Header Ads

ໂລກລະບາດ ງົວ-ຄວາຍຕາຍ ຫຼາຍໂຕ ທີ່ແຂວງວຽງຈັນ



​ເມື່ອ​ບໍ່ດົນ​ມານີ້, ປະຊາຊົນທ້ອງຖິ່ນ​ແຂວງ​ວຽງຈັນ ​ໄດ້​ລາຍ​ງານ​ວ່າ: ເກີດເຫດງົວຕາຍເປັນຝູງຈໍານວນ 10 ໂຕຢູ່ເຂດບ້ານ ແສນຈະເລີນ ​ແລະ ບ້ານ​ໃກ້​ຄຽງ ຢູ່ ​ເມືອງ ຊະນະ​ຄາມ, ​ໂດຍ​ບໍ່ຮູ້​ສາ​ເຫດ, ສ້າງ​ຄວາມ​ເສຍ​ຫາຍ​ໃຫ້​ປະຊາຊົນ ​ເປັນ​ຈຳນວນ​ບໍ່ໜ້ອຍ ​ແລະ ຫລັງ​ຈາກ​ນັ້ນຫ້ອງການ​ກະສິກຳ ​ແລະ ປ່າ​ໄມ້ ​ເມືອງ ກໍ​ໄດ້​ລົງ​ກວດກາ ​ແລະ ນຳ​ເອົາ​ຊີ້ນສ່ວນ​ຂອງ​ສັດ​ໄປ​ກວດກາ ​ແລະ ຢັ້ງຢືນ​ວ່າ: ສາ​ເຫດ​ງົວ​ຕາຍ​ຈຳນວນ​ດັ່ງກ່າວແມ່ນ​ຍ້ອນ ພະຍາດ​ເຕົ້າ​ໂຮມ​ເລືອດ, ຊຶ່ງ​ປັດຈຸບັນໜ່ວຍງານ​ກ່ຽວຂ້ອງ ​​​ໄດ້​ເລັ່ງ​ໂຄສະນາ​ແນະນຳ​ໃຫ້​ປະຊາຊົນ​ສັກ​ຢາ​ປ້ອງ​ກັນ ​ແລະ ອອກ​ແຈ້ງ​ການ​ຫ້າ​ມ​ເຄື່ອນ​ຍ້າຍ ​ແລະ ບໍລິ​ໂພ​ກຊີ້ນງົວ, ຄວາຍທີ່​ຕາຍ ​ເນື່ອງ​ຈາກ​ອາດ​ເກີດ​ພະຍາດ​ຕິດຕໍ່ສູ່​ຄົນ​ໄດ້.



ຫົວໜ້າຫ້ອງການ​ກະສິກຳ ​ແລະ ປ່າ​ໄມ້​ເມືອງ​ດັ່ງກ່າວ ​ເປີດ​ເຜີຍ​ວ່າ: ​ເມື່ອ​ທ້າຍ​ອາທິດ​ຜ່ານ​ມານີ້, ມີ​ຄອບຄົວໜຶ່ງ​ຢູ່​ບ້ານ ນາ​ສົມບູນ, ​ໄດ້​ຂ້າງົວຂອງ​ຕົນ​ເອງຊຶ່ງ​ບໍ່ຮູ້​ວ່າ​ສັດ​ດັ່ງກ່າວ​ເປັນ​ພະຍາດ ຫລືບໍ່? ​ແລ້ວ​ນຳ​ມາ​ບໍລິ​ໂພ​ກ ຈາກ​ນັ້ນ ​ໄດ້​ເກີດ​ມີ​ການ​ແຜ່​ລະບາດ​ຂອງ​ພະຍາດ​ດັ່ງກ່າວ ຢູ່​ບ້ານ​ໃກ້​ຄຽງ​ເປັນ​ຈຳນວນ​ຫລາຍ​ຄື: ບ້ານ ​ໂພນ​ສະຫວາດ, ບ້ານ ​ແສນ​ຈະ​ເລີ​ນ ​ແລະ ບ້ານ​ອື່ນໆ ​ເຮັດ​ໃຫ້​ມີ​ສັດລ້ຽງຄື: ງົວ, ຄວາຍ ລົ້ມ​ຕາຍ ​ເປັນ​ຈຳນວນ​ຫລາຍ, ​​ແລະ ຜ່ານ​ການ ລົງ​ກວດກາ ຈຶ່ງ​ຮູ້​ວ່າແມ່ນ​ຍ້ອນ​​ພະຍາດເຕົ້າ​ໂຮມ​ເລືອດ, ຊຶ່ງ​ກ່ອນໜ້ານີ້ 2 ປີ, ພະຍາດ​ດັ່ງກ່າວ​ກໍ​ໄດ້​ເກີດ​ຂຶ້ນຢູ່​​ເມືອງລ້ອງ​ຊານ​ມາ​ແລ້ວ, ​ເຮັດ​ໃຫ້​ມີ​ສັດ​ລົ້ມ​ຕາຍ​ກ່ວາ 20 ​ໂຕ, ​ແລະ ​​ເປັນ​ພະຍາດ​ທີ່ມັກ​ເກີດ​ຕາມ​ລະດູ


ສະນັ້ນ ຈຶ່ງ​ຮຽກຮ້ອງ​ໃຫ້​ປະຊາຊົນ​ຈົ່ງ​ໄດ້​ລະວັງ ​ແລະ ​ເພີ່ມ​ທະວີ​ໃນ​ການ​ປ້ອງ​ກັນ​ຄື ການ​ສັກ​ຢາ​ກັນ​ພະຍາດສັດ​ໃຫ້​ເປັນ​ປະຈຳ ​ແລະ ບໍ່ຄວນ​ປະປ່ອຍ​ໃຫ້​ສັດ​ໄປ​ຕາມ​ລຳພັງ ​ແລະ ຫ້າມ​ນຳ​ເອົາ​ຊີ້ນສັດ​ຕາຍ​ມາ​ກິນ​ເດັດຂາດ, ອາດ​ພາ​ໃຫ້​ເກີດ​ພະຍາດ​ແຜ່​ລາມ​ສູ່​ຄົນ​ໄດ້.


ແຫຼ່ງທີ່ມາ: ໜັງສືພິມລາວພັດທະນາ
_____


No comments

Powered by Blogger.