງອອກກັບທີ່ ຈິ່ງພາໃຫ້ມີການສະສົມເງິນຕາ ແລະ ມີການໝູນວຽນເງິນຕາພາຍໃນປະເທດໄດ້ເປັນຢ່າງດີ ແລະ ກະຈາຍລາຍໄດ້ສູ່ທ້ອງຖິ່ນຊົນນະບົດເຂດຫ່າງໄກສອກຫຼີກ ເພື່ອປະກອບສ່ວນບັນລຸສະຫັດສະວັດດ້ານການພັດທະນາ ທີ່ອົງການສະຫະປະຊາຊາດໄດ້ກຳນົດໄວ້.






ທ່ານ ປອ.ບຸນຖອງ ດີວິໄຊ ກ່າວຕື່ມວ່າ: ຍ້ອນເຫັນໄດ້ທ່າແຮງ ແລະ ຄວາມອາດສາມາດບົ່ມຊ້ອນດ້ານການທ່ອງທ່ຽວ, ອຳນາດການປົກຄອງແຂວງຈຳປາສັກພວກເຮົາ ໄດ້ເອົາໃຈໃສ່ພັດທະນາ ແລະ ສົ່ງເສີມການທ່ອງທ່ຽວຢ່າງຕັ້ງໜ້າ ເຮັດໃຫ້ມີນັກທ່ອງທ່ຽວເຂົ້າມາທ່ຽວຊົມແຂວງຈຳປາສັກເພີ່ມຂຶ້ນໃນແຕ່ລະໄລຍະ; ປີ 2011 ມີນັກທ່ອງທ່ຽວເຂົ້າມາ 393.921 ຄົນ ສ້າງລາຍຮັບໄດ້ 30.657.330 ໂດລາສະຫະລັດ; ມາຮອດປີ 2016 ມີນັກທ່ອງທ່ຽວເຂົ້າມາແຂວງຈໍາປາສັກເພີ່ມຂຶ້ນເປັນ 621.870 ຄົນ (ເກືອບສອງເທົ່າຕົວ) ເຊິ່ງສ້າງລາຍຮັບໄດ້ 65.866.200 ໂດລາສະຫະລັດ ແລະ ຄາດຄະເນຮອດປີ 2020 ຈະມີນັກທ່ອງທ່ຽວເຂົ້າມາແຂວງຈໍາປາສັກ ເຖິງ 1.213.667 ຄົນ ແລະ ຈະມີລາຍຮັບປະມານ 228.167.780ໂດລາສະຫະລັດ.



ທ່ານ ປອ.ບຸນຖອງ ກ່າວຕໍ່ວ່າ: ສປປ ລາວ, ໄດ້ເປີດປີທ່ອງທ່ຽວມາແລ້ວ 2 ຄັ້ງ, ຄັ້ງທີ 1 ເປີດໃນປີ 1999-2000, ຄັ້ງທີ 2 ເປີດປີ 2011-2012 ແລະ ຄັ້ງທີ 3 ຈະເປີດຂຶ້ນໃນ ປີ 2018, ທັງນີ້ ກໍເພື່ອເປັນການໂຄສະນາ, ສົ່ງເສີມ ແລະ ດຶງດູດນັກທ່ອງທ່ຽວຈາກທຸກສາລະທິດມາສໍາພັດ, ຮັບຮູ້ ສປປ ລາວຫຼາຍຂຶ້ນ.ສໍາລັບງານສະເຫຼີມສະຫຼອງເປີດປີທ່ອງທ່ຽວ 2018 ຢູ່ແຂວງຈໍາປາສັກນີ້, ພວກເຮົາຈະໄດ້ເປີດຂຶ້ນ ໃນວັນທີ 29 ມັງກອນ 2018 ພ້ອມກັບພິທີເປີດງານບຸນນະມັດສະການຜາສາດຫີນວັດພູ ມໍລະດົກໂລກແຫ່ງທີ 2 ຂອງ ສປປ ລາວ, ອະຣິຍະທໍາໃນສະຕະວັດທີ V, ທ່ຽວຊົມໂຮງທ້າວ-ໂຮງນາງ, ໂຮງງົວນັນທິນ, ໂຮງນາງສີດາ, ໂຮງທ້າວເຕົ່າ, ຮູບຍິງນອນຫງາຍຊາຍນອນຂວໍ້າ, ຮອຍຕີນພະບາດ, ຮູບປັ້ນພະຍາກົມມະທາ ແລະ ກຸ່ມພື້ນທີ່ມໍລະດົກໂລກທັງໝົດ 390 ຕາຕະລາງກິໂລແມັດ; ໃນມື້ເປີດ ພວກເຮົາຈະຈັດງານຢ່າງອະລັງການ ເຊີນບັນດາແຂກທັງພາຍໃນ ແລະ ຕ່າງປະເທດເຂົ້າຮ່ວມຫຼາຍຄະນະ ທັງເປັນການໂຄສະນາດຶງດູດນັກທ່ອງທ່ຽວໃຫ້ເຂົ້າມາທ່ຽວ ແລະ ຮັບຮູ້ແຂວງຈໍາປາສັກຫຼາຍຂຶ້ນ ເພື່ອສຳຜັດກັບບັນຍາກາດເທສະການທາງຮີດຄອງປະເພນີ ແລະ ວັດທະນະທຳອັນດີງາມ ທີ່ມີມາແຕ່ບູຮານນະການ ໃຫ້ຊາວໂລກຮັບຮູ້ຢ່າງກວ້າງຂວາງ.





