ລາວ-ຈີນ ຮ່ວມມືກັນດ້ານການທ່ອງທ່ຽວ

ເພື່ອ​ແນໃສ່​ສົ່ງເສີມ​ການທ່ອງທ່ຽວ ແລະ ແລກປ່ຽນ​ບົດຮຽນ​ວຽກ​ງານ​ການທ່ອງທ່ຽວ ພ້ອມ​ກັບ​ເຂດ​ການ​ຮ່ວມ​ມື​ດ້ານ​ຕ່າງໆ ລະຫວ່າງສອງ​ປະເທດ ລາວ-ຈີນ ໃນ​ວັນ​ທີ 21 ພຶດສະພາ 2018 ທີ່​ເມືອງ​ໄຫ​ໂຂວ ແຂວງ​ໄຫ​ໜານ ​ສປ ຈີນ ໄດ້​ມີ​ພິທີ​ເຊັນ​ສັນຍາ​ຮ່ວມ​ມື​ກັນ​ໃນ​ການ​ສ້າງ​ເສັ້ນທາງ​ຖ້ຽວ​ບິນ​ໃໝ່ ລະຫວ່າງນະຄອນຫຼວງ​ວຽງ​ຈັນ ແຂວງ​ຫຼວງ​ພະ​ບາງ ແລະ ແຂວງ​ໄຫ​ໜານ ຕາງໜ້າ​ຝ່າຍ​ລາວ ແມ່ນ​ທ່ານ ຈົງ ຈຸນ ຈົ໋ງ ຜູ້ອຳນວຍການ​ປະທານ​ບໍລິສັດ Malao Travel Sole Limited ໃນ​ປະເທດ​ລາວ ແລະ ຝ່າຍ​ຈີນ​ແມ່ນ​ທ່ານ ຕິງ ເຈຍ​ ປິງ ​ຜູ້​ຈັດການ​ທົ່ວ​ໄປ​ຂອງ​ບໍລິສັດ​ ການທ່ອງທ່ຽວໄຫ​ໜານຢູ​ໄນ​ເຕັດ ແອ​ລາຍ Hainan United Airlines Travel Company Limited ໂດຍ​ມີທ່ານ​ນາງ ແສງ​ໂສດາ ວັນ​ທາ​ນຸ​ວົງ ຮອງ​ຫົວໜ້າ​ກົມ​ໂຄສະນາ​ການທ່ອງທ່ຽວ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ຜູ້ຕາງໜ້າ​ຈາກ​ກົມ​ການບິນ​ພົນ​ລະ​ເຮືອນ ຜູ້​ປະກອບ​ການ​ທຸລະ​ກິດ​ທ່ອງ​ທ່ຽວ-ໂຮງແຮມ ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ​ເປັນ​ສັກຂີ​ພິຍານ.

ສຳລັບ​ເສັ້ນທາງ​ສາຍ​ການບິນທີ່​ສ້າງ​ໃໝ່​ ແມ່ນ​ຈະ​ມີ​ສາມ​ຖ້ຽວ​ບິນ​ປະຈຳ​ອາທິດອອກ​ຈາກ​ນະຄອນຫຼວງ​ວຽງ​ຈັນ ເຖິງ​ເມືອງ​ໄຫ​ໂຂວ ໃນ​ແຂວງ​ໄຫ​ໜານ ໃນ​ວັນ​ພຸດ ແລະ ວັນ​ອາທິດ ແລະ ຈາກ​ຫຼວງ​ພະ​ບາງ-ໄຫ​ໂຂວ ໃນ​ແຂວງ​ໄຫ​ໜານ ວັນ​ສຸກ ເຊິ່ງ​ແຂວງ​ໄຫ​ໜານ ແມ່ນ​ຕັ້ງ​ຢູ່​ພາກ​ໃຕ້​ຂອງ​ຈີນ ແລະ ມີ​ສະພາບອາກາດ​ຄ້າຍຄື​ກັນ​ກັບ​ລາວ ເຊິ່ງ​ໄດ້​ຖື​ເປັນ​ເສັ້ນທາງ​ໃນ​ການ​ຄ້າ-ຂາຍ ທີ່​ຕິດ​ພັນ​ກັບ​ດ້ານ​ອຸດສາຫະກຳ​ການທ່ອງທ່ຽວກັບ​ບັນດາ​ປະເທດ​ໃກ້​ຄຽງ ແລະ ເສັ້ນທາງ​ໃໝ່​ດັ່ງກ່າວ ແມ່ນ​ໜຶ່ງ​ໃນ​ຫຼາຍ​ກວ່າ 50 ຖ້ຽວ​ບິນ​ທົ່ວ​ໂລກ ທີ່​ຈະ​ສົ່ງເສີມ​ການ​ທ່ອງທ່ຽວ ແລະ ການ​ຮ່ວມ​ມື​ກັບ​ແຂວງ ໂດຍ​ໃຊ້​ເວລາ​ໃນ​ການ​ເດີນທາງ​ພຽງ​ແຕ່ 90 ນາທີເທົ່າ​ນັ້ນ ເນື່ອງ​ຈາກ​ການ​ສ້າງ​ສາຍ​ການບິນ One Belt ຖະໜົນ​ໜຶ່ງ​ຂອງ​ນະໂຍບາຍ​ລັດຖະບານ​ຈີນ ໃນ​ການ​ສ້າງຕັ້ງ​ການບິນ​ຈາກ​ລາວໄປ​ແຂວງ​ໄຫ​ໜານ ເພື່ອ​ເສີມ​ຂະຫຍາຍ​ການ​ພັດທະນາ​ຂອງ​ສອງ​ປະເທດ ພ້ອມ​ນັ້ນ ການ​ເດີນທາງ​ບໍ່​ພຽງ​ແຕ່​ຊ່ວຍ​ສົ່ງເສີມ​ການ​ຄ້າ ແລະ ເສດຖະກິດເທົ່າ​ນັ້ນ ແຕ່​ຈະ​ຍັງ​ຊ່ວຍ​ພັດທະນາ​ດ້ານ​ອື່ນໆ​ອີກ​ດ້ວຍ.

ຂໍ້ມູນ: ນສພ ວຽງຈັນໃຫ່ມ

© ໂຕະນໍ້າຊາ  | www.tonamcha.com | www.tonamchanews.com

_______