Header Ads

ລາວ-ຈີນ ສຶບຕໍ່ເສີມຂະຫຍາຍສາຍພົວພັນຮ່ວມມືຮອບດ້ານ






ທ່ານ ຫວາງເຫວີນ ທ່ຽນ ເອກອັກຄະລັດຖະທູດ ຈີນປະຈຳລາວ ໄດ້ຖະແຫລງຂ່າວກ່ຽວກັບຜົນສຳເລັດກອງປະຊຸມໃຫຍ່ຄັ້ງທີ 19 ຂອງພັກກອມມູນິດຈີນ ແລະການຢ້ຽມຢາມລາວ ຄັ້ງທຳອິດ ຂອງທ່ານ ສີຈິ້ນຜິງ ເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຈີນ ປະທານປະເທດຈີນ ລະຫວ່າງວັນທີ 13-14 ພະຈິກນີ້, ຕາມການເຊື້ອເຊີນ ຂອງທ່ານ ບຸນຍັງ ວໍລະຈິດ ເລຂາທິການໃຫຍ່ ຄະນະບໍລິຫານງານສູນກາງພັກປະຊາຊົນປະຕິວັດລາວ ປະທານປະເທດ, ກ່ອນໜ້ານີ້ 11 ປີ ການນຳສູງສຸດຂອງຈີນ ໄດ້ມາຢ້ຽມຢາມລາວ ຢ່າງເປັນທາງການ ແລະການຢ້ຽມຢາມໃນຄັ້ງນີ້ ເປັນອີກຄັ້ງໜຶ່ງທີ່ມີຄວາມໝາຍຄວາມສຳຄັນ ຍິ່ງໃຫຍ່ເປັນພິເສດ ຂອງສອງພັກ, ສອງລັດ ແລະປະຊາຊົນສອງຊາດລາວ-ຈີນ.



ທ່ານ ຫວາງເຫວີນ ທ່ຽນ ກ່າວວ່າ: ຄວາມໝາຍຄວາມສຳຄັນອັນດັບໜຶ່ງສ່ອງແສງໃຫ້ເຫັນວ່າ ການນຳສູງສຸດຂອງຈິນຖືສຳຄັນຢ່າງສູງຕໍ່ການເສີມຂະຫຍາຍ ສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ ລາວ-ຈີນ-ຈີນລາວ ພາຍຫລັງກອງປະຊຸມໃຫຍ່ຄັ້ງທີ 19 ຂອງ ພັກກອມມູນິດຈີນ ສຳເລັດລົງຢ່າງສະຫງ່າງາມ, ທ່ານ ສີຈິ້ນຜິງ ໃນຖານະການນຳແກນກາງ ແລະທົ່ວພັກກອມມູນິດຈີນ ໄດ້ຕົກລົງເປັນເອກະພາບ ເລືອກເອົາ ປະເທດລາວເປັນປະເທດໜຶ່ງທີ່ຈະອອກໄປຢ້ຽມຢາມຄັ້ງທຳອິດ, ສະແດງໃຫ້ເຫັນວ່າປະເທດຈີນສະໜັບສະໜູນຢ່າງເດັດດ່ຽວຕໍ່ພັກປະຊາຊົນປະຕິວັດລາວເພາະວ່າສອງປະເທດເປັນປະເທດທີ່ມີອຸດົມຄະຕິອັນດຽວກັນ.




ການພັດທະນາເສດຖະກິດສັງຄົມຄ້າຍຄືກັນສະແດງໃຫ້ເຫັນຢ່າງຈະແຈ້ງວ່າ ຈີນຍິນດີສຶບຕໍ່ເປັນກຳລັງສະໜັບສະໜູນທີ່ເຂັ້ມແຂງໃຫ້ພັກ ແລະລັດຖະບານລາວ ໃນພາລະກິດປະຕິຮູບເສດຖະກິດ ແລະກໍ່ສ້າງສັງຄົມນິຍົມ ຂອງພັກ ແລະປະຊາຊົນລາວ ໃຫ້ກ້າວຂຶ້ນຕາມຮູບແບບການພັດທະນາທີເໝາະສົມກັບສະພາບຕົວຈິງຂອງປະເທດລາວ. ການຢ້ຽມຢາມລາວຄັ້ງນີ້ ທ່ານ ສີຈິ້ນຜິງ ແລະທ່ານ ບຸນຍັງ ວໍລະຈິດ ຈະຮ່ວມກັນວາງແຜນການ ພັດທະນາສາຍພົວພັນ ສອງພັກ ສອງລັດ, ຜັນຂະຫຍາຍສາຍພົວພັນແບບຄູ່ຮ່ວມຍຸດທະສາດ ຮອບດ້ານ ທີ່ ໄວ້ເນື້ອເຊື່ອໃຈກັນ ຊ່ວຍເຫລືອເຊິ່ງກັນແລະກັນ ຕ່າງຝ່າຍຕ່າງມີຜົນປະໂຫຍດສູງສຸດ, ກຳນົດທິດທາງ ການຮ່ວມມື ສ້າງເປັນຄູ່ຮ່ວມອຸດົມການແຫ່ງສັງຄົມນິຍົມ ທີ່ບໍ່ສາມາດຕັດແຍກອອກຈາກກັນໄດ້.




ທ່ານ ຫວາງເຫວີນ ທ່ຽນ ຍັງຕີລາຄາວ່າ: ການຢ້ຽມຢາມລາວຂອງປະທານປະເທດຈີນ ໃນຄັ້ງນີ້ ຍັງມີຄວາມໝາຍ ແລະອິດທິພົນພິເສດໃຫ້ແກ່ການພົວພັນ ສອງພັກ ສອງລັດ ແລະປະຊາຊົນສອງຊາດ ລາວ-ຈີນ- ຈີນ-ລາວ ໃນການຮ່ວມມືໃນການສ້າງສັງຄົມນິຍົມ ແລະຍັງມີອິດທິພົນ ໃນການຊຸກຍູ້ ການພັດທະນາ ລະບອບສັງຄົມນິຍົມໃນທົ່ວໂລກ ໃຫ້ຈະເລີນຮຸ່ງເຮືອງໃນຍຸກໃໝ່ນີ້.


ຂໍ້ມູນ:ວິທະຍຸກະຈາຍສຽງແຫ່ງຊາດ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.