Header Ads

ເຈົ້າແຂວງຫຼວງພະບາງຢ້ຽມຢາມໂຄງການກໍ່ສ້າງບ້ານຈັດສັນຂອງເຂື່ອນໄຟຟ້ານໍ້າອູ 3





ແຂວງຫຼວງພະບາງ :  ໃນກາງເດືອນ ກຸມພາ 2018 ຜ່ານນີ້ ທ່ານ ຄໍາຂັນ ຈັນທະວີສຸກ ກໍາມະການສູນກາງພັກ,ເລຂາພັກແຂວງ,ເຈົ້າແຂວງຫຼວງພະບາງ ແລະ ທ່ານ ລັດຕະນະໄຊ ຄໍາສີດາ ເລຂາພັກເມືອງ,ເຈົ້າເມືອງງອຍ ,ມີຄະນະປະຈໍາພັກແຂວງ,ກໍາມະການພັກແຂວງ ໄດ້ໄປຢ້ຽມຢາມຂົງເຂດບ້ານຈັດສັນ ທີ່ໄດ້ຮັບຜົນກະທົບຈາກການກໍ່ສ້າງເຂື່ອນໄຟຟ້ານໍ້າອູ,ໃນນັ້ນມີບ້ານທີ່ໄດ້ຮັບຜົນກະທົບຢູ່ເຂື່ອນນໍ້າອູ 3 ເມືອງງອຍມີ 4 ບ້ານ,ມີ 1.069 ຄອບຄົວ ແລະ ສິ່ງແວດລ້ອມຂອງບ້ານ 16 ລາຍການ ແລະ ໄດ້ຮັບການຊົດແລ້ວທັງໝົດລວມ 76.800.000.000 ກີບ,ໃນນັ້ນຍັງມີ 20 ຄອບຄົວໃນ 4 ບ້ານບໍ່ທັນຮັບຮອງການເກັບຂໍ້ມູນ ແລະ ຍັງບໍ່ທັນຮັບການຊົດເຊີຍ,ຍັງຢູ່ໃນຊ່ວງເກັບກໍາຂໍ້ມູນ.








ທ່ານ ອາຟ່າງ ຕາງໜ້າຄະນະຮັບຜິດຊອບໂຄງການເຂື່ອນໄຟຟ້ານໍ້າອູ ໄດ້ກ່າວ່າ: ການກະກຽມຍົກຍ້າຍປະຊາຊົນທີ່ຖືກຜົນກະທົບ ໂຄງການກໍ່ສ້າງ ເຂື່ອນໄຟຟ້ານ້ຳອູ 3 ມີປະຊາຊົນ ຖືກຜົນກະທົບທັງໝົດ 18 ບ້ານ, ໃນນີ້ 13 ບ້ານຢູ່ເມືອງຂວາ, 1 ບ້ານຂອງເມືອງໃໝ່ ແຂວງຜົ້ງສາລີ ແລະ 4 ບ້ານຂອງເມືອງງອຍ. ສະເພາະເມືອງງອຍ ປະຈຸບັນຜູ້ຮັບຜິດຊອບໂຄງການ ໄດ້ດຳເນີນການກໍ່ສ້າງບ້ານຈັດສັນໃໝ່ຈຳນວນ 4 ຈຸດຄື: ບ້ານຫາດຂາມ 72 ຫຼັງຄາ, ບ້ານສົບຂີງ 86 ຫຼັງຄາ, ບ້ານໂພນຊະນະ 50 ຫຼັງຄາ ແລະ ບ້ານຫາດສາ 75 ຫຼັງຄາ, ມີທັງໝົດ 311 ຄອບຄົວ, ສຳລັບການກໍ່ສ້າງຕົວຈີງ ແມ່ນມີປະຊາຊົນກໍ່ສ້າງເອງ ແລະ ໂຄງການກໍ່ສ້າງໃຫ້ ຕາມການສະເໜີຂອງປະຊາຊົນ ຄາດວ່າການຍົກຍ້າຍຈັດສັນ ຈະໃຫ້ສຳເລັດໃນປີ 2019.







ທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ ກໍໄດ້ເນັ້ນໜັກໃຫ້ຜູ້ຮັບຜິຊອບໂຄງການ ຈົ່ງຮີບຮ້ອນໃນການກໍ່ສ້າງບ້ານຈັດສັນໃຫ້ສຳເລັດ,ສືບຕໍ່ມອບເງີນຄ່າຊົດເຊີຍໃຫ້ກັບປະຊາຊົນ ຕາມສັນຍາທີ່ໄດ້ກຳນົດໄວ້, ສ່ວນພາກລັດ ຈະສ້າງສີ່ງອຳນວຍຄວາມສະດວກ ດ້ານການພົວພັນຮ່ວມມື ແລະ ປະສານສົມທົບວຽກງານທີ່ປີ່ນອ້ອມ ເພື່ອເຮັດໃຫ້ໂຄງການກໍ່ສ້າງ ໄດ້ດຳເນີນຕາມແຜນການທີ່ກຳນົດໄວ້, ທ່ານເຈົ້າແຂວງຫຼວງພະບາງ ກ່າວຕື່ມວ່າ: ການຍົກຍ້າຍປະຊາຊົນທີ່ຖືກຜົນກະທົບນັ້ນ ຂໍໃຫ້ຜູ້ຮັບຜິດຊອບໂຄງການຄຳນືງເຖີງການພັດທະນາຊີວິດການເປັນຢູ່ຂອງປະຊາຊົນ ຈາກບ່ອນເກົ່າໄປຢູ່ບ່ອນໃໝ່ທີ່ດີກວ່າເກົ່າ.ໂອກາດນີ້ ທ່ານ ຄຳຂັນ ຈັນທະວີສຸກ ກໍໄດ້ອວຍພອນບຸນປີໃໝ່ຂອງຊາວຈີນ ໃຫ້ຄະນະຮັບຜິດຊອບໂຄງການ ກໍ່ຄືປະຊາຊົນຊາວຈີນທຸກຄົນ ຈົ່ງມີສຸຂະພາບແຂງແຮງ ມີຜົນສຳເລັດໃນການດຳລົງຊີວິດ ດ້ານການງານ, ການເງີນ ທັງສ່ວນຕົວ ແລະ ສ່ວນລວມ ປະກອບສ່ວນຮັດແໜ້ນສາຍພົວພັນຮ່ວມມື ລະຫວ່າງ ຈີນ-ລາວ, ລາວ-ຈີນ ໃຫ້ແໜ້ນແຟ້ນຍີ່ງໆ ຂື້ນ.







ພາບ ແລະ ຂ່າວ: ເພັດສາຄອນ ສິມມະວົງ

© ໂຕະນໍ້າຊາຂ່າວ | www.tonamchanews.com 
___________


No comments

Powered by Blogger.