Header Ads

ທ່ານ ສອນໄຊ ສີພັນດອນ ເຄື່ອນໄຫວຢ້ຽມຢາມ 2 ເມືອງຂອງແຂວງຫຼວງພະບາງ





ໃນວັນທີ 17 ກຸມພາ 2018 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ເດີນທາງໄປເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງພູຄູນ ແລະ ເມືອງນ້ຳບາກ ແຂວງຫຼວງພະບາງ ເຊິ່ງມີ ທ່ານ ຄຳຂັນ ຈັນທະວີສຸກ ເຈົ້າແຂວງໆຫຼວງພະບາງ ພ້ອມດ້ວຍບັນດາພະແນກການທີ່ກ່ຽວຂ້ອງ, ຄະນະພັກ-ຄະນະນຳເມືອງ ແລະ ປະຊາຊົນຂອງສອງເມືອງດັ່ງກ່າວ ໃຫ້ການຕ້ອນຮັບຢ່າງອົບອຸ່ນ.



ໃນການມາເຄື່ອນໄຫວຢ້ຽມຢາມ ແລະ ເຮັດວຽກ ຢູ່ເມືອງພູຄູນ ແມ່ນເພື່ອຕິດຕາມຊຸກຍູ້ການພັດທະນາເສດຖະກິດ-ສັງຄົມຂອງເມືອງ ແລະ ການກະກຽມໂຄງການປັບປຸງ-ຂະຫຍາຍເທດສະບານເມືອງພູຄູນ ເຊິ່ງເປັນເມືອງໜຶ່ງ ທີ່ເປັນເຂດທີ່ໝັ້ນຂອງການປະຕິວັດ ແລະ ເປັນເຂດຍຸດທະສາດ ທີ່ມີການຍາດແຍ່ງກັນຢ່າງດຸເດືອດ ໃນໄລຍະກຽມປົດປ່ອຍບັ້ນຮົບສາລາພູຄູນ ປີ 1971-73 ແລະ ປະກາດສ້າງຕັ້ງເປັນເມືອງພູຄູນ ໃນວັນທີ 10 ຕຸລາ 1990 ປະກອບດ້ວຍ 40 ບ້ານ, ມີພົນລະເມືອງ 25 ພັນກວ່າຄົນ 4.260 ຄອບຄົວ, ມີອັດຕາການຂະຫຍາຍຕົວທາງດ້ານເສດຖະກິດໃນລະດັບ 9%, ລວມຍອດຜະລິດຕະພັນພາຍໃນ(GDP) 287 ກວ່າຕື້ກີບ, ສະເລ່ຍລາຍຮັບ 11.395.000 ກີບ(1.385 ໂດລາສະຫະລັດ)ຕໍ່ຄົນຕໍ່ປີ, ປະຈຸບັນ, ທົ່ວເມືອງພູຄູນ ຍັງມີຄອບຄົວທຸກຍາກ 110 ຄອບຄົວ ເທົ່າກັບ 2,6% ຂອງຄອບຄົວທັງໝົດ. ສໍາລັບໂຄງການປັບປຸງ ແລະ ຂະຫຍາຍເທດສະບານເມືອງພູຄູນ ແມ່ນເນື່ອງຈາກວ່າ ສຳນັກເມືອງຕັ້ງຢູ່ເຂດສາມແຍກພູຄູນ ທີ່ເປັນພື້ນທີ່ສູງຊັນ, ຄັບແຄບ, ມີຫ້ວຍຮ່ອງເລິກ, ປະຊາຊົນຕັ້ງເຮືອນຢູ່ລຽບຕາມສອງຟາກຂອງທາງຫຼວງແຫ່ງຊາດເລກທີ 13 ເໜືອ ແລະ ທາງຫຼວງເລກ 7. ດັ່ງນັ້ນ, ຕາມການຕົກລົງຂອງກອງປະຊຸມກົມການເມືອງຮ່ວມກັບຄະນະເລຂາທິການສູນກາງພັກ, ຫ້ອງວ່າການສູນກາງພັກ ຈຶ່ງໄດ້ມີແຈ້ງການເລກທີ 704 ລົງວັນທີ 21 ທັນວາ 2012 ເຫັນດີໃຫ້ຍົກຍ້າຍສຳນັກເມືອງພູຄູນ ໄປຢູ່ບ່ອນທີ່ມີເງື່ອນໄຂເໝາະສົມ ເພື່ອສ້າງເມືອງພູຄູນ ໃຫ້ກາຍເປັນເມືອງອັນດັບໜຶ່ງ ໃນບັນດາເມືອງພູດອຍໃນທົ່ວປະເທດ. ປະຈຸບັນ, ໄດ້ກໍານົດເອົາເຂດລ້ອງສະງື່ມ ເປັນເຂດຈັດຕັ້ງປະຕິບັດໂຄງການ ໃນເນື້ອທີ່ສຳຫຼວດ 3,6 ພັນເຮັກຕາ ລວມມູນຄ່າກວ່າ 1.715 ຕື້ກີບ.


