Header Ads

ນາຍົກ ເນັ້ນໃຫ້ຄະນະນຳກະຊວງ ຖວທ ຕ້ອງກຳແໜ້ນທ່າອ່ຽງ ລວມຂອງຍຸກສະໄໝ



ທ່ານ ທອງລຸນ ສີສຸລິດ ນາຍົກລັດຖະມົນຕີ ແຫ່ງ ສປປ ລາວ ໄດ້ເນັ້ນໃຫ້ຄະນະພັກ, ຄະນະນຳ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ຕ້ອງໄດ້ສືບຕໍ່ເອົາໃຈໃສ່ກຳແໜ້ນ ທ່າອ່ຽງລວມຂອງຍຸກສະໄໝ ແລະ ສະພາບ ແວດລ້ອມສາກົນ ກໍຄື ພາກພື້ນທີ່ຈະຍັງສືບຕໍ່ຜັນແປ ໄປຢ່າງສະຫລັບຊັບຊ້ອນ ແລະ ຫລາຍບັນຫາ ທີ່ຄາດຄະເນໄດ້ຍາກ ເພື່ອຕອບສະໜອງ ກັບຄວາມຮຽກຮ້ອງຕ້ອງການ ໃນໄລຍະໃໝ່ ຂອງວຽກງານ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ໃນຊຸມປີຕໍ່ໜ້າ.



ທ່ານ ນາຍົກລັດຖະມົນຕີ ໄດ້ໂອ້ລົມ ຕໍ່ກອງປະຊຸມວຽກງານ ຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທົ່ວປະເທດ ທີ່ໄດ້ໄຂຂຶ້ນ ຢ່າງເປັນທາງການ ໃນວັນທີ 16 ກຸມພາ 2018 ທີ່ນະຄອນຫລວງວຽງຈັນ, ພາຍໃຕ້ການ ເປັນປະທານຂອງ ທ່ານ ບໍ່ແສງຄຳ ວົງດາລາ ລັດຖະມົນຕີ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ໂດຍມີ ທ່ານຮອງລັດຖະມົນຕີ, ຫົວໜ້າກົມ, ຜູ້ແທນຈາກບັນດາ ພະແນກຖະແຫລງຂ່າວ, ວັດທະນະທຳ ແລະ ທ່ອງທ່ຽວ ທົ່ວປະເທດ ແລະ ພາກສ່ວນທີ່ກ່ຽວ ຂ້ອງ ເຂົ້າຮ່ວມ.



ພ້ອມກັນນັ້ນ, ກໍເນັ້ນໃຫ້ ກຳເອົາກາລະໂອກາດ ຈາກຄວາມກ້າວໜ້າ ທາງດ້ານວິທະຍາສາດ ແລະ ເຕັກໂນໂລຊີໃໝ່ ທີ່ທັນສະໄໝ ແລະ ເສີມຂະຫຍາຍ ທ່າແຮງບົ່ມຊ້ອນ ນຳໃຊ້ກຳລັງແຮງ ພາຍໃນ ແລະ ພາຍນອກ, ເຊີດຊູສະຕິຄວາມຮັບຜິດຊອບ ຕໍ່ໜ້າທີ່ວຽກງານໃຫ້ສູງຂຶ້ນ ເພື່ອຊີ້ນຳນຳພາ ການປະຕິບັດບັນດາຄາດໝາຍສູ້ຊົນ ແຜນພັດທະນາວຽກງານ ຖວທ ຂອງປີ 2018 ແລະ ແຜນ 5 ປີ (2016-2020) ໃຫ້ມີຜົນສຳເລັດ. ນອກຈາກນັ້ນ, ປັບປຸງ ລະບົບກົງຈັກການຈັດຕັ້ງ ຢູ່ສູນກາງ ແລະ ທ້ອງຖິ່ນ ໃຫ້ສອດຄ່ອງ ເຂົ້າກັບວຽກງານຕົວຈິງ ໃນໄລຍະໄໝ່, ບໍ່ຄວນຢຶດຕິດ ແຕ່ຮູບແບບເກົ່າ ແບບດັ່ງເດີມ ທີ່ຈັດຕັ້ງ ປະຕິບັດຜ່ານມາ, ຄວນກະທັດຮັດ ເນັ້ນປະສິດທິພາບ-ປະສິດທິຜົນ, ເຂັ້ມແຂງ ຮູ້ເຮັດວຽກຮອບດ້ານ, ຮູ້ວິຊາສະເພາະຂອງຕົນ ຢ່າງເລິກເຊິ່ງ-ເຮັດວຽກດ້ວຍຄວາມຮັບຜິດຊອບ ແລະ ປະດິດສ້າງ ເພື່ອຊອກຫາອັນໃໝ່ ໃຫ້ທັນກັບສະພາບການ ແຫ່ງການປະຕິວັດ.



