Header Ads

ລາວ-ກຳປູເຈຍ ປຶກສາຫາລື ວຽກງານຮັກສາຄວາມສະຫງົບ



ກອງປະຊຸມຮ່ວມມືສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງ ຣາຊະອານາຈັກ ກໍາປູເຈຍ ປະຈໍາ ປີ 2018 ໄດ້ຈັດຂຶ້ນໃນວັນທີ 17 ມັງກອນ 2018 ທີ່ນະຄອນຫລວງວຽງຈັນ, ພາຍໃຕ້ການເປັນປະທານຮ່ວມ ຂອງທ່ານ ພົຕ ສົມ ແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ສົມເດັດ ກຼໍລາໂຣມ ຊໍ ເຄັງ ຮອງນາຍົກລັດຖະມົນຕີ, ລັດຖະມົນຕີກະຊວງພາຍໃນ ແຫ່ງ ຣາຊະອານາຈັກ ກໍາປູເຈຍ.

ໃນກອງປະຊຸມຄັ້ງນີ້, ຄະນະຜູ້ແທນທັງສອງຝ່າຍ ໄດ້ຜັດປ່ຽນກັນແຈ້ງສະພາບ ແລະ ທົບທວນ ຄືນຜົນການຈັດຕັ້ງປະຕິບັດບົດບັນທຶກການຮ່ວມມື ລະຫວ່າງສອງກະຊວງປະຈໍາ ປີ 2017 ທີ່ຜ່ານມາ ແລະ ພ້ອມກັນປຶກສາຫາລືແລກປ່ຽນຄໍາຄິດຄໍາເຫັນ ເຊິ່ງກັນ ແລະ ກັນ ຢ່າງກົງໄປກົງມາ ໃນຫລາຍ ດ້ານ ເປັນຕົ້ນ ແມ່ນການຮ່ວມມືດ້ານການຮັກສາຄວາມສະຫງົບ ແລະ ຄວາມເປັນລະບຽບຮຽບຮ້ອຍ ຕາມຊາຍ ແດນ, ການກວດກາ ແລະ ຄວບຄຸມຢາເສບຕິດ, ການຕ້ານການ ຄ້າມະນຸດ, ການອໍານວຍຄວາມສະດວກ ແລະ ຄວາມເປັນລະບຽບຮຽບຮ້ອຍ ໃນການເຂົ້າ-ອອກເມືອງ, ການແລກປ່ຽນຢ້ຽມຢາມຄະນະຜູ້ແທນ ເຊິ່ງກັນ ແລະ ກັນ, ການຮ່ວມມືດ້ານການ ກໍ່ສ້າງກໍາລັງ ແລະ ການຮ່ວມມືດ້ານອື່ນໆ.
ສໍາລັບການຮ່ວມມືດ້ານການກວດກາ ແລະ ຄວບຄຸມ ຢາເສບຕິດໃນໄລຍະຜ່ານມາ ໜ່ວຍງານທີ່ກ່ຽວຂ້ອງຂອງທັງສອງຝ່າຍທັງລະດັບສູນກາງ ແລະ ທ້ອງ ຖິ່ນ ໄດ້ພ້ອມກັນຈັດຕັ້ງປະຕິບັດຕາມບົດບັນທຶກວ່າດ້ວຍການຮ່ວມມືກວດກາ ແລະ ຄວບຄຸມຢາເສບ ຕິດ ທີ່ສອງຝ່າຍໄດ້ລົງນາມຮ່ວມກັນໄດ້ດີພໍສົມຄວນ ເຈົ້າໜ້າທີ່ປາບປາມຢາເສບຕິດລະດັບແຂວງ ແລະ ເມືອງ ໄດ້ມີການແລກປ່ຽນຂໍ້ມູນຂ່າວສານ ປະສານງານ ແລະ ຮ່ວມມືກັນໃນການປ້ອງກັນ ສະ ກັດກັ້ນກຸ່ມຄົນບໍ່ດີເຄື່ອນໄຫວຂົນສົ່ງ ແລະ ຄ້າຂາຍຢາເສບຕິດ ຢູ່ບໍລິເວນຊາຍແດນ ສາມາດຈັບກຸມ ເປົ້າໝາຍທີ່ມີການເຄື່ອນໄຫວກະທໍາຜິດ ມາດໍາເນີນຄະດີ ຕາມລະບຽບກົດໝາຍໄດ້ຈໍານວນໜຶ່ງ.
ຜ່ານການຮ່ວມມືກັນ ທັງສອງຝ່າຍສາມາດປະກອບສ່ວນເຮັດໃຫ້ສາຍພົວພັນ ມິດຕະພ
າບຖານບ້ານໃກ້ເຮືອນຄຽງທີ່ດີຕໍ່ກັນ ລະຫວ່າງສອງຊາດ ກໍຄື ປະຊາຊົນສອງປະເທດ ນັບມື້ນັບແໜ້ນແຟ້ນ ສອງກໍາລັງຕໍາຫລວດ ລາວ-ກໍາປູເຈຍ ສາມາດຮັກສາຄວາມສະຫງົບ ຄວາມເປັນລະບຽບຮຽບຮ້ອຍ ແລະ ຄວາມໝັ້ນຄົງຂອງຊາດ ເຮັດໃຫ້ຊາຍແດນ ລະຫວ່າງສອງປະເທດ ເປັນເສັ້ນຊາຍແດນແຫ່ງສັນຕິພາບ, ມິດຕະພາບ ແລະ ຮັກສາຄວາມປອດໄພ ໃຫ້ປະຊາຊົນສອງປະເທດສາມາດໄປມາຫາສູ່ກັນໄດ້ຢ່າງສະດວກສະບາຍ.