ສໍາລັບດ້ານສິ່ງຮອງຮັບໃຫ້ແກ່ການທ່ອງທ່ຽວ ປີ 2018 ນີ້, ທ່ານ ປອ.ບຸນຖອງ ກ່າວວ່າ: ແຂວງຈໍາປາສັກຂອງພວກຂ້າພະເຈົ້າ ມີແຫຼ່ງທ່ອງທ່ຽວທັງໝົດ 216 ແຫ່ງ, ໃນນັ້ນ ແຫຼ່ງທ່ອງທ່ຽວທໍາມະຊາດ 116 ແຫ່ງ, ປະຫວັດສາດ 40 ແຫ່ງ ແລະ ແຫຼ່ງທ່ອງທ່ຽວດ້ານວັດທະນະທໍາ60 ແຫ່ງ.ສະຖານທີ່ພັກພາອາໄສ ມີໂຮງແຮມ 66 ແຫ່ງ, ຣີສອດ 8 ແຫ່ງ, ເຮືອນພັກ 162 ແຫ່ງ ສາມາດຮັບຮອງແຂກໄດ້ປະມານ 4.783 ຄົນຕໍ່ຄືນ; ໂຮງແຮມ 4 ດາວ 2 ແຫ່ງ, ໂຮງແຮມ 3 ດາວ 5 ແຫ່ງ, ໂຮງແຮມ 2 ດາວ 1 ແຫ່ງ, ຣີສອດ 4 ດາວ 1 ແຫ່ງ, ເຮືອນພັກ 2 ດອກຈໍາປາ 1 ແຫ່ງ, ໂຮງແຮມສີຂຽວອາຊຽນ 10 ແຫ່ງ, ໂຮມສະເຕອາຊຽນ 2 ແຫ່ງ (ຢູ່ບ້ານດອນໂຄເມືອງຊະນະສົມບູນ ແລະ ດອນແດງ ເມືອງປະທຸມພອນ); ມີບ້ານທ່ອງທ່ຽວແບບປະຊາຊົນມີສ່ວນຮ່ວມທີ່ໄດ້ມາດຕະຖານອາຊຽນ(ບ້ານ CBT) ບ້ານໜອງຫຼວງ, ເມືອງປາກຊ່ອງ.ມີຮ້ານອາຫານ 44 ແຫ່ງ ແລະ ສາມາດຮັບແຂກໄດ້ປະມານ 3.662 ຄົນຕໍ່ມື້.ບໍລິສັດທ່ອງທ່ຽວທັງໝົດ 37 ຫົວໜ່ວຍ, ໃນນັ້ນບໍລິສັດແມ່ 30 ຫົວໜ່ວຍ, ສາຂາ 7 ຫົວໜ່ວຍ. ມີລົດບໍລິການຂົນສົ່ງນັກທ່ອງທ່ຽວ 119 ຄັນ. ມີພະນັກງານນໍາທ່ຽວລະດັບຊາດ 206 ທ່ານ, ລະດັບແຂວງ 26 ທ່ານ, ສະເພາະ ນຳທ່ຽວມໍລະດົກ 20 ທ່ານ.





