Header Ads

ງານວາງສະແດງສິນຄ້າໂອດ໊ອບ 8 ແຂວງພາກເໜືອຢູ່ ເມືອງຫວ້ຍຊາຍແຂວງບໍ່ແກ້ວ ມີເກືອບ 300 ຫົວໜ່ວຍເຂົ້າຮ່ວມ




ງານຕະຫຼາດນັດວາງສະແດງສິນຄ້າໂອດ໊ອບ (ODOP) 08 ແຂວງພາກເໜືອຈັດຂຶ້ນໃນລະຫວ່າງວັນທີ 20-30 ມີນາ 2018 ທີ່ສະໜາມກີລາຂອງແຂວງບໍ່ແກ້ວ, ເຊິ່ງມີພິທີເປີດງານຢ່າງເປັນທາງການໃນຕອນເຊົ້າວັນທີ 25 ມີນາ ໂດຍໃຫ້ກຽດເຂົ້າຮ່ວມຕັດແຖບຜ້າຂອງ ດ໋ອກເຕີ ຄຳພັນ ເຜີຍຍະວົງ ເຈົ້າ ແຂວງບໍ່ແກ້ວ, ທ່ານ ສົມຈິດ ອິນທະມິດ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ມີບັນ ດາການນຳພັກ-ລັດ, ບໍລິສັດ,ຫ້າງຮ້ານ ແລະ ແຂກຖຶກເຊີນເຂົ້າຮ່ວມຢ່າງຫຼວງຫຼາຍ.





ໃນພິທີ, ທ່ານ ນາງ ພວງພັນ ພູມສະຫວັນ ຫົວໜ້າພະແນກອຸດສາຫະກຳ ແລະ ການຄ້າແຂວງ ກ່າວວ່າ: ງານດັ່ງກ່າວຈັດຂຶ້ນເພື່ອຕ້ອນຮັບການສະຫຼອງວັນສ້າງຕັ້ງແຂວງບໍ່ແກ້ວຄົບຮອບ 35 ປີ ທັງເປັນການສ້າງເງື່ອນໄຂໃຫ້ບັນດາຜູ້ປະກອບການພາຍໃນ 8 ແຂວງພາກເໜືອ ແລະ ຜູ້ຊື້ໄດ້ພົບປະແລກປ່ຽນດ້ານການຜະລິດ, ການຄ້າ-ການລົງທຶນ ທັງເປັນການໂຄສະນາ, ປັບປຸງຜະລິດຕະພັນຂອງຕົນໃຫ້ໄດ້ຕາມມາດຕະຖານຂອງຕະຫຼາດກໍຄືຜູ້ຊົມໃຊ້ ເຊິ່ງມີທັງໝົດ 295 ຫ້ອງແບ່ງອອກເປັນ 12 ໝວດສິນຄ້າຕົ້ນຕໍເຊັ່ນ: ຜະລິດຕະພັນຈາກສັດລ້ຽງ, ເຂົ້າໜົມທີ່ເປັນເອກະລັກ, ເຟີນິເຈີ, ຫັດຖະກຳຈັກສານ, ຜະລິດຕະພັນຝ້າຍ ແລະ ເຄື່ອງນຸ່ງພື້ນເມືອງຂອງຊົນເຜົ່າຕ່າງໆ, ຜະລິດຕະພັນກະສິກຳ ແລະ ເຄື່ອງປ່າຂອງດົງ, ປຸຍຊີວະພາບ, ວັດສະດຸຮັບໃຊ້ການກໍ່ສ້າງ, ອັນຍະມະນີແຮ່ທາດ, ອຸປະກອນການສຶກສາ, ເຄື່ອງໃຊ້ສອຍ ແລະ ບັນດາສິນຄ້າສຳເລັດຮູບອື່ນໆ.



ແຂວງທີ່ເຂົ້າຮ່ວມວາງສະແດງປະກອບມີ: ບໍ່ແກ້ວ, ຫົວພັນ, ຫຼວງນ້ຳທາງ, ຊຽງຂວາງ, ຫຼວງພະບາງ, ໄຊຍະບູລີ ແລະ ນະຄອນຫຼວງວຽງຈັນ. ນອກຈາກນັ້ນຍັງມີສິນຄ້າຈາກ ໄທ, ສສ ຫວຽດນາມ, ສປ ຈີນ ແລະ ບັນດາຫ້ອງວາງສະແດງ 13 ຂະແໜງການອ້ອມຂ້າງແຂວງເຂົ້າຮ່ວມ ຄາດວ່າຈະມີທຶນໝູນວຽນພາຍໃນງານຄັ້ງນີ້ປະມານ 3.2 ຕື້ກີບ.




ຂໍ້ມູນ: ວສລ 
© ໂຕະນໍ້າຊາ | www.tonamchanews.com | www.tonamcha.com 


___________

No comments

Powered by Blogger.