Header Ads

ຮອງ​ນາຍົກລັດຖະມົນຕີ ຢ້ຽມຢາມ​ອ້າຍ​ນ້ອງ​ທະຫານ ​ທີ່​​ວິທະຍາຄານ​ກົມມະ​ດຳ




​ເນື່ອງໃນໂອກາດວັນສ້າງຕັ້ງກອງທັບປະຊາຊົນປະຕິວັດລາວ ຄົບຮອບ 69 ປີ(20/01/1959-2018). ດັ່ງນັ້ນ, ​ໃນ​ວັນ​ທີ 17 ມັງກອນ 2018 ທ່ານ ສອນ​ໄຊ​ ສີ​ພັນ​ດອນ, ຮອງ​ນາຍົກລັດຖະມົນຕີ ພ້ອມດ້ວຍຄະນະນຳຈາກກະຊວງປ້ອງກັນປະເທດ ​ແລະ ຄະນະ ກໍ່ໄດ້ເດີນທາງໄປເຄື່ອນໄຫວ ແລະ ຢ້ຽມຢາມ ວິທະຍາຄານກົມມະດຳ(ເຂດນໍ້າຊວງ) ແຂວງວຽງຈັນ ​ເຊິ່ງມີ ທ່ານພົນຈັດຕະວາ ບຸນຈັນ ລາດສະວົງ ຫົວໜ້າການທະຫານ ວິທະຍາຄານກົມມະດຳ, ພ້ອມດ້ວຍບັນດາຄະນະນຳຂອງວິທະຍາຄານ, ທ່ານຮອງ​ເຈົ້າ​ແຂວງໆ​ວຽງຈັນ, ອໍານາດ​ການ​ປົກຄອງ​ທ້ອງ​ຖິ່ນ, ຄະນະ​ຮັບຜິດຊອບ​ຈຸດ​ສຸມ, ບັນດາ​ຄູ​ອາຈານ ​ແລະ ນັກຮຽນອ້າຍ​ເອື້ອຍ​ນ້ອງທະຫານ​ພາຍ​ໃນ​ວິທະຍາຄານ ​ໃຫ້ການ​ຕ້ອນຮັບ.



​ໃນ​ການ​ມາ​ເຄື່ອນ​ໄຫວ​ຢ້ຽມຢາມ​ຄັ້ງນີ້, ທ່ານ ພັນ​ເອກ ​ຖາວອນ ແກ້ວອິນ​ທະ​ວົງ ຫົວໜ້າການ​ເມືອງ​ວິທະຍາຄານ​ກົມມະ​ດຳ ກໍ່​ໄດ້​ລາຍ​ງານ​ໃຫ້​ຊາບ ກ່ຽວກັບ​ປະຫວັດ​ຄວາມ​ເປັນ​ມາ ​ແລະ ການ​ເຄື່ອນ​ໄຫວ​ວຽກງານ​​ໃນ​ໄລຍະ​ຜ່ານ​ມາ​ຂອງ​ວິທະຍາຄານ​ດັ່ງກ່າວ ​ເຊິ່ງ​ໄດ້​ສືບ​ທອດ​ມູນ​ເຊື້ອມາ​ຈາກ​ໂຮງຮຽນກົມມະ​ດຳ​ຊັ້ນຕົ້ນ ​ໃນ​ເມື່ອ​ກ່ອນ ​​ແລະ ​ເປັນ​ໂຮງຮຽນຫຼັງທຳ​ອິດ​ຂອງ​ກອງທັບ ທີ່​ປະທານ ​ໄກສອນ ພົມວິຫານ ​ໄດ້​ປະກາດ​ສ້າງຕັ້ງຂຶ້ນ ​ໃນ​ວັນ​ທີ 18 ມິຖຸນາ 1955 ທີ່​ບ້ານ​ກາງ​ໂມງ, ​ເມືອງ​ໂສ​ຍ ​ແຂວງ​ຫົວພັນ ທີ່​ເປັນ​ເຂດ​ທີ່ໝັ້ນຂອງ​ການ​ປະຕິວັດ ​ໃນ​ເວລາ​ນັ້ນ. ປະຈຸ​ບັນ, ວິທະຍາຄານ​ກົມມະ​ດຳ ​ໄດ້​ປະຕິບັດໜ້າທີ່​ພາລະ​ບົດບາດ ​ໃນ​ການ​ດຳ​ເນີນ​ການ​ຝຶກ​ອົບຮົມ-ບຳລຸງ​ກໍ່ສ້າງ​ນາຍສິບ ​ແລະ ນາຍ​ທະຫານ​ລຸ້ນສືບ​ທອດ, ການ​ປັບປຸງ​ກໍ່ສ້າງ​ກົມ​ກອງ, ປະຕິບັດໜ້າທີ່​ກໍ່ສ້າງ​ຮາກ​ຖານ​ການ​ເມືອງ ພົວພັນ​ປະສານ​ສົມທົບ ກັບ​ອຳນາດ​ການ​ປົກຄອງ​ອ້ອມ​ຂ້າງ, ປະຕິບັດໜ້າທີ່​ຄົ້ນຄວ້າ​ວິທະຍາສາດ, ​ປະຫວັດສາດການ​ທະຫານ-​ການ​ເມືອງ ​ເພື່ອ​ຮັບ​ໃຊ້​ວຽກງານ​ອົບຮົມ​ສິດສອນ​ຮ່ຳຮຽນ, ປະຕິບັດ​ທິດ​ນຳ 4 ປູກ 4 ລ້ຽງ ບົນ​ຈິດ​ໃຈ​ເພິ່ງ​ຕົນ​ເອງ, ກຸ້ມ​ຕົນ​ເອງ ​ແລະ ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ, ປະຕິບັດໜ້າທີ່​ພົວພັນ, ຮ່ວມ​ມື​ສາກົນ ຕາມ​ແນວທາງ​ການ​ຕ່າງປະ​ເທດ​ຂອງ​ພັກ.