ສ່ວນກິດຈະກໍາປີທ່ອງທ່ຽວລາວ 2018 ຢູ່ແຂວງຈໍາປາສັກ ນັ້ນ, ທ່ານເຈົ້າແຂວງ ໃຫ້ຮູ້ວ່າ: ນອກຈາກງານບຸນນະມັດສະການຜາສາດຫີນວັດພູ ກໍ່ຄືພາຍຫຼັງກິນເຂົ້າຫຼາມບັ້ງໃຫຍ່ ຕົ້ມໄກ່ໃສ່ມົດແດງສໍາເລັດແລ້ວ, ມີທ່ຽວຊົມທາດສາມປາງ ເມືອງສຸຂຸມາ, ທາດນາງອີງ ເມືອງມຸນລະປາໂມກ, ຊົມອຸມົງ ບ້ານໂຕະໂໝະທ່າ, ຂຶ້ນຊົມທໍາມະຊາດເທິງພູອາສາ ວາດສາຍຕາເບິ່ງບຶງກຽດໂງ້ງ, ທ່ຽວຊົມທໍາມະຊາດປ່າສະຫງວນແຫ່ງຊາດເຊປຽນ, ເຂົ້າພັກແຮມໂຮມສະເຕ ລະດັບອາຊຽນ ບ້ານຫົວດອນແດງເມືອງປະທຸມພອນ. ຈາກນັ້ນ, ກໍ່ເລາະລົງໃຕ້ທ່ຽວຊົມນ້ຳຕົກຕາດຄອນພະເພັງ ໄຂ່ມຸກແຫ່ງນໍ້າຂອງ, ນະມັດສະການກາບໄຫວ້ຂໍພອນຈາກຕົ້ນໄມ້ສັກສິດມະນີໂຄດ, ຂີ່ເຮືອເລາະທ່ຽວເກາະດອນ, ເບິ່ງປາໂລມານໍ້າຈືດ, ທ່ຽວຊົມແກ້ງຫຼີ່ຜີ(ສົມພະມິດ), ເບິ່ງຮ່ອງຮອຍປະຫວັດສາດທ່າກໍາປັ່ນ ແລະ ຂົວຂວ້າມນໍ້າຂອງແຫ່ງທໍາອິດຂອງລາວ(ບ້ານດອນເດດ-ດອນຄອນ).ຂຶ້ນເມືອສໍາພັດກັບອາກາດແດນໜາວ, ເບິ່ງທໍາມະຊາດປາກພູໄຟ, ດ່ານສິນໄຊ, ພູເທວະດາ, ທ່ຽວຕາດ 7 ຊັ້ນ, ຕາດຕະເຍິກເສືອ, ຕາດເຍືອງທີ່ສວຍງາມ, ຂີ່ສະລິງຊົມວິວດື່ມກາເຟເຫີນເວຫາ ທີ່ຕາດຟານ, ຕາດອີ່ຕູ້, ຕາດຈໍາປີ; ທ່ຽວເບິ່ງສວນກາເຟ, ສວນຊາ, ສວນດອກໄມ້, ທ່ຽວພະຈົນໄພປີນຜາ, ຊົມເຮືອນເທິງຕົ້ນໄມ້ ຢູ່ເຂດບ້ານໜອງຫຼວງ. ກັບລົງມາແວ່ຊົມນໍ້າຕົກຕາດຜາສ້ວມ, ເທສະການໝາກໄມ້ສົດ, ເລາະທ່ຽວຊົມສູນລວມເສດຖະກິດທີ່ເມືອງປາກເຊ, ຂຶ້ນທ່ຽວສໍາພັດທໍາມະຊາດພູສ່າເຫຼົ້າ, ກົ້ມກາບໄຫວ້ພະໃຫຍ່ເທິງພູ, ບາສີສູ່ຂວັນຫົດສົງອວຍພອນປີໃໝ່ລາວ, ຊົມຫັດຖະກໍາສີມືຕໍ່າແຜ່ນ ແລະ ຫຼາຍໆກິດຈະກໍາ ທີ່ເປັນວັດທະນະທໍາອັນດີງາມ ສືບທອດກັນມາແຕ່ບູຮານນະການ.


ທ່ານ ເຈົ້າແຂວງ ກ່າວຕອນທ້າຍອີກວ່າ: ອັນນີ້, ເປັນພຽງບາງກິດຈະກໍາ ທີ່ຂ້າພະເຈົ້າຍົກຂຶ້ນໃຫ້ເຫັນໃນເບື້ອງຕົ້ນເທົ່ານັ້ນ, ສ່ວນອັນລະອຽດນັ້ນ ຍັງຈະໄດ້ພິມເປັນແຜ່ນພັບ, ໂຄສະນາຜ່ານສື່ຕ່າງໆ ທັງສື່ພາຍໃນ ແລະ ຕ່າງປະເທດ ໃຫ້ກວ້າງຂວາງຕື່ມອີກ, ພິເສດ ແຂວງຈໍາປາສັກ ໄດ້ສົມທົບກັບບໍລິສັດລາວມີເດຍ ເພື່ອສ້າງສາລະຄະດີແຜນພັດທະນາເສດຖະກິດ-ສັງຄົມ ແລະ ການທ່ອງທ່ຽວຂອງແຂວງ. 



ຍ້ອນແນວນັ້ນ ໃນນາມອໍານາດການປົກຄອງແຂວງ, ຂ້າພະເຈົ້າ ມີຄວາມເຊື່ອໝັ້ນສູງ ດ້ວຍຄວາມຮ່ວມມື, ຮ່ວມແຮງຮ່ວມໃຈ, ການປະກອບສ່ວນຈາກພາກລັດ ແລະ ຫົວໜ່ວຍທຸລະກິດ, ຜູ້ປະກອບການ ຕະຫຼອດຮອດພໍ່ແມ່ປະຊາຊົນບັນດາເຜົ່າ ໃນທົ່ວແຂວງຈໍາປາສັກ ຈະຮ່ວມມືຮ່ວມໃຈ ພ້ອມກັນ ຮ່ວມເປັນເຈົ້າພາບທີ່ດີ ໃຫ້ແກ່ການຈັດງານປີທ່ອງທ່ຽວລາວ 2018 ທີ່ແຂວງຈໍາປາສັກ ໃຫ້ບັນລຸຜົນສໍາເລັດຕາມລະດັບຄາດໝາຍທີ່ວາງໄວ້. 





ຂໍ້ມູນ:ຂ່າວ-ພາບ: ທູນທອງໃຈ 

© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.