Header Ads

ຫຼວງພະບາງມີຫຼາຍກິດຈະກໍາທີ່ໂດດເດັ່ນເພື່ອສະເຫຼີມສະຫຼອງປີທ່ອງທ່ຽວລາວ 2018



ພິທີຖະແຫລງຂ່າວການຈັດກິດຈະກຳສະເຫລີມສະຫລອງປີທ່ອງທ່ຽວລາວ 2018 ເພື່ອໂຄສະນາ ແລະ ດຶງດູດນັກທ່ອງທ່ຽວພາຍໃນ ແລະ ຕ່າງປະເທດເຂົ້າມາທ່ຽວ ສປປ ລາວ ໃຫ້ຫລາຍຂຶ້ນ. ທີ່ຈັດໂດຍກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ. ໄດ້ຈັດໃນຕອນເຊົ້າວັນທີ 9 ທັນວານີ້, ທີ່ຫ້ອງວ່າການແຂວງຫລວງພະບາງ ໂດຍມີບັນດາການນໍາຂັ້ນແຂວງ, ຜູ້ປະກອບການທຸລະກິດ, ທູຕານຸທູດປະຈໍາ ສປປ ລາວ, ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.






ໂອກາດນີ້ ທ່ານ ວົງສະຫວັນ ເທບພະຈັນ ຮອງເຈົ້າແຂວງໆຫຼວງພະບາງ, ປະທານຄະນະຊີ້ນໍາ ກ່າວວ່າ: ເພື່ອສະເຫຼີມສະຫຼອງປີທ່ອງທ່ຽວລາວ 2018ນີ້, ແຂວງຫຼວງພະບາງໄດ້ຖືເອົາວຽກງານການທ່ອງທ່ຽວເປັນບຸລິມະສິດອັນດັບໜຶ່ງ ພ້ອມດ້ວຍການກຳນົດຍຸດທະສາດພັດທະນາ ສ້າງຫຼວງພະບາງໃຫ້ເປັນສູນກາງທ່ອງທ່ຽວທາງດ້ານທຳມະຊາດ, ວັດທະນະທຳ ແລະ ທາງດ້ານປະຫວັດສາດເປັນໃຈກາງ, ທາງດ້ານການສຶກສາ ແລະ ສາທາລະນະສຸກເປັນຈຸດແວ່ເຊົາ ທີ່ມີການບໍລິການແບບຄົບວົງຈອນ ແລະ ມີທາງຜ່ານໄປສູ່ບັນດາແຂວງພາກເໜືອຂອງລາວ ແລະ ອະນຸພາກພື້ນ.



ທ່ານກ່າວອີກວ່າ: ກິດຈະກຳສໍາລັບປີທ່ອງທ່ຽວລາວ 2018 ແມ່ນຈະເລີ່ມຕົ້ນແຕ່ເດືອນທັນວາ 2017ນີ້, ຈົນໄປຮອດທ້າຍປີ 2018, ປະກອບມີກິດຈະກໍາຕ່າງໆຂອງເມືອງ ແລະ ແຂວງທັງໝົດ 37 ກິດຈະກຳເຂົ້າຮ່ວມ. ໃນນີ້, ກິດຈະກໍາຫຼັກມີ 7 ກິດຈະກໍາຄື: ງານປະກວດຂັບລຳພື້ນເມືອງຫຼວງພະບາງ, ງານສະເຫຼີມສະຫຼອງປີທ່ອງທ່ຽວລາວ 2018 ຢ່າງເປັນທາງການ ແລະ ບຸນປີໃໝ່ລາວຫຼວງພະບາງ, ງານງາມແທ້ໂອ້ຫຼວງພະບາງທີ່ສະທ້ອນໃຫ້ເຫັນຄວາມເປັນຫຼວງພະບາງ, ງານເທດສະການອາຫານພື້ນເມືອງ, ງານວາງສະແດງສິນຄ້າຫັດຖະກຳ, ສາທິດກິດຈະກຳທີ່ຕິດພັນກັບຊີວິດທີ່ເປັນເອກະລັກຂອງແຂວງ, ການສະແດງສິນລະປະຂອງຊົນເຜົ່າຕ່າງໆ ແລະ ງານທັດສະນະສຶກສາ, ງານສຳມະນາວ່າດ້ວຍການທ່ອງທ່ຽວແບບຍືນຍົງລະຫວ່າງພາກລັດ ແລະ ພາກທຸລະກິດໃນໂອກາດວັນທ່ອງທ່ຽວໂລກ, ງານທັດສະນະສຶກສາທ່ອງທ່ຽວຊົມວິຖີຊີວິດຊາວບ້ານການຕໍ່າຫູກທໍໃຫມ, ສາທິດການຍ້ອມສີຜ້າແບບທຳມະຊາດບ້ານນາຍາງ, ຊິມໝາກກ້ຽງຫວານເມືອງນໍ້າບາກ ແລະ ທ່ຽວຊົມທຳມະຊາດເມືອງງອຍ, ກິດຈະກຳຖີບລົດເພື່ອຫລຸດຜ່ອນມົນລະພິດ, ງານມະໂຫລານຮູບເງົາຫລວງພະບາງ ແລະ ງານບູຮານ "ງານ Ancient LuangPrabang" ທີ່ເດີ່ນຕະຫຼາດແລງແລະເຮືອນມໍລະດົກ. ສ່ວນກິດຈະກໍາບັນດາເມືອງຕ່າງໆປະກອບມີ: ການທ່ອງທ່ຽວທາງດ້ານກະສິກຳ ແລະ ທຳມະຊາດທີ່ເມືອງພູຄູນ, ງານວາງສະແດງເຄື່ອງຫັດຖະກຳເຄື່ອງປັ້ນດິນເຜົາທີ່ເມືອງຈອມເພັດ, ບຸນປະເພນີກິນຈຽງຂອງເຜົ່າມົ້ງ ແລະ ບຸນປະເພນີຂອງເຜົ່າກຶມມຸ, ບຸນປະເພນີຂອງເຜົ່າລື້ເມືອງປາກອູ, ບຸນອອກພັນສາຊ່ວງເຮືອເມືອງຊຽງເງິນ, ບຸນບັ້ງໄຟທີ່ເມືອງນານ ແລະ ກິດຈະກຳອື່ນໆ.




ສໍາລັບເປີດປີທ່ອງທ່ຽວລາວ 2018 ທີ່ແຂວງຫຼວງພະບາງຈະໄດ້ຈັດຂຶ້ນໃນວັນທີ 15 ເມສາ 2018.

ພາບ ແລະ ຂ່າວ: ຊີອາໄອ
© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.