Header Ads

ຮສສ ເປີດເຜີຍຄົນລາວເຮັດວຽກຢູ່ໄທ 46 ພັນຄົນ ຕ້ອງຂຶ້ນທະບຽນໃຫ້ແລ້ວໃນວັນທີ 31 ມີນາ 2018




ກະຊວງແຮງງານ ແລະ ສະຫວັດດີການສັງຄົມ (ຮສສ) ຈັດກອງປະຊຸມຂຶ້ນທີ່ຫ້ອງປະຊຸມໃຫຍ່ ຂອງກະຊວງດັ່ງກ່າວໃນວັນທີ 20 ກຸມພາ ຜ່ານມາ ພາຍໃຕ້ການເປັນປະທານຂອງທ່ານ ຄຳແພງ ໄຊສົມແພງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໂດຍມີຮອງລັດຖະມົນຕີກະຊວງການຕ່າງປະເທດ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຮອງລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າພະແນກ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.



ໃນກອງປະຊຸມໄດ້ມີການລາຍງານໃຫ້ຮູ້ວ່າ: ຫຼັງຈາກທາງການລາວໄດ້ສົ່ງພະນັກງານເຂົ້າໄປປັບສະຖານະພາບໃຫ້ແກ່ແຮງງານລາວ (ກຸ່ມບັດສີຊົມພູ) ທີ່ຍັງເຫຼືອຈຳນວນ 71 ພັນກວ່າຄົນຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 448/ຫສນຍ,ກສວ, ລົງວັນທີ 23 ມີນາ 2017 ຊຶ່ງໜ່ວຍງານປັບສະຖານະພາບແຮງງານລາວໄດ້ຕັ້ງຢູ່ຫ້າງ IT Square ເຂດຫຼັກ 4 ກຸງເທບມະຫານະຄອນປະເທດໄທ.





ຜ່ານການຈັດຕັ້ງປະຕິບັດວຽງານ ແຕ່ວັນທີ 28 ສິງຫາ 2017 ຮອດວັນທີ 31 ມັງກອນ 2018 (5 ເດືອນ) ສາມາດອອກໜັງສືຢັ້ງຢືນສະຖານະພາບບຸກຄົນ (CI) ແລະ ບັດອະນຸຍາດເຮັດວຽກໃຫ້ແຮງງານຜູ້ທີ່ມີບັດສີບົວ ໄດ້ຈຳນວນທັງໝົດ 24,684 ຄົນ, ໃນນັ້ນ ເປັນແຮງງານ ຈຳນວນ 22,422 ຄົນ( ຍິງ 11,525 ຄົນ), ຜູ້ຕິດຕາມ 2,262 ຄົນ( ຍິງ 1,062 ຄົນ), ຍັງອີກຈໍານວນ 46 ພັນກວ່າຄົນທີ່ຕ້ອງໄດ້ປະຕິບັດໃຫ້ສຳເລັດພາຍໃນວັນທີ 31 ມີນາ 2018.



ທ່ານ  ຄຳແພງ ໄຊສົມແພງ ກ່າວວ່າ: ອີງໃສ່ຂໍ້ມູນ ປີ 2016 ທີ່ຝ່າຍໄທໄດ້ແຈ້ງໃຫ້ຝ່າຍລາວຮູ້ວ່າ ມີແຮງງານທີ່ມີບັດສີຊົມພູປະມານ 71 ພັນກວ່າຄົນ ຊຶ່ງຈະໝົດອາຍຸ ວັນທີ 31 ມີນາ 2018 ໃຫ້ຝ່າຍລາວຮີບຮ້ອນເຂົ້າມາດຳເນີນການປັບສະຖານະພາບໃຫ້ຖືກຕ້ອງ. ນອກນີ້ ລັດຖະບານໄທ ຍັງໄດ້ອອກຂໍ້ກຳນົດການບໍລິຫານຈັດການການເຮັດວຽກຂອງຄົນຕ່າງດ້າວປີ 2017 ຊຶ່ງໄດ້ຕັ້ງສູນຮັບແຈ້ງແຮງງານຕ່າງດ້າວ 3 ສັນຊາດ ກຳນົດ 15 ວັນ ໃຫ້ຂຶ້ນທະບຽນມີແຮງງານລາວມາຂຶ້ນທະບຽນກັບຄູ່ນາຍຈ້າງ ກັບ ລູກຈ້າງ ມີທັງ ໝົດ 100,740 ຄົນ, ໃນນັ້ນ ແຮງງານລາວທີ່ໄດ້ຮັບການຢັ້ງຢືນວ່າເປັນຄົນລາວທີ່ທາງການໄທອອກໃບຈັບຄູ່ໃຫ້ຈຳນວນ 87,442 ຄົນ ມີກຳນົດຮອດວັນທີ 31 ທັນວາ 2017 ຊຶ່ງບໍ່ສາມາດຈັດຕັ້ງປະຕິບັດຕາມກຳນົດເວລາໄດ້. ສະນັ້ນ ມີແຮງງານລາວສອງກຸ່ມນີ້ຕົກຄ້າງປະມານ 130,000 ພັນກວ່າຄົນ.


ຂໍ້ມູນ:ຮສສ

© ໂຕະນໍ້າຊາຂ່າວ | www.tonamchanews.com 
___________

No comments

Powered by Blogger.