​ວິ​ທະ​ຍາ​ຄານ​ກົມມະ​ດຳ ປະກອບ​ມີ​ທັງໝົດ 5 ຫຼັກສູດ​ການ​ຮຽນການ​ສອນ ​ເຊິ່ງຕະຫຼອດຫຼາຍປີ​ທີ່​ຜ່ານ​ມາ ສາມາດບຳລຸງ​ກໍ່ສ້າງ​ພະນັກງານ ​ແລະ ນາຍ​ສິບ ອອກ​ຮັບ​ໃຊ້​ຊາດ ​ໄດ້ຫຼາຍກວ່າ 10 ພັນ​ຄົນ ຊຶ່ງ​ລ້ວນ​ແຕ່​ເປັນ​ຜູ້​ທີ່​ມີ​ຄວາມ​ຮູ້​ຄວາມ​ສາມາດ, ມີ​ຄວາມ​ຈົ່ງ​ຮັກ​ພັກດີ, ຊື່ສັດ​ບໍລິສຸດ​ຕໍ່ພັກ-ລັດ ​ແລະ ປະ​ເທດ​ຊາດ. ມີຫຼາຍສະຫາຍ ໄດ້​ກາຍ​ເປັນ​ນັກຮົບ​ແຂ່ງຂັນ, ​ເປັນ​ວິລະ​ຊົນ​ແຫ່ງ​ຊາດ, ​ເປັນ​ພະນັກງານ​ຂັ້ນສູງ​ຂອງ​ພັກ, ລັດ ​ແລະ ກອງທັບ.

