Header Ads

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ຕ້ອນຮັບການເຂົ້າຢ້ຽມຄໍ່ານັບຂອງ ທ່ານ Octavian Bivol



ໃນໂອກາດດັ່ງກ່າວ, ທ່ານ ສອນໄຊ ສີພັນດອນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ການຮ່ວມມື ແລະ ການຊ່ວຍເຫຼືອຂອງອົງການ Unicef ຕໍ່ ສປປ ລາວ ໃນໄລຍະຜ່ານມາ ອັນເປັນການປະກອບສ່ວນທີ່ສຳຄັນ ເຂົ້າໃນການພັດທະນາເສດຖະກິດ-ສັງຄົມຂອງລາວ ໂດຍສະເພາະແມ່ນການຈັດຕັ້ງປະຕິບັດບັນດາໂຄງການ ແລະ ກິດຈະກຳຕ່າງໆ ພາຍໃຕ້ແຜນງານຂອງອົງການທີ່ສອດຄ່ອງກັບແນວທາງນະໂຍບາຍຂອງພັກ ແລະ ລັດຖະບານ ເປັນຕົ້ນແມ່ນບັນດາໜ້າວຽກບູລິມະສິດ ຕິດພັນກັບການສົ່ງເສີມ ແລະ ປົກປ້ອງເດັກນ້ອຍ ກໍ່ຄື ການຮັບປະກັນໃຫ້ເດັກນ້ອຍລາວທຸກຄົນ ໄດ້ຮັບການພັດທະນາ ແລະ ມີອານາຄົດທີ່ດີ.




​ສຳລັບທິດທາງ ການຮ່ວມມືໃນຕໍ່ຫນ້າ, ທັງສອງຝ່າຍຈະຕ້ອງສຸມໃສ່ການຈັດຕັ້ງປະຕິບັດ ແຜ່ນການຮ່ວມມືລະຫວ່າງ ອົງການ Unicef ແລະ ລັດຖະບານ ສປປ ລາວ 2017-2021 ຊຶ່ງກວມເອົາ 5 ຂົງເຂດເປົ້າໝາຍຄື: ວຽກງານສາທາລະນະສຸກ ແລະ ໂພສະນາການ; ນໍ້າສະອາດ ແລະ ວຽກງານສູຂະອານາໄມ ແລະ ການປ່ຽນແປງຂອງດິນຟ້າອາກາດ; ການສຶກສາ; ການປົກປ້ອງເດັກ ແລະ ວຽກງານອື່ນໆທີ່ປິ່ນອ້ອມ ໂດຍຖືສຳຄັນການຮ່ວມມືຂອງທຸກພາກສ່ວນໃນສັງຄົມ. ແຜນການຮ່ວມມືດັ່ງກ່າວ ແມ່ນມີຄວາມສຳຄັນຍິ່ງ ໃນການປະກອບສ່ວນສະໜັບສະໜູນ ການປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII , ເວົ້າລວມ ກໍ່ແມ່ນການປະກອບສ່ວນເຂົ້າໃນການຈັດຕັ້ງຜັນຂະຫຍາຍເປົ້າໝາຍການພັດທະນາແບບຍືນຍົງ (SDGs) ແຕ່ນີ້ຮອດ 2030.




ໃນໂອກາດດຽວກັນນີ້, ທ່ານ Octavian Bivol ໄດ້ສະແດງຄວາມຂອບໃຈຕໍ່ ທ່ານຮອງນາຍົກລັດຖະມົນຕີ ທີ່ໄດ້ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້ ພ້ອມທັງຢືນຢັນວ່າ ອົງການ Unicef ຈະສືບຕໍ່ໃຫ້ການຮ່ວມມືຢ່າງຕັ້ງໜ້າ ແລະ ໃຫ້ການຊ່ວຍເຫຼືອລັດຖະບານ ສປປ ລາວ ໃນການຈັດຕັ້ງປະຕິບັດແຜນການຮ່ວມມືຕ່າງໆ ໃຫ້ພັດທະນາກ້າວໜ້າໄດ້ໝາກຜົນສູງສຸດ.






ຂໍ້ມູນ: ຫ້ອງວ່າການສຳນັກງານນາຍົກລັດຖະມົນຕີ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.