Header Ads

ມະຫາກຳບຸນຊ້າງ ແລະ ປີທ່ອງທ່ຽວ 2018 ທີ່ເດີ່ນສະໜາມຫລວງ ແຂວງໄຊຍະບູລີ



ແຂວງ ​ໄຊ​ຍະ​ບູລີ ​ໄດ້​ເປີດງານ ຕະຫລາດວາງສະເເດງຂາຍສິນຄ້າ ກະສິກຳ ​ແລະ ຫັດຖະກຳ ຕິດ​ພັນ​ກັບງານ ມະຫາກຳບຸນຊ້າງ ແລະ ປີທ່ອງທ່ຽວ ໃນລະຫວ່າງ 16-22 ກຸມພາ 2018 ທີ່ເດີ່ນສະໜາມຫລວງ ແຂວງ ໄຊຍະບູລີ, ໂດຍການໃຫ້ກຽດ ເຂົ້າຮ່ວມຂອງ ທ່ານ ຍັນຍົງ ສີປະເສີດ ຮອງ ເຈົ້າແຂວງ ໄຊຍະບູລີ, ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ມີການນໍາ ຂອງແຂວງ, ເມືອງ, ຕະຫລອດຮອດພໍ່ແມ່ ປະຊາຊົນບັນດາເຜົ່າ, ນັກທຸລະກິດ ແລະ ຊາວຄ້າ ຂາຍ ທັງພາຍໃນ ແລະ ຕ່າງປະເທດເຂົ້າຮ່ວມ.






ທ່ານ ວາລາໄຊ ເລັ່ງສະຫວັດ ຫົວໜ້າ ພະແນກອຸດສາຫະກຳ ແລະ ການຄ້າ ແຂວງ ໄຊຍະບູລີ ໄດ້ກ່າວເປີດງານວ່າ: ການຈັດງານ ຕະຫລາດນັດ ແລະ ວາງສະເເດງສິນຄ້າ ໃນຄັ້ງນີ້, ເປັນນິມິດໝາຍອັນດີ ແລະ ຍິ່ງໃຫຍ່ທີ່ສຸດ ເນື່ອງຈາກວ່າ ພັກ-ລັດຖະບານ ໄດ້ກຳນົດເອົາ ປີ 2018 ເປັນປີທ່ອງທ່ຽວແຫ່ງຊາດ. ພ້ອມນີ້, ຍັງເປັນການສ້າງເງື່ອນໄຂ ເອື້ອອຳນວຍ ແລະ ສົ່ງເສີມ ໃຫ້ຜູ້ປະກອບການທຸລະກິດ, ຜູ້ຜະລິດສິນຄ້າ ຢູ່ໃນແຕ່ລະທ້ອງຖິ່ນ ທັງພາຍໃນ ແລະ ຕ່າງປະເທດ ໄດ້ມີໂອກາ ພົບປະແລກປ່ຽນບົດຮຽນ ໃນການຊື້-ຂາຍສິນຄ້າຂອງຕົນ ທີ່ຜະລິດອອກ ໃຫ້ມີການຂະຫຍາຍຕົວ ທັງດ້ານປະລິມານ ແລະ ຄຸນນະພາບ, ສ້າງໂອກາດໃຫ້ຫົວໜ່ວຍ ທຸລະກິດຕ່າງໆ ໄດ້ໂຄສະນາ ແນະນໍາສິນຄ້າ ທີ່ຕົນເອງ ໄດ້ຜະລິດຂຶ້ນມາ ໃຫ້ສັງຄົມ ກໍຄື ຜູ້ບໍລິໂພກໄດ້ຮັບຮູ້ ແລະ ເຂົ້າໃຈ ກ່ຽວກັບຜະລິດຕະພັນຂອງຕົນ ໃຫ້ກວ້າງຂວາງ. 





ໃນງານໄດ້ມີຮ້ານວາງສະແດງ ຂາຍສິນຄ້າຜົນຜະລິດ ທາງດ້ານກະສິກຳ, ຫັດຖະກຳ ແລະ ອຸດສາຫະກຳປຸງແຕ່ງ ທີ່ເປັນທ່າແຮງ ແລະ ຜົນງານ ຂອງບັນດາ 11 ເມືອງ ພາຍໃນແຂວງ ໄຊຍະບູລີ, ມີສິນຄ້ານະວັດຕະກຳ ທີ່ຕິດພັນ ທາງດ້ານວິຊາການຂອງບາງ ພະເເນກການ, ມູນນິທິ, ຫົວໜ່ວຍທຸລະກິດຂອງພາກ ລັດ-ເອກກະຊົນ ທັງພາຍໃນ ແລະ ຕ່າງປະເທດ, ລວມທັງ ຕົວແທນຊາວບ້ານເຂົ້າ ຮ່ວມຈຳນວນ 220 ກວ່າຮ້ານ, ມີມູນຄ່າສິນຄ້າທັງໝົດ ປະມານ 6 ຕື້ກວ່າກີບ.ທ່ານ ວາ​ລາ​ໄຊ ​ເລັ່ງສະຫວັດ ກ່າວຕື່ມວ່າ: ງານ ຕະຫລາດນັດ ແລະ ວາງສະເເດງ ສິນຄ້າ ໃນຄັ້ງນີ້, ຍັງຈະເປັນການ ປະກອບສ່ວນສໍາຄັນ ໃນການຊຸກຍູ້ ຫົວໜ່ວຍທຸລະກິດ ຂະໜາດນ້ອຍ ແລະ ກາງ SME ພາຍໃນແຂວງ ໃຫ້ມີການ ຂະຫຍາຍຕົວ ແລະ ປັບຕົວເອງ ທັງດ້ານປະລິມານ ແລະ ຄຸນນະພາບ ​ໃຫ້ສາມາດ ດຳເນີນທຸລະກິດໄປ ຕາມກົນໄກ ເສດຖະກິດຕະຫລາດ ​ປະກອບສ່ວນ ສ້າງວຽກເຮັດງານທຳ, ສ້າງອາຊີບໃຫ້ປະຊາຊົນ ຈຳນວນບໍ່ໜ້ອຍ ສາມາດຫລຸດຜ່ອນການ ນຳເຂົ້າສິນຄ້າ ທີ່ບໍ່ຈຳເປັນເທື່ອລະກ້າວ




ເນື້ອໃນຂ່າວ: ບຸນທີ  | ວິດີໂອ : Nut Vongvichit

© ໂຕະນໍ້າຊາຂ່າວ | www.tonamchanews.com 
___________


No comments

Powered by Blogger.