​​ໂອກາດ​ນີ້, ທ່ານ​ຮອງ​ນາຍົກລັດຖະມົນຕີ ກໍ່​ໄດ້​ໂອ້​ລົມ​ຕໍ່ຄະນະ​ພັກ-​ຄະນະ​ນຳ, ຄູ​ອາຈານ ​ແລະ ນັກຮຽນການ​ທະຫານ ​ຂອງ​ວິທະຍາຄານ​ດັ່ງກ່າວ ​ເຊິ່ງທ່ານ​ໄດ້​ນຳ​ເອົາ​ຄວາມ​ຢ້ຽມຢາມ​ຖາມ​ຂ່າວ​ອັນ​ອົບ​ອຸ່ນ, ຄວາມ​ຮັກ​ແພງ​ອັນ​ສະໜິດສະໜົມ ຈາກ​ສູນ​ກາ​ງພັກ ​ແລະ ລັດຖະບານ ມາ​ຍັງ​ບັນດາ​ອ້າຍ​ນ້ອງ​ທະຫານ ​ແລະ ຜ່ານ​ບັນດາ​ສະຫາຍ ​ໄປ​ຍັງ​ບັນດາ​ຄອບຄົວ​ຜູ້​ທີ່​ໄດ້​ສະຫຼະຊີວິດ, ຜູ້​ບາດ​ເຈັບ, ຜູ້​ເຈັບ​ປ່ວຍ ທີ່​ກຳລັງ​ພະຍາບານ​ຕົນ, ບັນດາ​ນາຍ ​ແລະ ພົນທະຫານ ທີ່​ອອກ​ໄປ​ປະຕິບັດໜ້າທີ່ ຢູ່​ເຂດ​ທຸລະກັນດານ ​ແລະ ບັນດາ​ສະຫາຍ​ທີ່​ອອກ​ພັກຜ່ອນ​ບຳນານ. ພ້ອມ​ທັງສະ​ແດງຄວາມ​ຍ້ອງຍໍ​ສັນລະ​ເສີນ ມາ​ຍັງ​ບັນດາ​ສະຫາຍ​ພະນັກງານ ​ແລະ ນັກຮົບ​ທົ່ວ​ກົມ​ກອງ ທີ່​ໄດ້​ພ້ອມ​ກັນ​ຕັ້ງໜ້າ​ເຮັດ​ສຳ​ເລັດໜ້າທີ່​ອັນ​ມີ​ກຽດສະຫງ່າ​ຂອງ​ຕົນ. ນອກຈາກ​ນີ້, ຕໍ່ກັບ​ຄວາມ​ຫຍຸ້ງຍາກ ​ແລະ ສິ່ງ​ທ້າ​ທາຍຫຼາຍປະການ ທ່ານຮອງ​ນາຍົກລັດຖະມົນຕີ ຍັງ​ໄດ້​ຍົກ​ໃຫ້​ເຫັນ​ສະພາບ​ການພົ້ນ​ເດັ່ນ ທີ່​ເກີດ​ຂຶ້ນ​ໃນ​ພາກພື້ນ ​ແລະ ສາກົນ ກໍ່ຄື​ໃນ ສປປ ລາວ ພວກ​ເຮົາ ທີ່​ຍັງສືບຕໍ່ຜັນ​ແປ​ຢ່າງ​ສະ​ລັບ​ຊັບຊ້ອນ, ການ​ເກີດ​ໄພພິບັດ​ທຳ​ມະ​ຊາດ, ອິດ​ທິກຳລັງ​ປໍ​ລະ​ປັກ ​ແລະ ພວກ​ກຸ່ມ​ຄົນ​ບໍ່ດີ ຍັງ​ສືບຕໍ່ຍູ້​ແຮງ​ການ​ເຄື່ອນ​ໄຫວ​ທຳລາຍ​ມ້າງ​ເພ ຢ່າງຮອບດ້ານ ດ້ວຍຫຼາຍຮູບ-ຫຼາຍສີ ​ແລະ ​ເລິກ​ແລບ​ກວ່າ​ເກົ່າ.