ໂອກາດດຽວກັນ, ທັງສອງຝ່າຍຍັງໄດ້ເອກະພາບກັນຮັບຮອງ ແລະ ລົງນາມໃນບົດບັນທຶກວ່າດ້ວຍການຮ່ວມມື ລະຫວ່າງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງພາຍໃນ ແຫ່ງ ຣາຊະອານາຈັກ ກໍາປູເຈຍ ປະຈໍາປີ 2018, ຝ່າຍລາວ ລົງນາມໂດຍທ່ານ ພົຕ ສົມແກ້ວ ສີລາວົງ ລັດຖະມົນຕີກະຊວງປ້ອງກັນຄວາມສະຫງົບ ແລະ ຝ່າຍກໍາປູເຈຍ ລົງນາມໂດຍ ສົມເດັດ ກຼໍລາໂຣມ ຊໍ ເຄັງ ຮອງນາຍົກລັດຖະມົນຕີ ລັດຖະມົນຕີກະຊວງພາຍໃນ ກໍາປູເຈຍ. 

ທັງສອງຝ່າຍໄດ້ເປັນເອກະພາບກັນໃນບົດບັນທຶກ, ໂດຍຈະພ້ອມກັນນໍາເອົາເນື້ອໃນຈິດໃຈຂອງບົດບັນທຶກ ໄປຈັດຕັ້ງປະຕິບັດໃຫ້ເປັນຮູບປະທໍາຫລາຍຂຶ້ນກວ່າເກົ່າ ເພື່ອຜົນປະໂຫຍດລວມຂອງປະຊາຊົນສອງຊາດ ແລະ ເສີມຂະຫຍາຍສາຍພົວພັນມິດຕະພາບ ການຮ່ວມມືລະ ຫວ່າງສອງປະເທດ ລາວ-ກໍາປູເຈຍ, ກໍາປູເຈຍ-ລາວ ໃຫ້ນັບມື້ນັບດີຂຶ້ນຢ່າງບໍ່ຢຸດຢັ້ງ. 

ພາບ ແລະ ຂ່າວ: ຂປລ 

© ໂຕະນໍ້າຊາຂ່າວ | www.tonamchanews.com 
___________

No comments

Powered by Blogger.