ໂອກາດນີ້, ທ່ານ ສອນໄຊ ສີພັນດອນ ກໍ່ໄດ້ມອບເຄື່ອງຊ່ວຍເຫຼືອປະເພດເຄື່ອງນຸ່ງຮົ່ມ, ອຸປະກອບການສຶກສາ, ເຄື່ອງອຸປະໂພກ-ບໍລິໂພກ ແລະ ຄອມພິວເຕີ້ ພ້ອມເງິນ 50 ລ້ານກີບ ທີ່ເປັນການປຸກລະດົມຈາກພາກສ່ວນເສດຖະກິດເອກະຊົນ ໃຫ້ແກ່ອຳນາດການປົກຄອງເມືອງ ເພື່ອປະກອບສ່ວນເຂົ້າໃນວຽກງານບັນເທົາທຸກພາຍໃນເມືອງ. ພ້ອມນີ້, ທ່ານຮອງນາຍົກລັດຖະມົນຕີ ກໍ່ໄດ້ເນັ້ນໃຫ້ເຫັນເຖິງຄວາມຈຳເປັນຂອງການຍົກຍ້າຍເທດສະບານໃໝ່ຂອງເມືອງພູຄູນ ເພື່ອການພັດທະນາໃນໄລຍະໃໝ່. ພ້ອມນີ້, ເພື່ອເປັນທິດທາງໃນການພັດທະນາເສດຖະກິດຂອງເມືອງ ທ່ານຍັງໄດ້ເນັ້ນໃຫ້ເອົາໃຈໃສ່ໃນການປູກ-ການລ້ຽງ ທີ່ຕອບສະໜອງໄດ້ຄວາມຮຽກຮ້ອງຕ້ອງການຂອງຕະຫຼາດ ແລະ ສາມາດສ້າງລາຍຮັບ ໃຫ້ແກ່ພໍ່ແມ່ປະຊາຊົນ ໄດ້ຢ່າງແທ້ຈິງ ໂດຍດຶງເອົາທ່າແຮງຈາກພາກເອກະຊົນ ໃຫ້ມີສ່ວນຮ່ວມໃນການພັດທະນາ.



