Header Ads

ທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ຕ້ອນຮັບຄະນະຜູ້ແທນ ຝຣັ່ງ



ໃນຕອນເຊົ້າຂອງວັນທີ 20 ທັນວາ 2017 ຢູ່ທີ່ ຫ້ອງວ່າການສໍານັກງານນາຍົກລັດຖະມົນຕີ ທ່ານ ປອ. ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບ ການເຂົ້າຢ້ຽມຂໍ່ານັບຂອງ ທ່ານ ປາສການ ລາມີ ອະດີດຜູ້ອໍານວຍການ ອົງການການຄ້າໂລກ, ຜູ້ແທນປະສານງານ ລະຫວ່າງ ກະຊວງ ກ່ຽວກັບງານວາງສະແດງໂລກ ປີ 2025 ພ້ອມດ້ວຍຄະນະ ເນື່ອງໃນໂອກາດທີ່ເດີນທາງ ມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນວັນທີ 19 ທັນວາ 2017 ນີ້.



ກ່ອນ​ອື່ນ ທ່ານ ປອ. ເພັດ ພົມພິພັກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ຂອງ ທ່ານ ປາສການ ລາມີ ພ້ອມດ້ວຍຄະນະ ໃນຄັ້ງນີ້ ເພື່ອເປັນການປະກອບສ່ວນສໍາຄັນ ເຂົ້າໃນການຊຸກຍູ້້ຊ່ວຍເຫຼືອ ແລະ ສະໜັບສະໜູນເຊິ່ງກັນ ແລະ ກັນ ລະຫວ່າງ ສປປ ລາວ ແລະ ຝຣັ່ງ ໃຫ້ສູງເດັ່ນຂຶ້ນ ໃນເວທີ່ສາກົນ ທັງເປັນການລະດົມ ຂົນຂວາຍການຊ່ວຍເຫຼືອ ເພື່ອການພັດທະນາເສດຖະກິດສັງຄົມຂອງ ສປປ ລາວ ໃຫ້ມີການຂະຫຍາຍຕົວຢ່າງຕໍ່ເນື່ອງ. ພ້ອມດຽວກັນນີ້, ທ່ານ ປອ. ເພັດ ພົມພິພັກ ຍັງໄດ້ແຈ້ງໃຫ້ຊາບ ກ່ຽວກັບແນວທາງນະໂຍບາຍຂອງພັກ-ລັດ ໂດຍສະເພາະແມ່ນ ການພັດທະນາເສດຖະກິດ-ສັງຄົມ ໃຫ້ໄປຕາມທິດຍືນຍົງ ແລະ ສີຂຽວ.

ໂອກາດດັ່ງກ່າວ, ທ່ານ ປາສການ ລາມີ ໄດ້ສະແດງຄວາມຂອບໃຈ ມາຍັງທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ທີ່ໄດ້ເສຍສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນ ໃນຄັ້ງນີ້ ພ້ອມທັງ ໄດ້ແຈ້ງຈຸດປະສົງ ຂອງການເດີນທາງມາເຄື່ອນໄຫວຢ້ຽມຢາມ ແລະ ເຮັດວຽກຢູ່ ສປປ ລາວ ໃນຄັ້ງ, ໂດຍສະເພາະແມ່ນ ການນໍາສະເໜີ ກ່ຽວກັບໂຄງການລົງສະໝັກຄັດເລືອກ ເພື່ອເປັນເຈົ້າພາບຈັດງານວາງສະແດງໂລກ ໃນປີ 2025 (EXPO 2025 Grand Paris de la France) ເຊິ່ງການຄັດເລືອກດັ່ງກ່າວ ແມ່ນຈະໄດ້ຈັດຂຶ້ນໃນເດືອນ ພະຈິກ ປີ 2018 ທີ່ຈະມາເຖິງນີ້.


ແຫລ່ງ: ຫ້ອງວ່າການສຳນັກງານນາຍົກລັດຖະມົນຕີ 

© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.