Header Ads

ກະຊວງແຮງງານ ແລະ ສະຫວັດດີການສັງຄົມ ຮ່ວມກັບອົງການແຮງງານສາກົນຈັດງານຍ່າງເພື່ອສຸຂະພາບ ເນື່ອງໃນໂອກາດວັນສະເຫຼີມສະຫຼອງ ວັນແຮງງານເຄື່ອນຍ້າຍສາກົນ



ກະຊວງແຮງງານ ແລະ ສະຫວັດດີການສັງຄົມ ຮ່ວມກັບອົງການແຮງງານສາກົນ (ILO) ແລະ ອົງການຈັດຕັ້ງສາກົນເພື່ອການເຄື່ອນຍ້າຍຖິ່ນຖານ (IOM) ຮ່ວມກັນຈັດງານຍ່າງເພື່ອສຸຂະພາບ, ເນື່ອງໃນໂອກາດວັນສະເຫຼີມສະຫຼອງ ວັນແຮງງານເຄື່ອນຍ້າຍສາກົນ ເພື່ອໂຄສະນາປູກຈິດສຳນຶກແກ່ຊຸມຊົນທົ່ວສັງຄົມ ໄດ້ເຂົ້າໃຈເຖິງບັນຫາການເຄື່ອນຍ້າຍແຮງງານ ແລະ ເປັນການສະແດງຄວາມຮູ້ບຸນຄຸນຂອງການເຄື່ອນຍ້າຍຂອງແຮງງານ, ຮັບປະກັນໃຫ້ແຮງງານໄດ້ຮັບການປົກປ້ອງສິດທິອັນຊອບທຳ ແລະ ມີຄວາມປອດໄພໃນການດຳລົງຊີວິດ.


ພິທີດັ່ງກ່າວ ໄດ້ຈັດຂຶ້ນ ໃນຕອນເຊົ້າຂອງວັນທີ 23 ທັນວາ 2017 ທີ່ປະຕູໄຊ, ນະຄອນຫຼວງວຽງຈັນ ພາຍໃຕ້ຄຳຂັວນທີ່ວ່າ “ການເຮັດວຽກທີ່ມີຄຸນຄ່າ ແລະ ເປັນທຳ ສຳລັບແຮງງານເຄື່ອນຍ້າຍໝົດທຸກຄົນ” ເປັນກຽດເຂົ້າຮ່ວມໂດຍທ່ານ ປອ ຄໍາແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ທ່ານ ບຣູກ ບູດສ ຜູ້ຈັດໂຄງການ, ຮັກສາການ ອົງການຈັດຕັ້ງສາກົນ ເພື່ອການເຄື່ອນຍ້າຍຖິ່ນຖານ, ມີບັນດາ ຮອງລັດຖະມົນຕີ, ພ້ອມດ້ວຍແຂກຖືກເຊີນທັງພາຍໃນ ແລະ ຕ່າງປະເທດ ເຂົ້າຮ່ວມ.



ໂອກາດນີ້, ທ່ານ ປອ ຄຳແພງ ໄຊສົມແພງ ກ່າວວ່າ: ເນື່ອງໃນໂອກາດການສະເຫຼີມສະຫຼອງ ວັນແຮງງານເຄື່ອນຍ້າຍສາກົນ, ນັບແຕ່ປີ 2000 ອົງການສະຫະປະຊາຊາດ ໄດ້ຮັບຮອງເອົາ ວັນທີ 18 ທັນວາ ເປັນວັນແຮງງານເຄື່ອຍ້າຍສາກົນ, ຕັ້ງແຕ່ນັ້ນມາ, ບັນດາປະເທດສະມາຊິກຂອງກອົງການສະຫະປະຊາຊາດ, ອົງການຈັດຕັ້ງສາກົນ ແລະ ເຄື່ອຂ່າຍຕ່າງໆ ຂອງອົງການສະຫະປະຊາຊາດ ໄດ້ຈັດງານສະເຫຼີມສະຫຼອງວັນແຮງງານເຄື່ອຍ້າຍຂຶ້ນທຸກໆປີ ແລະ ສປປ ລາວ ໄດ້ເລີ່ມຈັດຂຶ້ນ ແຕ່ປີ 2013 ເປັນຕົ້ນມາ, ເຊິ່ງປະຈຸບັນແຮງງານເຄື່ອນຍ້າຍແມ່ນນັບມື້ນັບເພີ່ມຂຶ້ນ, ເຄື່ອນຍ້າຍແຕ່ເຂດຊົນນະບົດເຂົ້າສູ່ຕົວເມືອງ ແລະ ການເຄື່ອນຍ້າຍອອກໄປເຮັດວຽກຢູ່ຕ່າງປະເທດ, ນັບທັງແບບຖືກຕ້ອງ ແລະ ແບບບໍ່ຖືກຕ້ອງຕາມກົດໝາຍ, ໂດຍສະເພາະແມ່ນ ການເຄື່ອນຍ້າຍໄປເຮັດວຽຢູ່ປະເທດໃກ້ຄຽງ, ແຕ່ໄລຍະ 2011 ຫາກາງປີ 2017 ມີແຮງງານລາວທີ່ເຮັດວຽກຜ່ານການຈັດຫາງານ ທີ່ຖືກຕ້ອງຕາມກົດໝາຍ ແລະ ຈັດສົ່ງແຮງງານໄປຝຶກອົບຮົມວິຊາຊີບຢູ່ຕ່າງປະເທດ ມີຈຳນວນທັງໝົດ 115,634 ຄົນ, ຍິງ 58,237 ຄົນ.

ທ່ານກ່າວຕື່ມວ່າ: ການແກ້ໄຂສະພາບແຮງງານ ໄປເຮັດວຽກບໍ່ຖືກຕ້ອງຢູ່ໄທນັ້ນ, ກໍ່ໄດ້ດຳເນີນການປັບສະຖາພາບ ເພື່ອຫັນເຂົ້າສູ່ການຄຸ້ມຄອງຕາມກົດໝາຍ ເຊິ່ງໄດ້ຈັດຕັ້ງປະຕິວັດແລ້ວ 4 ຄັ້ງ, ມາເຖິງປະຈຸບັນ ສາມາດຢັ້ງຢືນ ແລະ ອອກບັດອະນຸຍາດເຮັດວຽກທີ່ຖືກຕ້ອງຕາມກົດໝາຍ ໃຫ້ແຮງງານທັງໝົດ 148,658 ຄົນ, ຍິງ 79,474 ຄົນ, ໃນນັ້ນ, ຍັງມີແຮງງານລາວທີ່ເຮັດວຽກແບບບໍ່ຖືກຕ້ອງຢູ່ ປະເທດໄທ ແລະ ພວມດຳເນີນການປັບສະຖານະພາບໃຫ້ເຂົາເຈົ້າ ໃຫ້ຖືກຕ້ອງຕາມລະບຽບການ.

ຂ່າວ: ເພັດສະໄໝ/ກະຊວງແຮງງານ ແລະ ສະຫວັດດີການສັງຄົມ | ພາບ : Nouthong Inthavong 

© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.