ໃນຕອນບ່າຍຂອງວັນດຽວກັນ, ທ່ານຮອງນາຍົກລັດຖະມົນຕີ ພ້ອມດ້ວຍຄະນະ ກໍ່ໄດ້ເດີນທາງໄປຢ້ຽມຢາມ ແລະ ພົບປະ ອໍານາການປົກຄອງເມືອງ ແລະ ພໍ່ແມ່ປະຊາຊົນຊາວເມືອງນ້ຳບາກ ເຊິ່ງເປັນອີກເມືອງພູດອຍໜຶ່ງຂອງແຂວງຫຼວງພະບາງ ກວມ 75% ປະກອບມີ 83 ບ້ານ, ມີພົນລະເມືອງ 68 ພັນກວ່າຄົນ 12 ພັນກວ່າຄອບຄົວ, ສ່ວນໃຫຍ່ຖືເອົາອາຊີບການປູກຝັງ ແລະ ລ້ຽງສັດ ເປັນຕົ້ນຕໍ, ມີອັດຕາການຂະຫຍາຍຕົວທາງດ້ານເສດຖະກິດໃນລະດັບ 8,52%, ລວມຍອດຜະລິດຕະພັນພາຍໃນ(GDP) 1.045 ກວ່າຕື້ກີບ, ສະເລ່ຍລາຍຮັບ 15 ລ້ານກວ່າກີບ(1.902 ໂດລາສະຫະລັດ)ຕໍ່ຄົນຕໍ່ປີ, ປະຈຸບັນ, ຍັງມີຄອບຄົວທຸກຍາກກວມ 2,6% ຂອງຄອບຄົວທັງໝົດ. ໂອກາດນີ້, ທ່ານຮອງນາຍົກລັດຖະມົນຕີ ກໍ່ໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນງານ ແລະ ຜົນສຳເລັດ ທີ່ຄະນະພັກ-ອຳນາດການປົກຄອງ ແລະ ຊາວເມືອງນ້ຳບາກ ຍາດມາໄດ້ໃນໄລຍະຜ່ານມາ. ພ້ອມນີ້, ອີງໃສ່ຄາດໝາຍສູ້ຊົນຂອງມະຕິກອງປະຊຸມໃຫຍ່ ຄັ້ງທີ X ຂອງພັກ ກໍ່ຄືແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ທ່ານຍັງໄດ້ເນັ້ນໃຫ້ອຳນາດການປົກຄອງເມືອງ ຕ້ອງໄດ້ສືບຕໍ່ແກ້ໄຂຄວາມທຸກຍາກຂອງປະຊາຊົນ ທີ່ນອນຢູ່ໃນເປົ້າໝາຍການພັດທະນາແບບຍືນຍົງ(SDGs) ໂດຍສະເພາະ ແມ່ນໃຫ້ກວດເບິ່ງຄືນບັນດາເນື້ອໃນ ແລະ ມາດຖານ ທີ່ໄດ້ກຳນົດອອກມາໃນໄລຍະໃໝ່ ລວມເຖິງການຈັດຕັ້ງປະຕິບັດບັນດາດັດຊະນີໝາຍຕ່າງໆ, ສືບຕໍ່ຮັກສາຄວາມສະຫງົບ ໃຫ້ມີຄວາມໜັກແໜ້ນເຂັ້ມແຂງ, ສຸມໃສ່ແກ້ໄຂບັນຫາສິ່ງຫຍໍ້ທໍ້ໃນສັງຄົມ, ເອົາໃຈໃສ່ຄຸ້ມຄອງແຮງງານຕ່າງປະເທດ, ຄຸ້ມຄອງການລົງທຶນ ແລະ ການສ້າງຕັ້ງກຸ່ມການຜະລິດ ທີ່ຕອບສະໜອງໃຫ້ແກ່ຄວາມຕ້ອງການຂອງຕະຫຼາດ, ກວດກາຄືນການປັບປຸງຫົງຈັກລັດ ແລະ ຄວມຄືບໜ້າຂອງການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກ ກໍ່ຄືແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ VIII ເພື່ອກຳນົດທິດທາງແຜນການໃນຕໍ່ໜ້າ.


ນອກຈາກນີ້, ທ່ານ ສອນໄຊ ສີພັນດອນ ແລະ ຄະນະ ຍັງໄດ້ໄປຢ້ຽມຊົມຈຸດທີ່ຈະກໍ່ສ້າງຂົວອູ່ ທີ່ບ້ານຟ້າ ຫາ ບ້ານໂຄ້ງ ເມືອງນ້ຳບາກ ເຊິ່ງເປັນຂົວທີ່ມີຄວາມກວ້າງປະມານ 2 ແມັດ, ຍາວ 120 ແມັດ ຄິດເປັນມູນຄ່າ 1,2 ຕື້ກວ່າກີບ ໂດຍແມ່ນທຶນຊ່ວຍເຫຼືອຈາກບໍລິສັດ ປີໂຕຣລ້ຽມເທຣດດິ້ງລາວ ມະຫາຊົນ ຊຶ່ງຈະສ້າງຂຶ້ນ ເພື່ອອຳນວຍຄວາມສະດວກໃຫ້ແກ່ບັນດານ້ອງນ້ອຍນັກຮຽນຈາກບ້ານໂຄ້ງ ເພື່ອເດີນຂ້າມນ້ຳທາງໄປໂຮງຮຽນໄດ້ສະດວກສະບາຍຂຶ້ນ ແລະ ຮອງຮັບໃຫ້ແກ່ການສັນຈອນໄປມາຂອງພໍ່ແມ່ປະຊາຊົນຂອງສອງບ້ານ ແລະ ພາຫະນະຂະໜາດນ້ອຍຈຳນວນໜຶ່ງ.

ຂ່າວ ແລະ ພາບ: ສນຍ 
© ໂຕະນໍ້າຊາຂ່າວ | www.tonamchanews.com 


___________

No comments

Powered by Blogger.