Header Ads

ລັດຖະບານເຫັນດີໃຫ້ຍົກຍ້າຍເມືອງພູຄູນມາຕັ້ງຢູ່ບ່ອນໃໝ່ໃນເນື້ອທີ່ສໍາຫຼວດ 3.635 ເຮັກຕາ



ໃນວັນທີ 17 ກຸມພາ 2018 ຜ່ານມານີ້, ຢູ່ເມືອງພູຄູນ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະ ແລະ ກະຊວງທີ່ກ່ຽວຂ້ອງ ລົງເຄື່ອນໄຫວ ແລະ ເຮັດວຽກເພື່ອຊຸກຍູ້ໂຄງການພັດທະນາຕົວເມືອງໃໝ່ ແລະ ວຽກເສດຖະກິດ-ສັງຄົມ ໂດຍການຕອນຮັບຂອງທ່ານ ຄຳຂັນ ຈັນທະວີສຸກ ເຈົ້າແຂວງຫຼວງພະບາງ, ມີເຈົ້າເມືອງ ພ້ອມດ້ວຍຄະນະ, ຫົວໜ້າ-ຮອງຫົວໜ້າຫ້ອງການ ແລະ ປະຊາຊົນພາຍໃນບ້ານອ້ອມຂ້າງ.



ໂຄງການພັດທະນາ ຕົວເມືອງພູຄູນໃໝ່ ແຂວງຫຼວງພະບາງ ເປັນໂຄງການບູລິມະສິດອັນດັບໜຶ່ງຂອງແຂວງຫຼວງພະບາງ ທັງເປັນເຈົ້າຂອງໂຄງການເພື່ອພັດທະນາຕົວເມືອງໃນເຂດພູດອຍໃຫ້ມີຄວາມທັນສະໄໝ ແລະ ຍົກໃຫ້ເປັນເມືອງຕົວແບບອັນດັບໜຶ່ງຂອງເຂດພູດອຍໃນທົ່ວປະເທດ. ໂຄງການດັ່ງກ່າວມີເນື້ອທີ່ສຳຫຼວດທັງໝົດ 3.635 ເຮັກຕາ, ໃນນັ້ນເນື້ອທີ່ເທດສະບານເມືອງມີ 729 ເຮັກຕາ, ພື້ນທີ່ລອກສັດ 2.219 ເຮັກຕາ, ເນື້ອທີ່ນາ 69 ກວ່າເຮັກຕາ, ພື້ນທີ່ປ່າຟື້ນຟູ 617 ກວ່າເຮັກຕາ ແລະ ມີເສັ້ນທາງເກົ່າ 6.100 ແມັດ ແລະ ໄດ້ຮັບການເຊັນບົດບັນທຶກຄວາມເຂົ້າໃຈໃນການສຳຫຼວດ-ອອກແບບ ໂຄງການປັບປຸງ ແລະ ຂະຫຍາຍຕົວເມືອງພູຄູນ ນັບແຕ່ປີ 2015 ເປັນຕົ້ນມາ ໂດຍແມ່ນບໍລິສັດ ຫຼີຊື້ ຄຳມ່ວນກໍ່ສ້າງ ແລະ ສ້ອມແປງເຄຫະສະຖານ ຈຳກັດຜູ້ດຽວ ເປັນຜູ້ຮັບ ເໜົາໃນການສຳຫຼວດ-ອອກແບບ ໂດຍມີກິດຈະກຳຕົ້ນຕໍໃນການຈັດຕັ້ງປະຕິບັດຄື: 


ສຶກສາສຳຫຼວດ, ປະເມີນຄ່າຊົດເຊີຍຄືນບໍລິເວນຜົນລະປູກ ແລະ ສິ່ງປູກສ້າງຂອງປະຊາຊົນທີໄດ້ຮັບຜົນກະທົບ, ການຈັດສັນອາຊີບໃຫ້ແກ່ປະຊາຊົນ, ຍົກຍ້າຍປະຊາຊົນ ແລະ ການຍົກຍ້າຍສຳນັກງານຫ້ອງການຂອງເມືອງ, ລະບົບເສັ້ນທາງເຂົ້າຫາເມືອງ ແລະ ເທດສະບານເມືອງ, ລະບົບໄຟຟ້າ, ນໍ້າປະປາ, ລະບົບນໍ້າເສຍ ແລະ ລະບົບຈຳກັດຂີ້ເຫຍື້ອ, ລະບົບປ້ອງກັນຕາຝັ່ງເຈື່ອນທີ່ມີຄວາມຊ່ຽງ, ສຶກສາສຳຫຼວດ-ອອກແບບສຳນັກງານຫ້ອງການຂອງລັດ, ທີ່ຢູ່ອາໄສຂອງປະຊາຊົນ, ສວນສາທາລະນະ, ເດີ່ນກິລາຄົບວົງຈອນ, ສະໜາມບິນຂະໜາດນ້ອຍ, ໂຮງຮຽນ, ໂຮງໜໍຕະຫຼາດ, ເສົາຫຼັກເມືອງ ແລະ ວຽກງານອື່ນໆ ທີກ່ຽວຂ້ອງກັບການພັດທະນາຕົວເມືອງໃໝ່ ໃຫ້ໄປຕາມທິດເມືອງທັນສະໄໝ ຂອງສປປ ລາວ ເຊິ່ງມີມູນຄ່າທັງໝົດ 2 ພັນ 323 ຕື້ກວ່າກີບ. 






ເຊິ່ງມາຮອດປັດຈຸບັນນີ້ໂຄງການດັ່ງກ່າວໄດ້ມີການຄິດໄລ່ອອກແບບຄືນໃນບາງໜ້າວຽກທີ່ຈຳເປັນ ແລະ ໄດ້ສຳຫຼວດ-ອອກແບບສຳເລັດແລ້ວ ເປັນຕົ້ນແມ່ນ: ວຽກສຶກສາຜົນກະທົບທາງສິ່ງແວດລ້ອມ ແລະ ສັງຄົມ, ວຽກຂົວ-ທາງ, ວຽກລະບົບນໍ້າປະປາເຂົ້າຫາຕົວເມືອງ ແລະ ເທດສະບານເມືອງພູຄູນໃໝ່, ລະບົບໄຟຟ້າເຂົ້າຫາເມືອງ ແລະ ພາຍໃນເທດສະບານເມືອງພູຄູນໃໝ່, ວຽກເຄຫາ-ຜັງເມືອງ, ວຽກອ່າງເກັບກັກນໍ້າເຂື່ອນດິນ ແລະ ຝາຍນໍ້າລົ້ນ ທັງໝົດນີ້ແມ່ນມີມູນຄ່າທັງໝົດ 1.715 ຕື້ 367 ລ້ານກວ່າກີບ. ໃນຕອນທ້າຍທ່ານຮອງນາຍົກລັດຖະມົນຕີ ໄດ້ມອບອຸປະກອນເຄື່ອງຮັບໃຊ້ຫ້ອງການ, ການສຶກສາ ແລະ ເຄື່ອງບັນເທົາທຸກຈຳນວນໜຶ່ງພ້ອມດ້ວຍເງິນສົດ ຈຳນວນ50 ລ້ານກີບ ໃຫ້ເມືອງເພື່ອນຳໃຊ້ເຂົ້າໃນວຽກງານບໍລິຫານຕໍ່ໄປ.

ພາບ-ຂ່າວ ໂດຍ: ໄຊຍະສອນ
© ໂຕະນໍ້າຊາຂ່າວ | www.tonamchanews.com 
___________

No comments

Powered by Blogger.