Header Ads

ໄຂກອງປະຊຸມລັດຖະບານສະໄໝວິສາມັນ ປະຈໍາເດືອນ ກຸມພາ 2018 ຢ່າງເປັນທາງການ



ກອງປະຊຸມລັດຖະບານ ສະໄໝວິສາມັນ ປະຈໍາເດືອນ ກຸມພາ 2018 ໄດ້ໄຂຂຶ້ນຢ່າງເປັນທາງການ ໃນຕອນເຊົ້າຂອງວັນທີ 8 ກຸມພາ ຢູ່ທີ່ ສໍານັກງານນາຍົກລັດຖະມົນຕີ, ພາຍໃຕ້ການເປັນປະທານຂອງ ທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ ແລະ ສະມາຊິກລັດຖະບານ ເຂົ້າຮ່ວມຢ່າງພ້ອມພຽງ.



ຜູ້ເຂົ້າຮ່ວມກອງປະຊຸມ ຈະໄດ້ພ້ອມກັນຄົ້ນຄວ້າ ແລະ ພິຈາລະນາຮັບຮອງເອົາ ບັນດາຮ່າງກົດໜາຍສ້າງໃໝ່ ແລະ ປັບປຸງຈໍານວນ 10 ສະບັບ ເພື່ອຈະນໍາສະເໜີຜ່ານກອງປະຊຸມສະໄໝສາມັນເທື່ອທີ V ຂອງສະພາແຫ່ງຊາດ ຊຸດທີ 8 ທີ່ຈະຈັດຂຶ້ນໃນເດືອນ ເມສາ 2018 ທີ່ຈະມາເຖິງນີ້, ກອງປະຊຸມຄັ້ງນີ້ ບັນດາຂະແໜງການກ່ຽວຂ້ອງ ໄດ້ກະກຽມບັນດາຮ່າງກົດໝາຍ ເພື່ອນໍາສະເໜີຕໍ່ກອງປະຊຸມ ເພື່ອພິຈາລະນາຮັບຮອງ ເປັນຕົ້ນ:

1. ຮ່າງກົດໝາຍ ວ່າດ້ວຍການຄຸ້ມຄອງໜີ້ສິນສາທາລະນະ;
2. ຮ່າງກົດໝາຍ ວ່າດ້ວຍອາກອນມູນຄ່າເພີ່ມ ສະບັບປັບປຸງ;
3. ຮ່າງກົດໝາຍ ວ່າດ້ວຍທະນາຄານແຫ່ງ ສປປ ລາວ ສະບັບປັບປຸງ;
4. ຮ່າງກົດໝາຍ ວ່າດ້ວຍຂໍ້ຂັດແຍ່ງທາງດ້ານເສດຖະກິດ;
5. ຮ່າງກົດໝາຍ ວ່າດ້ວຍປະກັນສັງຄົມສະບັບປັບປຸງ;
6. ຮ່າງກົດໝາຍ ວ່າດ້ວຍປ້າຍ;
7. ຮ່າງກົດໝາຍ ວ່າດ້ວຍການບິນພົນລະເຮືອນ;
8. ຮ່າງກົດໝາຍ ວ່າດ້ວຍແນວລາວສ້າງຊາດ ສະບັບປັບປຸງ;
9. ຮ່າງກົດໝາຍ ວ່າດ້ວຍສະຫະພັນນັກຮົບເກົ່າ;
10. ຮ່າງກົດໝາຍ ວ່າດ້ວຍນາຍທະຫານກອງທັບປະຊາຊົນລາວ ສະບັບປັບປຸງ.
ສຳລັບກອງປະຊຸມລັດຖະບານ ສະໄໝວິສາມັນເທື່ອນີ້ ຈະໄດ້ດຳເນີນເປັນເວລາ 02 ວັນ ຄື: ວັນທີ 08-09 ກຸມພາ 2018.


ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ 
© ໂຕະນໍ້າຊາຂ່າວ | www.tonamchanews.com 
___________

No comments

Powered by Blogger.