Header Ads

ລັດຖະມົນຕີ ກະຊວງການຕ່າງປະເທດ ຕ້ອນຮັບຄະນະຜູ້ແທນ ລັດຖະສະພາເອີຣົບ



ໃນ​ວັນ​ທີ 1 ພະຈິກ 2017 ທີ່ ກະ​ຊວງ​ການ​ຕ່າງ​ປະ​ເທດ, ທ່ານ ສະ​ເຫລີມ​ໄຊ ກົມ​ມະ​ສິດ ລັດ​ຖະ​ມົນ​ຕີ ​​ກະ​ຊວງ​ການ​ຕ່າງ​ປະ​ເທດ ​ແຫ່ງ ສປປ ລາວ ໄດ້​ຕ້ອນ​ຮັບ​ ການ​ເຂົ້າ​ຢ້ຽມ​ຂໍ່ານັບ ຂອງຄະນະຜູ້​ແທນ ລັດຖະສະພາເອີຣົບ, ນຳໂດຍທ່ານ Werner Josef LANGEN, ກຳມາທິການເສດຖະກິດ ແລະ ການເງິນ, ລັດຖະສະພາ​ເອີຣົບ, ທີ່​ເດີນ​ທາງ​ມາ​ຢ້ຽມ​ຢາມ ແລະ ເຮັດ​ວຽກ​ຢູ່ ສ​ປ​ປ ລາວ ໃນ​ລະ​ຫວ່າງວັນ​ທີ 1-2 ພະຈິກ 2017, ເພື່ອຕິດຕາມ ​ແລະ ​ປະ​ເມີນ​ຜົນ​ການ​ນຳ​ໃຊ້​ເງິນ​ ຊ່ວຍ​ເຫລືອ​ເພື່ອ​ການ​ພັດ​ທະ​ນາ​ ທີ່​ສະ​ຫະ​ພາບ​ເອີ​ຣົບ​ ​ໄດ້ສະ​ໜອງ​ໃຫ້​ແກ່ ສ​ປ​ປ ລາວ ​ໃນ​ໄລຍະ​​ຜ່ານ​ມາ.

ໃນ​ໂອ​ກາດ​ດັ່ງ​ກ່າວ, ທ່ານ ສະ​ເຫລີມ​ໄຊ ກົມ​ມະ​ສິດ ໄດ້​ສະ​ແດງ ​ຄວາມ​ຍິນ​ດີ​ຕ້ອນຮັບ​ ຄະນະຜູ້​ແທນຢ່າງອົບ​ອຸ່ນ ແລະ ຕີ​ລາ​ຄາ​ສູງ ​ຕໍ່ການ​ພົ​ວ​ພັນ ​ຮ່ວມ​ມືສອງ​ຝ່າຍ, ​ພ້ອມ​ທັງຂອບ​ໃຈ​ຢ່າງ​ສູງ​ ຕໍ່​​ການ​ສະ​ໜັບ​ສະ​ໜຸນຊ່ວຍ​ເຫລືອ ​ຂອງ​ປະ​ຊາ​ຊົນ ແລະ ລັດ​ຖະ​ບານສະ​ຫະ​ພາບເອີ​ຣົບ ເຂົ້າ​ໃນ​ການ​ພັດ​ທະ​ນາ​ ເສດ​ຖະ​ກິດ-ສັງ​ຄົມ ຂອງ ສ​ປ​ປ​ ລາວ ໃນ​ໄລ​ຍະ​ຜ່ານ​ມາ, ຖື​ເປັນການ​ປະ​ກອບ​ສ່ວນ​ອັນ​ສຳຄັນ​ ເຮັດ​ໃຫ້ສປປ ລາວ ມີ​ຜົນສຳ​ເລັດ​ ໃນ​ການຈັດ​ຕັ້ງ​ປະຕິບັດ ​ເປົ້າ​ໝາຍ​ສະຫັດ​ສະວັດ​ ຂອງອົງການ ສະຫະ​ປະຊາ​ຊາດ, ທັງນຳ​ເອົາ​ປະ​ເທດຊາດ ​ອອກ​ຈາ​ກຄວາມທຸກ​ຍາກ ​ແລະ ດ້ອຍ​ພັດທະນາ ​ເທື່ອ​ລະ​ກ້າວ. ນອກ​ຈາກ​ນີ້, ສອງ​ຝ່າຍຍັງ​ໄດ້ປຶກ​ສາ​ຫາ​ລື ກ່ຽວ​ກັບ​ບັນຫາສິ່ງ​ທ້າ​ທາຍ ​ແລະ ທິດ​ທາງໃນ​ການ​ສືບ​ຕໍ່ ເສີມ​ຂະ​ຫ​ຍາຍ ​ການ​ພົວ​ພັນ​ຮ່ວມ​ມື​ໃນ​ຕໍ່​ໜ້າ ແລະ ​ແລກ​ປ່ຽນ​ຄຳ​ຄິດ​​ເຫັນ​ ກ່ຽວ​ກັບ​ບັນຫາ​ພົ້ນ​​ເດັ່ນ ​ຂອງ​ສາ​ກົນ ແລະ ພາກ​ພື້ນ ທີ່​ສອງ​ຝ່າຍ ມີ​ຄວາມ​ສົນ​ໃຈຮ່ວມ​ກັນ. ການ​ຢ້ຽມ​ຢາມ​ຂອງຄະນະຜູ້​ແທນ ລັດຖະສະພາເອີຣົບໃນຄັ້ງນີ້, ​ໄດ້​ເປັນຂີດ​ໝາຍ​ອັນ​ສຳ​ຄັນ, ທັງເປັນການ ປະ​ກອບ​ສ່ວນ​ຢ່າງ​ຕັ້ງ​ໜ້າ​ ເຂົ້າ​ໃນ​ການ​ເສີມຂະ​ຫ​ຍາ​ຍ ​ການ​ພົວ​ພັນຮ່ວມ​ມື ລະ​ຫວ່າງ​ ສປປ ລາວ ແລະ ສະຫະພາບເອີຣົບ ​ໃຫ້ນັບມື້​ນັບ​ ມີ​ປະ​ສິດທິ​ຜົນຍິ່ງໆຂຶ້ນ.

ພ້ອມ​ດຽວກັນ​ນີ້​, ທ່ານ Werner Josef LANGEN ຍັງ​ໄດ້​ສະ​ແດງ​ ຄວາມ​ຂອບ​ອົກຂອບໃຈ ​ຕໍ່ ທ່ານ​ລັດຖະມົນຕີ ກະຊວງການ​ຕ່າງ​ປະ​ເທດ ທີ່​ໄດ້​​ໃຫ້ການ​ຕ້ອນຮັບ​ ອັນ​ອົບ​ອຸ່ນໃນຄັ້ງນີ້,​ ພ້ອມ​ຈະສືບຕໍ່ຮ່ວມ​ມື​ ໃນ​ວຽກງານ​ຕ່າງໆ ຕໍ່ໄປອີກໃນອະນາຄົດ.

ຂ່າວ: ວິ​ໄລ​ສັກ /ຂປລ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.