Header Ads

ຈັບຜູ້ຄ້າຢາເສບຕິດ ພ້ອມຂອງກາງຢາບ້າ 12 ພັນກວ່າເມັດ



ອີງຕາມການລາຍງານຂອງ ນສພ ຄວາມສະຫງົບ ວ່າ:  ປັດຈຸບັນ, ບັນຫາການລັກລອບຄ້າຂາຍຢາເສບຕິດຂອງກຸ່ມຄົນບໍ່ດີຍັງມີທ່າອ່ຽງແຜ່ຫຼາຍ ທັງເປັນການທ້າທາຍຢ່າງບໍ່ເກງກົວເຈົ້າໜ້າທີ່ ແລະ ລະບຽບກົດໝາຍວາງອອກ. ໃນການສະກັດກັ້ນ ແລະ ຕ້ານບັນຫາດັ່ງກ່າວ, ເຈົ້າໜ້າທີ່ກ່ຽວຂ້ອງ ກໍໄດ້ສຸມໃສ່ວຽກງານຢ່າງຕໍ່ເນື່ອງ ສາມາດຈັບກຸມຜູ້ຄ້າຂາຍມາດໍາເນີນຄະດີເປັນຈໍານວນຫຼວງຫຼາຍ ແຕ່ບໍ່ສາມາດແກ້ໃຫ້ບັນຫາຫຼຸດໜ້ອຍຖອຍລົງໄດ້, ເຊິ່ງໃນຄັ້ງວັນທີ 23 ມີນາ 2018 ທີ່ຜ່ານມາ ເຈົ້າໜ້າທີ່ພະແນກຕໍາຫຼວດສະກັດກັ້ນ ແລະ ຕ້ານຢາເສບຕິດ ປກສ ນວ ສົມທົບກັບພາກສ່ວນກ່ຽວຂ້ອງ ກະຊວງ ປກສ ສະແດງຕົວເຂົ້າຈັບກຸມເປົ້າໝາຍຄ້າຂາຍຢາເສບຕິດ ຊື່ນາງ ເຊັງທໍ່ ອາຍຸ 32 ປີ ຢູ່ບ້ານໂຊກໃຫຍ່ ເມືອງໄຊເສດຖາ ນະຄອນຫຼວງວຽງຈັນ ພ້ອມຂອງກາງຢາບ້າທີ່ຕິດຕົວ ຈໍານວນ 6 ມັດ ເທົ່າກັບ 12.000 ເມັດ. ຈາກນັ້ນ, ນໍາຕົວໄປຄົ້ນເຮືອນພົບອີກ 8 ມັດ ເທົ່າກັບ 16.000 ເມັດ ມາດໍາເນີນຄະດີ.



ນາງ ເຊັງທໍ່ ສາລະພາບວ່າ: ໄດ້ເຄື່ອນໄຫວຄ້າຂາຍຢາບ້າແທ້. ຢາບ້າແມ່ນໄດ້ຊື້ນຳ ທ້າວ ລີຕ້າ ອາຍຸປະມານ 40 ປີ ເປັນຄົນສັນຊາດມຽນມາ ຢູ່ບ້ານທ່າຂີ້ເຫຼັກ ເມືອງທ່າຂີ້ເຫຼັກ ປະເທດມຽນມາ ພັກເຊົາຢູ່ບ້ານໂພນເຄັງ ເມືອງໄຊເສດຖາ ນະຄອນຫຼວງວຽງຈັນ, ໂດຍເລີ່ມຊື້-ຂາຍມາແຕ່ທ້າຍປີ 2017 ຕອນນັ້ນໄດ້ຊື້ຢາບ້າມາຂາຍຄັ້ງລະ 100-200 ເມັດ ແລະ ຊື້ມາແລ້ວຫຼາຍຄັ້ງ ຈົນບໍ່ສາມາດຈື່ໄດ້ມາໃນຕົ້ນປີ 2018 ຈຶ່ງເລີ່ມຊື້ຢາບ້າຫຼາຍຂຶ້ນ ຊື້ຄັ້ງລະ 2-3 ມັດ ມັດລະ 2.000 ເມັດ ການຊື້-ຂາຍແມ່ນໄດ້ນັດຈຸດຊື້ຂາຍຢູ່ເຂດເສັ້ນທາງ 450 ປີ ເຂດບ້ານໂຊກໃຫຍ່ ເມືອງໄຊເສດຖາ ສ່ວນເງິນແມ່ນເອົາຢາບ້າມາຂາຍກ່ອນໄດ້ເງິນແລ້ວ ຈຶ່ງເອົາໄປຈ່າຍຕາມຫຼັງ. ຢາບ້າແມ່ນໄດ້ເອົາໃຫ້ກັບໄວລຸ້ນທີ່ມົ້ວສຸມຢູ່ຕາມເຂດບ້ານໂຊກໃຫຍ່ ແລະ ໄວລຸ້ນທີ່ໂທມາສັ່ງຊື້, ບາງຄັ້ງກໍມາຊື້ຮອດເຮືອນ ແລະ ບາງຄັ້ງກໍອອກໄປສົ່ງໃຫ້ເຂົາເຈົ້າເອງ, ການຂາຍແມ່ນຂາຍຄັ້ງລະ 1-2 ຖົງ ຖົງລະ 200 ເມັດ ບໍ່ຂາຍຍ່ອຍ ແລະ ເອົາສະຖານທີ່ເຮືອນ, ເຮືອນພັກ ເຂດບ້ານໂຊກໃຫຍ່ ແລະ ເຂດເສັ້ນທາງ 450 ປີ ເປັນບ້ານນັດຈຸດຊື້-ຂາຍ.

