Header Ads

ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ຕ້ອນຮັບທ່ານ ເອກອັກຄະລັດທະທູດອົດສະຕຣາລີ ປະຈໍາ ສປປ ລາວ



ໃນຕອນເຊົ້າຂອງວັນທີ 23 ກຸມພາ 2018 ຢູ່ທີ່ຫ້ອງວ່າການສໍານັກງານນາຍົກລັດຖະມົນຕີ ທ່ານ ເພັດ ພົມພິພັກ ລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ຈິນ ເບີນາດ ຄາຣາດສ໌ໂກ ເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ ພ້ອມດ້ວຍຄະນະ.

ກ່ອນອື່ນ ທ່ານ ເພັດ ພົມພິພັກ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງ ຕໍ່ການເຂົ້າຢ້ຽມຂໍ່ານັບຂອງ ທ່ານ ຈິນ ເບີນາດ ຄາຣາດສ໌ໂກ ພ້ອມດ້ວຍຄະນະ ໃນຄັ້ງນີ້ ເພື່ອເປັນການປະກອບສ່ວນສໍາຄັນເຂົ້າ ໃນການເສີມຂະຫຍາຍສາຍພົວພັນຮ່ວມມື ລະຫວ່າງສອງປະເທດ ລາວ-ອົດສະຕຣາລີ ໃຫ້ແໜ້ນແຟ້ນຍິ່ງໆຂຶ້ນ. ພ້ອມດຽວກັນນີ້, ທ່ານ ເພັດ ພົມພິພັກ ຍັງໄດ້ສະແດງຄວາມຂອບໃຈມາຍັງ ລັດຖະບານ ກໍ່ຄື ປະຊາຊົນ ອົດສະຕຣາລີ ທີ່ໄດ້ໃຫ້ການສະໜັບສະໜູນ ແລະ ຊຸກຍູ້ຊ່ວຍເຫຼືອ ສປປ ລາວ ຕະຫຼອດມາ ເປັນຕົ້ນແມ່ນການຊ່ວຍລ້າໃນດ້ານຕ່າງໆ, ການຊ່ວຍເຫຼືອ ເພື່ອພັດທະນາຊັບພະຍາກອນມະນຸດ ແລະ ອື່ນໆ ເປັນການປະກອບສ່ວນສໍາຄັນ ເຂົ້າໃນການພັດທະນາເສດຖະກິດ-ສັງຄົມຂອງ ສປປ ລາວ ຕະຫຼອດມາ. ຈາກນັ້ນ ທ່ານຍັງໄດ້ແຈ້ງໃຫ້ທ່ານເອກອັກຄະລັດຖະທູດອົດສະຕຣາລີ ປະຈໍາ ສປປ ລາວ ຊາບ ກ່ຽວກັບສະພາບການພັດທະນາເສດຖະກິດ-ສັງຄົມ ແລະ ການລົງທຶນ ຢູ່ ສປປ ລາວ ຕື່ມອີກ.

ໂອກາດເຂົ້າຢ້ຽມຂໍ່ານັບໃນຄັ້ງນີ້, ທ່ານ ຈິນ ເບີນາດ ຄາຣາດສ໌ໂກ ໄດ້ສະແດງຄວາມຂອບໃຈມາຍັງທ່ານລັດຖະມົນຕີ, ຫົວໜ້າຫ້ອງວ່າການສໍານັກງານນາຍົກລັດຖະມົນຕີ ທີ່ເສຍສະຫຼະເວລາອັນມີຄ່າ ໃຫ້ການຕ້ອນຮັບຢ່າງອົບອຸ່ນໃນຄັ້ງນີ້, ພ້ອມທັງ ສະແດງຄວາມຂອບໃຈມາຍັງລັດຖະບານລາວ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫຼືອບັນດານັກລົງທຶນອົດສະຕຣາລີ ທີ່ໄດ້ມາລົງທຶນຢູ່ ສປປ ລາວ ພ້ອມທັງ ກ່າວວ່າຈະສືບຕໍ່ເສີມຂະຫຍາຍສາຍພົວພັນຮ່ວມມື ລະຫວ່າງສອງປະເທດ ໃຫ້ຈະເລີນງອກງາມຍິ່ງໆຂຶ້ນ.

ນອກຈາກນີ້, ທັງສອງຝາຍຍັງໄດ້ປຶກສາຫາລືຮ່ວມກັນ ກ່ຽວກັບການກະກຽມໃຫ້ແກ່ການເດີນທາງໄປເຄື່ອນໄຫວຢ້ຽມຢາມປະເທດ ອົດສະຕຣາ ຢ່າງເປັນທາງການ ແລະ ເຂົ້າຮ່ວມກອງປະຊຸມ ສຸດຍອດອາຊຽນ-ອົດສະຕຣາລີ ທ່ານ ທອງລຸນ ສີສຸລິດ ນາຍົກລັດຖະມົນຕີ ໃນເວລາອັນໃຫ້ໆທີ່ຈະມາເຖິງນີ້. ສໍາລັບ ສປປ ລາວ-ອົດສະຕຣາລີ ໄດ້ສ້າງຕັ້ງສາຍພົວພັນຮ່ວມມືນໍາກັນ ໃນວັນທີ 16 ມັງກອນ 1952.


ແຫລ່ງ: ກົມປະຊາສຳພັນ, ຫ້ອງວ່າການສຳນັກງານນາຍົກລັດຖະມົນຕີ 
© ໂຕະນໍ້າຊາຂ່າວ | www.tonamchanews.com 
___________

No comments

Powered by Blogger.