Header Ads

ເຈົ້າຄອງນະຄອນຫລວງລົງຢ້ຽມຢາມຜູ້ຖືກຜົນກະທົບຈາກພາຍຸລະດູຮ້ອນ ຢູ່ເມືອງປາກງື່ມ ນະຄອນຫຼວງວຽງຈັນ




ຕອນບ່າຍ ຂອງວັນທີ 22 ກຸມພາ 2017 ທ່ານ ປອ ສິນລະວົງ ຄຸດໄພທູນ ເຈົ້າຄອງ ນວ ພ້ອມດ້ວຍ ທ່ານ ວົງເດືອນ ບຸນຍະແສງ ເຈົ້າເມືອງປາກງື່ມ, ທ່ານ ນາງ ລຳພອຍ ສີອັກຄະຈັນ ຫົວໜ້າພະແນກແຮງງານ ແລະ ສະຫວັດດີການ-ສັງຄົມ; ພະແນກສຶກສາ ແລະ ກິລາ ພ້ອມດ້ວຍຂະແໜງການກ່ຽວຂ້ອງ ລົງກວດກາພື້ນທີ່ ທີ່ຖືກຜົນກະທົບຈາກພາຍຸລະດູຮ້ອນ ໃນຕອນແລງຂອງວັນທີ 21 ທີ່ຜ່ານມາ. ເຫດດັ່ງກ່າວໄດ້ເຮັດໃຫ້ຫຼັງຄາຂອງໂຮງຮຽນປະຖົມດອນສ້າງໄຜ່ ຖືກລົມພັດຮື້ອອກເປັນບໍລິເວນກ້ວາງ, ກ້ຽງຄຽງກັນແມ່ນເຮັດໃຫ້ບ້ານເຮືອນປະຊາຊົນບ້ານດອນສ້າງໄຜ່ ແລະ ໜອງແຄນ ເສຍຫາຍກ່ວາ 74 ຫຼັງຄາເຮືອນ; ຖືກລົມພັດຫັກເພທັງຫຼັງ 3 ຫຼັງ. ການເສຍຫາຍເບື້ອງຕົ້ນແມ່ນຍັງຢູ່ໃນຂັ້ນຕອນການປະເມີນຄວາມເສຍຫາຍຢູ່.


ເພື່ອສະແດງຄວາມເຫັນໃຈ ແລະ ເປັນການຊ່ວຍເຫຼືອ ບັນເທົ່າການແກ້ໄຂເຫດຈາກໄພທຳມະຊາດນີ້ ນະຄອນຫຼວງວຽງຈັນ ໄດ້ປະກອບທຶນຮອນໃນສ້ອມແປງໂຮງຮຽນ ຕ່າງໜ້າມອບໂດຍທ່ານ ປອ ສິນລະວົງ ຄຸດໄພທູນ ເຈົ້າຄອງ ນວ ຈຳນວນ 20 ລ້ານກີບ; ພະແນກ ຮ.ສ.ສ ມອບແຜນສັງກະສີຈຳນວນ 350 ແຜນ; ແລະ ພະແນກສຶກສາ-ກິລາ ນວ ມອບຊ່ວຍ 150 ແຜນ.



ໂອກາດນີ້ ທ່ານ ສິນລະວົງ ຄຸດໄພທູນ ກໍໄດ້ມີທິດຊີ້ນຳ ມອບໃຫ້ອົງການປົກຄອງເມືອງປາກງື່ມ ສົມທົບກັບພະແນກການ, ຫ້ອງການກ່ຽວຂ້ອງ ຮີບສືບຕໍ່ເລັ່ງສຳຫຼວດຜົນເສຍຫາຍທັງໝົດ ແລ້ວລາຍງານໃຫ້ການນຳ ນວ ຊາບໂດຍໄວ. ສ່ວນການແກ້ໄຂເບື້ອງຕົ້ນນີ້ ທັງກຳລັງແຮງງານ, ທຶນຮອນ ແລະ ອັນຈຳເປັນອື່ນໆ ກໍແມ່ນໃຫ້ລະດົມກຳລັງແຮງທີ່ມີພາຍໃນເມືອງເພື່ອແກ້ໄຂກ່ອນ.

ຂໍ້ມູນ: ວຽງຈັນວັນໃໝ່
© ໂຕະນໍ້າຊາຂ່າວ | www.tonamchanews.com 



___________

1 comment:

  1. ມູ່ນ ອູ້ຍປູ້ຍ ສ່ຳ ເຈັກເຕະເຫັດ ຈັ່ງແມ່ນ ລົມພັດແຮງດິນຟ້າອາກາດ ໂຫດຮ້າຍເຫລືອເກີນ

    ReplyDelete

Powered by Blogger.