Header Ads

ທ່ານຮອງນາຍົກລັດຖະມົນຕີ ຕິດຕາມອາດີດການນຳຂັ້ນສູງ ໄປຢ້ຽມຢາມພື້ນຖານການຜະລິດຢູ່ແຂວງວຽງຈັນ





​ໃນວັນທີ 8 ທັນວາ 2017 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ໄດ້ຕິດຕາມທ່ານ ຈູມມາລີ ໄຊຍະສອນ ອາດີດປະທານປະເທດ ພ້ອມດ້ວຍຄະນະ ໄປຢ້ຽມຢາມພື້ນຖານການຜະລິດ ຢູ່ບ້ານບຸ່ງພ້າວ, ເມືອງທຸລະຄົມ, ແຂວງວຽງຈັນ. ໂດຍມີທ່ານ ວິດົງ ໄຊຍະສອນ ເຈົ້າແຂວງໆວຽງຈັນ ພ້ອມດ້ວຍຄະນະນຳຂອງແຂວງວຽງຈັນ ແລະ ອຳນາດການປົກຄອງທ້ອງຖິ່ນ ໃຫ້ການຕ້ອນຮັບ.



ໃນໂອກາດດັ່ງກ່າວ, ຄະນະຂອງທ່ານ ຈູມມາລີ ໄຊຍະສອນ ໄດ້ຮັບຟັງການລາຍງານ ສະພາບການລ້ຽງງົວ ຂອງກຸ່ມລ້ຽງງົວເປັນສິນຄ້າ ຈາກທ່ານ ພຸດທະເສນ ວົງສີປະສົມ ເຊິ່ງເຫັນວ່າ: ໄດ້ສ້າງກຸ່ມລ້ຽງງົວເປັນສິນຄ້າຂຶ້ນ ໃນປີ 2009 ເບື້ອງຕົ້ນ ມີງົວລາດ ຈຳນວນ 400 ໂຕ, ມາຮອດປີ 2015 ບໍລິສັດ ພອນສັກ ຈຳກັດ ໄດ້ນຳເອົາງົວພັນມາສົ່ງເສີມໃຫ້ໃຫ້ກຸ່ມ ກໍ່ຄື ປະຊາຊົນລ້ຽງ ຈຳນວນ 272 ໂຕ ໃນນັ້ນ ພັດທະຂອງກຸ່ມຕໍ່ບໍລິສັດດັ່ງກ່າວ ແມ່ນເອົາລູກງົວພັນທີ່ເກີດມາໂຕທຳອິດ ຄືນໃຫ້ບໍລິສັດ. ມາຮອດປະຈຸບັນ ກຸ່ມດັ່ງກ່າວ ສາມາດມອບຕົ້ນທຶນ ກໍ່ຄື ລູກງົວທີ່ເກີດມາໂຕທຳອິດ ຄືນໃຫ້ບໍລິສັດແລ້ວ ຈຳນວນ 121 ໂຕ, ພ້ອມກັນນັ້ນ ກໍ່ຍັງມີງົວລາດ ຈຳນວນ 1.020 ໂຕ, ງົວພັນ ຈຳນວນ 300 ກວ່າໂຕ. ຫຼັງຈາກນັ້ນ, ກໍ່ໄດ້ຮັບຟັງການລາຍງານ ກ່ຽວກັບການປູກພືດຜັກອິນຊີ ຈາກທ່ານ ນ. ມະນີວັນ ສີດາລາ ຫົວໜ້າກຸ່ມປູກພືດຜັກອິນຊີ ເຊິ່ງເຫັນວ່າ: ກຸ່ມດັ່ງກ່າວ ໄດ້ຮັບການສ້າງຕັ້ງຂຶ້ນ ໃນປີ 2010 ໃນເນື້ອທີ່ຈຳນວນ 4 ເຮັກຕາ, ມີສະມາຊິກ ຈຳນວນ 16 ຄອບຄົວ. ມາຮອດປະຈຸບັນ ແມ່ນມີເນື້ອທີ່ປູກ ຈຳນວນ 18 ເຮັກຕາ, ມີສະມາຊິກ ຈຳນວນ 21 ຄອບຄົວ, ສະເລ່ຍລາຍຮັບ ຈາກການຂາຍພືດຜັກຂອງແຕ່ລະຄອບຄົວ ແມ່ນ 4-5 ລ້ານກີບ/ເດືອນ ໂດຍໄດ້ນຳໄປຂາຍຢູ່ຕະຫຼາດກະສິກຳອິນຊີ ທີ່ນະຄອນຫຼວງວຽງຈັນ.



