Header Ads

ເຈົ້າໜ້າທີ່ຕໍາຫຼວດ ແຂວງຫົວພັນ ກວດຄົ້ນເຮືອນເປົ້າໝາຍ ພົບຂອງກາງຢາເສບຕິດ ປະເພດຢາບ້າ ຈໍານວນ 203 ເມັດ ແລະ ເຮໂຣອິນ 5 ກ້ອນນ້ອຍ



ເຈົ້າໜ້າທີ່ຕໍາຫຼວດບໍລິການປະຊາຊົນ ກຸ່ມ 3 ບ້ານນາໜອງບົວ ເມືອງຊໍາເໜືອ ແຂວງຫົວພັນ ສົມທົບກັບອໍານາດການປົກຄອງບ້ານ ເຂົ້າກວດຄົ້ນເຮືອນຂອງ ນາງ ເບົາຢາງ ອາຍຸ 50 ປີ ປະຊາຊົນບ້ານຫົວຄັງ ເມືອງຊໍາເໜືອ ແຂວງຫົວພັນ ພົບຂອງກາງຢາເສບຕິດ ປະເພດຢາບ້າ ຈໍານວນ 203 ເມັດ, ເຮໂຣອິນ 5 ກ້ອນນ້ອຍ, ຫີນອ່ອນ 500 ກິໂລກຼາມ ແລະ ຜູ້ມົ້ວສຸມ 5 ຄົນ ໃນຂະນະທີ່ກໍາລັງເສບຢາເສບຕິດຮ່ວມກັນ.


ເຈົ້າໜ້າທີ່ໃຫ້ຮູ້ວ່າ: ພາຍຫຼັງໄດ້ຮັບລາຍງານຈາກປະຊາຊົນວ່າ ນາງ ເບົາຢາງ ໃຊ້ເຮືອນຕົວເອງເປັນບ່ອນຈໍາໜ່າຍຢາເສບຕິດ ພ້ອມທັງອໍານວຍຄວາມສະດວກໃຫ້ກັບກຸ່ມໄວລຸ້ນເຂດບ້ານດັ່ງກ່າວເຂົ້າມົ້ວສຸມເສບ. ຈາກນັ້ນ, ເຈົ້າໜ້າທີ່ຈຶ່ງປະສານສົມທົບກັບອໍານາດການປົກຄອງບ້ານຕິດຕາມການເຄື່ອນໄຫວຂອງຜູ້ກ່ຽວ. ຜ່ານ ການຕິດຕາມເຫັນວ່າຜູ້ກ່ຽວແມ່ນ ເອົາຢາເສບຕິດມາເບື່ອເມົາບັນດາໄວລຸ້ນພາຍໃນບ້ານ. ຮອດວັນທີ 22 ພຶດສະພາ 2018 ຈຶ່ງໄດ້ເຂົ້າກວດຄົ້ນເຮືອນຜູ້ກ່ຽວພົບເຫັນຂອງກາງຢາເສບຕິດຈໍານວນດັ່ງກ່າວ ພ້ອມຜູ້ມົ້ວສຸມ ຈໍານວນ 5 ຄົນ.
ນາງ ເບົາຢາງ ສາລະພາບວ່າ: ໄດ້ເອົາຢາເສບຕິດມາຂາຍໃຫ້ກັບໄວລຸ້ນທີ່ຕ້ອງການເສບຢາພາຍໃນບ້ານ ແລະ ບ້ານໃກ້ຄຽງມາແຕ່ຕົ້ນປີ 2018. ສ່ວນຫຼາຍແມ່ນອໍານວຍຄວາມສະດວກໃຫ້ຜູ້ມາຊື້ເສບຢູ່ເຮືອນ ແລ້ວຈຶ່ງກັບເຮືອນ. ສ່ວນຫີນອ່ອນ ຈໍານວນ 500 ກິໂລກຼາມ ແມ່ນພວກໄວລຸ້ນເອົາມາແລກປ່ຽນຢາບ້າ. ປັດຈຸບັນ, ຄະດີດັ່ງກ່າວຍັງຢູ່ໃນຂັ້ນຕອນການສືບສ່ວນ-ສອບສວນຂອງເຈົ້າໜ້າທີ່ ເພື່ອຂະຫຍາຍຜົນຫາກຸ່ມແກ້ງຜູ້ຮ່ວມຂະບວນການມາຮັບໂທດຕາມຂັ້ນຕອນຂອງກົດໝາຍ
ພາບ-ຂ່າວ: ນສພ ຄວາມສະຫງົບ
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.