​ທ່ານ ສອນ​ໄຊ ສີ​ພັນ​ດອນ ຍັງ​ໄດ້​ເນັ້ນ​ໃຫ້​ບັນດາ​ສະຫາຍ​ໃນ​ກຳລັງ​ປະກອບ​ອາວຸດ ຕ້ອງ​ໄດ້​ອອກ​ແຮງ ​ແລະ ສຸມ​ທຸກ​ຄວາມ​ສາມາດ ​ເຂົ້າ​ໃນ​ການຈັດຕັ້ງປະຕິບັດ​ສອງໜ້າທີ່​ຍຸດ​ທະ​ສາດ ​ໃນ​ເງື່ອນ​ໄຂ​ໃໝ່ ຊຶ່ງ​ກ່ອນ​ອື່ນໝົດ, ຕ້ອງ​ເຊີດ​ຊູ​ສະຕິ​ລະວັງ​ຕົວ, ມີ​ສະຕິ​ໃນ​ການ​ປົກ​ປັກ​ຮັກສາ​ແນວທາງ​ນະ​ໂຍບາຍ​ຂອງ​ພັກ ​ແລະ ລັດ, ປົກ​ປັກ​ຮັກສາໝາກຜົນ​ຂອງ​ການ​ປະຕິວັດ, ປົກ​ປັກ​ຮັກສາ​ລະບອບ​ໃໝ່ປະຊາທິປະ​ໄຕ​ປະຊາຊົນ ​ໄວ້ໃຫ້ໝັ້ນຄົງ, ສົມທົບ​ແໜ້ນວຽກງານ ປກຊ-ປກສ ກັບ​ການ​ສ້າງສາ​ພັດທະນາ​ເສດຖະກິດ-​ສັງຄົມ; ຕ້ອງ​ຮັບປະກັນ​ຄວາມ​ຈົ່ງ​ຮັກ​ພັກດີ ຢ່າງ​ສຸດຊຶ້ງ ຕໍ່ພາລະກິດ​ຂອງ​ພັກ ​ແລະ ປະ​ເທດ​ຊາດ ​ໄປ​ພ້ອມໆກັບ​ການ​ປັບປຸງ​ແບບ​ແຜນ​ວິທີ​ເຮັດ​ວຽກ ​ໃຫ້​ມີ​ລັກສະນະ​ປະຕິວັດ​ບຸກ, ມີ​ວິທະຍາສາດ, ​ແທດ​ຕົວ​ຈິງ ​ແລະ ​ໂປ່​ງ​ໃສ, ມີ​ການ​ແບ່ງ​ງານ, ມອບໝາຍຄວາມ​ຮັບຜິດຊອບ​ຢ່າງ​ຈະ​ແຈ້ງ, ສົມທົບ​ຢ່າງ​ກົມກຽວ ລະຫວ່າງ​ບົດບາດ-​ຄວາມ​ສາມາດ​ນຳພາ​ຂອງໝູ່ຄະນະ ກັບບົດບາດ-​ຄວາມ​ສາມາດ​ນຳພາ​ຂອງບຸກຄົນ​ໃນ​ຄະນະ, ​ແບບ​ແຜນ​ນຳພາ ຕ້ອງ​ປະດິດ​ສ້າງ, ກ້າ​ຄິດ, ກ້າ​ເຮັດ ​ແລະ ກ້າ​ຮັບຜິດຊອບ; ຕ້ອງ​ສຸມ​ໃສ່​ຄົ້ນຄວ້າ​ຕອບ​ຕ້ານ ກົນອຸບາຍ​ຫັນປ່ຽນ​ໂດຍ​ສັນຕິ ຂອງ​ບັນດາ​ອິດ​ທິກຳລັງ​ປໍ​ລະ​ປັກ, ປັບປຸງ​ພາຍ​ໃນ​ໃຫ້ໜັກ​ແໜ້ນ, ​ເຂັ້ມ​ແຂງ ​ແລະ ​ເດັດຂາດ; ສືບຕໍ່ປົກ​ປັກ​ຮັກສາ ​ແລະ ​ເສີມ​ຂະຫຍາຍ​ມູນ​ເຊື້ອອັນ​ດີງາມ​ຂອງ​ຕົນ, ຕັ້ງໜ້າປະກອບສ່ວນ​ເຂົ້າ​ໃນ​ການ​ຊ່ວຍ​ເຫຼືອກຳລັງ​ທ້ອງ​ຖິ່ນ​ຢູ່​ຮາກ​ຖານ, ສຸມ​ທຸກ​ເງື່ອນ​ໄຂ​ຄວາມ​ສາມາດ ​ເພື່ອ​ກ້າວ​ໄປ​ເຖິງ​ການ​ກຸ້ມ​ຕົນ​ເອງ​ຢ່າງຮອບດ້ານ ດ້ວຍ​ການ​ສ້າງ​ວຽກງານ​ພະລາທິການ​ກັບ​ທີ່ ​ເປັນວຽກງານ​ຕົ້ນຕໍ ​ແລະ ສືບຕໍ່​ເປີດ​ກວ້າງ​ການ​ພົວພັນ​ສາມັກຄີ​ສາກົນ ຕາມ​ແນວທາງ​ການ​ຕ່າງປະ​ເທດ​ຂອງ​ພັກ. 

ຂໍ້ມູນ:ສນຍ

© ໂຕະນໍ້າຊາຂ່າວ | www.tonamchanews.com
___________

No comments

Powered by Blogger.