ບຸກຄະລາກອນ ຕ້ອງກຳແໜ້ນ ແນວທາງນະໂຍບາຍຂອງພັກ ຮູ້ນຳໃຊ້ ຄວາມຮູ້ຄວາມສາມາດ ເຂົ້າໃນການປະຕິບັດໜ້າທີ່ ໄປຕາມແນວທາງ, ຊອກໃຫ້ເຫັນ ແລະ ສ້າງໃຫ້ໄດ້ ຜູ້ທີ່ມີພອນສະຫວັນ ຂອງແຕ່ລະດ້ານ. ພ້ອມນັ້ນ, ຕ້ອງໄດ້ເພີ່ມທະວີ ໃນການສ້າງພະນັກງານນຳ, ສ້າງພະນັກງານສືບທອດ, ຫັນເປັນໜຸ່ມ ແຕ່ໃຫ້ມີຄວາມຮູ້ຄວາມສາມາດ ທີ່ແທ້ຈິງ ສາມາດຕອບສະໜອງໄດ້ ຕາມຄວາມຮຽກຮ້ອງຕ້ອງການ ຂອງວຽກງານໃນ ໄລຍະໃໝ່ ແລະ ສືບທອບພາລະກິດສຳຄັນນີ້ ໄປເລື້ອຍໆ. ໃນຍຸກສະໄໝ ທີ່ໂລກຫັນໄປສູ່ລະບົບເຕັກໂນໂລຊີ ທີ່ທັນສະໄໝ ບັນດາຄະນະພັກ, ຄະນະນໍາກະຊວງ ກໍຕ້ອງພະຍາຍາມ ຫັນການຄຸ້ມຄອງບໍລິຫານ ວຽກງານໄປສູ່ການນຳໃຊ້ເຕັກໂນໂລຊີ ທີ່ທັນສະໃໝ ເພື່ອຄວາມສະດວກ ໃນການຄຸ້ມຄອງບໍລິຫານວຽກງານ ໃຫ້ເປັນລະບົບ, ມີຄວາມໂປ່ງໃສ ແລະ ສາມາດກວດສອບໄດ້.

ທ່ານ ນາຍົກລັດຖະມົນຕີ ກ່າວຕື່ມວ່າ: ພວກສະຫາຍ ຕ້ອງໃຫ້ປະຊາຊົນເຮົາ, ສັງຄົມເຮົາບໍລິໂພກ ແລະ ເສບຂ່າວແບບໃດ ເຂົ້າໃນສະໝອງ ຂອງຄົນເຮົາໃຫ້ດີທີ່ສຸດ, ປອດໄພທີ່ສຸດ, ຕ້ອງໃຫ້ຜູ້ບໍລິໂພກຂ່າວ ເລືອກໃຊ້ສື່ຂອງພວກເຮົາ, ຂ່າວຂອງພວກເຮົາ ຕ້ອງເປັນຫລັກຮູ້ສົມທຽບ ຮູ້ຊັ່ງຊາ, ຮູ້ອັນຖືກອັນຜິດ ແລະ ຂ່າວ ຂອງສື່ພວກເຮົາ ຕ້ອງກາຍເປັນ ຜູ້ນຳພາຄວາມຄິດຂອງຄົນຂອງ ສັງຄົມ, ຂອງໄວໜຸ່ມເຮົາ ໄປສູ່ຄວາມກ້າວໜ້າ ໃຫ້ມີພູມຕ້ານທານ ກັບສິ່ງຫຍໍ້ທໍ້ຕ່າງໆ ໃຫ້ໄດ້. ນີ້ຄື ພາລະກິດທີ່ທ້າທາຍໜັກໜ່ວງ ຂອງບັນດາສະຫາຍຜູ້ຊີ້ນຳ, ຜູ້ບໍລິຫານ ທີ່ເປັນເສນາທິການໃຫ້ແກ່ພັກ, ລັດຖະບານເຮົາ ເພື່ອຮັບໃຊ້ພາລະກິດ ປົກປັກຮັກສາ ແລະ ສ້າງສາພັດທະນາປະເທດຊາດ.


ຂ່າວ: ສິງຄຳ, ພາບ: ເກດສະໜາ (ສໍານັກຂ່າວສານປະເທດລາວ)

© ໂຕະນໍ້າຊາຂ່າວ | www.tonamchanews.com 
___________

No comments

Powered by Blogger.