ຕົກມາໃນເດືອນກຸມພາ 2018 ໄດ້ຊື້ຢາບ້ານຳ ທ້າວ ລີຕ້າ ຈຳນວນ 2 ມັດ ເປັນຢາບ້າເກຼດ A ແລ້ວນຳໄປຂາຍໃຫ້ ທ້າວ ສີ ຫຼື ແລັກ ອາຍຸ ປະມານ 30 ປີ ບໍ່ຮູ້ບ່ອນຢູ່ ຈຳນວນ 5 ຖົງ ແລະ ຂາຍໃຫ້ກັບໄວລຸ້ນທີ່ມັກມາຊື້ນຳຜູ້ກ່ຽວ ແລະ ໃນໄລຍະເດືອນມີນາ 2018 ທ້າວ ລີຕ້າ ໄດ້ໂທໃຫ້ເອົາຢາບ້າ ຈຳນວນ 1 ມັດ ກັບ 5 ຖົງ ໄປສົ່ງໃຫ້ ທ້າວ ສີ ຢູ່ສວນອາຫານຈໍາປາ ເຂດບ້ານດົງສ້າງຫີນ ເມືອງໄຊທານີ ນະຄອນຫຼວງວຽງຈັນ ແລະ ກໍໄປສົ່ງໃຫ້ສໍາເລັດ. ຕໍ່ມາໃນວັນທີ 22 ມີນາ 2018 ໄດ້ມີຊາຍບໍ່ຮູ້ຊື່ ໂທລະສັບມາຫາບອກວ່າ ຕ້ອງການຊື້ຢາບ້າ ຈຳນວນ 6 ມັດ ເທົ່າກັບ 12.000 ເມັດ. ຕົນກໍໄດ້ບອກວ່າ: ມື້ອື່ນຈະໄປສົ່ງໃຫ້. ຈາກນັ້ນ, ໄດ້ໂທລະສັບສັ່ງຊື້ຕິດໜີ້ຢາບ້ານຳ ທ້າວ ລີຕ້າ ຈຳນວນ 14 ມັດ, ໂດຍນັດຈຸດສົ່ງຢາຢູ່ເຂດເສັ້ນທາງ 450 ປີ. ຕໍ່ມາເວລາ 19:00 ໂມງ ຂອງມື້ດຽວກັນ ໄດ້ຂັບຂີ່ລົດຈັກເວບຮ້ອຍ ສີແດງດຳ ໝາຍເລກທະບຽນ ດທ 0928 ກໍາແພງນະຄອນ ອອກໄປລໍຖ້າ ທ້າວ ລີຕ້າ ຢູ່ຈຸດນັດພົບໄດ້ປະມານ 15 ນາທີ ລູກນ້ອງຂອງ ທ້າວ ລີຕ້າ ຂັບຂີ່ລົດຈັກເວບຮ້ອຍ ສີດຳ ບໍ່ຈື່ປ້າຍທະບຽນ ມາຫາແລ້ວຍື່ນຖົງຢາງສີແດງທີ່ບັນຈຸຢາບ້າ ມີຈຳນວນ 4 ແພັກ ກັບ 2 ມັດ ລວມທັງໝົດ 14 ມັດ ເທົ່າກັບ 28.000 ເມັດ ແລ້ວກໍພາກັນແຍກທາງ, ເມື່ອໄດ້ຢາບ້າຕາມທີ່ຕ້ອງການແລ້ວກໍຂີ່ລົດກັບເຮືອນ ແລະ ນໍາເອົາຢາບ້າ ຈຳນວນ 8 ມັດ ຊຸກເຊື່ອງໄວ້ແຄມຮົ້ວເຮືອນ ແລະ ອີກ 6 ມັດ ໄດ້ເອົາຂີ້ເຫຍື້ອປົກໄວ້ ຈຸດປະສົງກຽມໄວ້ຂາຍໃຫ້ກັບຊາຍຄົນທ່ີຕິດຕໍ່ກັນໄວ້ໃນກ່ອນໜ້ານັ້ນ.