ໃນໂອກາດດຽວກັນ, ທ່ານ ຈູມມາລີ ໄຊຍະສອນ ໄດ້ໃຫ້ກຽດໂອ້ລົມ ແລະ ມີຂໍ້ເຈາະຈີ້ມ ເຖິງຂໍ້ສະດວກ, ຂໍ້ຫຍຸ້ງຍາກ, ບັນຫາທີ່ຄວນເອົາໃຈໃສ່, ເງື່ອນໄຂທ່າແຮງ ແລະ ຂໍ້ຈຳກັດຕ່າງໆ. ຫຼັງຈາກນັ້ນ, ທ່ານໄດ້ເນັ້ນໜັກໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ຈັດຕັ້ງປະຕິບັດບາງບັນຫາ ເປັນຕົ້ນ ສະເໜີໃຫ້ແຂວງວຽງຈັນ ແລະ ເມືອງທຸລະຄົມ ຄົ້ນຄວ້າສ້າງເມືອງທຸລະຄົມ ໃຫ້ກາຍເປັນຕົວແບບ ທາງດ້ານກຸ່ມການປູກ ແລະ ກຸ່ມການລ້ຽງ ຕິດພັນກັບການທ່ອງທ່ຽວໃນວຽກງານດັ່ງກ່າວ ໂດຍໄວ ໃນນັ້ນ ແມ່ນໃຫ້ສຸມໃສ່ການປູກ-ການລ້ຽງ-ການທ່ອງທ່ຽວ ໃນສິ່ງທີ່ເມືອງມີເງື່ອນໄຂ ແລະ ໜໍ່ແໜງ ເປັນຕົ້ນ ການລ້ຽງງົວ, ການເຮັດນາໄຮ່ໃຫຍ່, ການປູກພືດຜັກອິນຊີ, ການສ້າງ-ປັບປຸງແຫຼ່ງທ່ອງທ່ຽວ ແລະ ອື່ນໆ ເພື່ອໃຫ້ທ້ອງຖິ່ນອື່ນ ໄດ້ມາສຶກສາຮໍ່າຮຽນເອົາເປັນແບບຢ່າງ ແລະ ກາຍເປັນຫົວໜ່ວຍທຸລະກິດຂະໜາດນ້ອຍ-ຂະໜາດກາງໃນອະນາຄົດ; ຄົ້ນຄວ້າປັບປຸງຈຳນວນບ້ານ ຂອງເມືອງທຸລະຄົມ ໃຫ້ກະທັດຮັດ ໂດຍສ້າງໃຫ້ເປັນບ້ານໃຫຍ່ ຕາມທິດ 3 ສ້າງ (ຫຼຸດຈຳນວນ ບ້ານລົງ) ເພື່ອສະດວກໃນການຄຸ້ມຄອງ, ການຊຸກຍູ້ສົ່ງເສີມ, ຫຼຸດຜ່ອນຂອດການປະສານງານ ລວມທັງ ພາລະຂອງພາກລັດ ແລະ ອື່ນໆ ແນໃສ່ເຮັດໃຫ້ບ້ານມີຄວາມໜັກແໜ້ນ, ເຂັ້ມແຂງ, ສາມາດຊ່ວຍເຫຼືອ ແລະ ເພິ່ງພາເຊິ່ງກັນ ແລະ ກັນໄດ້ ໃນນັ້ນ ແມ່ນໃຫ້ເອົາໃຈສ່ຕໍ່ວຽກງານ ການສ້າງໜ່ວຍພັກແຂງຮູ້ນຳພາຮອບດ້ານ ໄປຄວບຄູ່ກັນ.



​ໃນຕອນທ້າຍ, ທ່ານ ຈູມມາລີ ໄຊຍະສອນ ພ້ອມດ້ວຍຄະນະ ຍັງໄດ້ໄປເບິ່ງພື້ນທີ່ລ້ຽງງົວ, ພື້ນທີ່ປູກຫຍ້າລ້ຽງງົວ ແລະ ພື້ນທີ່ປູກພືດຜັກອິນຊີ ຕື່ມອີກ.​


ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ 

© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.