ຕົກມາໃນວັນທີ 23 ມີນາ 2018, ຊາຍທີ່ສັ່ງຊື້ຢາບ້າ ໄດ້ໂທລະສັບມາຫາບອກວ່າ ຢາບ້າກຽມລະບໍ ນາງ ເຊັງທໍ່ ໄດ້ບອກວ່າໃຫ້ມາຮັບເອົາຢູ່ເຂດເສັ້ນທາງຫຼັກ 16 ທາງໄປສະໜາມກິລາແຫ່ງຊາດ ພາຍຫຼັງ ນາງ ເຊັງທໍ່ ໄດ້ອອກໄປຮອດຈຸດນັດໝາຍ ກໍຖືກເຈົ້າໜ້າທີ່ສືບຮູ້ໄດ້ສະແດງຈັບຕົວຜູ້ກ່ຽວພ້ອມຢາບ້າ ຈຳນວນ 6 ມັດ; ຈາກນັ້ນ, ໄດ້ນຳຕົວມາກວດຄົ້ນເຮືອນພົບຢາບ້າ ຈຳນວນ 8 ມັດ ທີ່ຊຸກເຊື່ອງໄວ້ແຄມຮົ້ວເຮືອນ ລວມທັງໝົດມີຢາບ້າ ຈຳນວນ 14 ມັດ ເທົ່າກັບ 28.000 ເມັດ ມາດຳເນີນຄະດີ.

ເຈົ້າໜ້າທີ່ຍັງໃຫ້ຮູ້ອີກວ່າ: ກ່ອນມ້າງລາຍຄະດີດັ່ງກ່າວນີ້ ແມ່ນໄດ້ຮັບການຮ່ວມມືຈາກປະຊາຊົນເຂດດັ່ງກ່າວ ທີ່ລາຍງານຕໍ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ນະຄອນຫຼວງວຽງຈັນ ວ່າ ນາງ ເຊັງທໍ່ ໄດ້ເຄື່ອນໄຫວຄ້າຂາຍຢາເສບຕິດທີ່ສະແດງອອກໃນແຕ່ລະມື້ ມັກມີໄວລຸ້ນທຽວເຂົ້າອອກເຮືອນຂອງຜູ້ກ່ຽວແບບຜິດປົກກະຕິ ແລະ ຜູ້ກ່ຽວກໍມັກອອກໄປນອກເຮືອນບໍ່ດົນກໍກັບ. ພາຍຫຼັງເຈົ້າໜ້າທີ່ວິຊາສະເພາະລົງຕິດຕາມການເຄື່ອນໄຫວຂອງຜູ້ກ່ຽວ ກໍພົບວ່າມີມູນຄວາມຈິງແທ້, ມາວັນທີ 23 ມີນາ 2018 ສາຍລາຍງານວ່າ ນາງ ເຊັງທໍ່ ກຳລັງນຳຢາບ້າຫຼາຍພັນເມັດໄປສົ່ງລູກຄ້າຢູ່ເຂດເສັ້ນທາງຫຼັກ 16 ຈຶ່ງໄດ້ນຳກຳລັງເຂົ້າສະກັດຈັບຕົວມາດຳເນີນຄະດີຕໍ່ກັບພັກພວກທີ່ຮ່ວມຊື້-ຂາຍຢາບ້ານຳຜູ້ກ່ຽວ, ປັດຈຸບັນທາງເຈົ້າໜ້າທີ່ໄດ້ຂຶ້ນເປົ້າໝາຍຕິດຕາມຈັບຕົວມາດຳເນີນຄະດີ


ພາບ-ຂ່າວ: ນສພ ຄວາມສະຫງົບ
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.