Header Ads

ເຮັດບຸນຕັກບາດ 2 ແຜ່ນດິນ ຕາມໂຄງການຈັດງານອາທິດວິສາຂະບູຊາ ແລະ ອັດທະມີບູຊາອາຊຽນ ສານສຳພັນໄມຕີ



ເມືອງແກ່ນທ້າວ ແຂວງໄຊຍະບູລີ ແລະ ອຳເພີທ່າລີ່ຈັງຫວັດເລີຍ ໄດ້ຮ່ວມກັນຈັດກິດຈະກຳເຮັດບຸນຕັກບາດ 2 ແຜ່ນດິນຕາມໂຄງການຈັດງານອາທິດວິສາຂະບູຊາແລະອັດທະມີບູຊາອາຊຽນສານສຳພັນໄມຕີໃນມິຕິພຣະພຸດທະສາດສະໜາຂຶ້ນ. ຢູ່ທີ່ ຂົວມິດຕະພາບນໍ້າເຫືອງລາວ-ໄທ ໃນຕອນເຊົ້າຂອງວັນທີ 20 ມິຖຸນາ 2018 ເຊິ່ງກົງກັບມື້ຂຶ້ນ 8 ຄໍ່າເດືອນ 8 ພສ 2561. ເປັນກຽດເຂົ້າຮ່ວມໃນພິທີຄັ້ງນີ້,ມີທ່ານ ອໍາຄາ ລັດສະໝີຮອງເຈົ້າເມືອງໆແກ່ນທ້າວ,ທ່ານ ບຸນເລີດ ລັນທະນາ ນາຍອຳເພີທ່າລີ ພ້ອມດ້ວຍພຸດທະສາສະນິກະຊົນທັງສອງປະເທດເຂົ້າຮ່ວມຢ່າງຫຼວງຫຼາຍ.



ໃນພິທີໄດ້ຈູດທູບທຽນບູຊາພະລັດຕະນະໄຕ,ສາມາທານສິນ,ສູດປະລິຕະມຸງຄຸນ,ຖວາຍເຄື່ອງໄທຍະທານ. ຈາກນັ້ນ ປະທານທັງສອງຝ່າຍໄດ້ກ່າວພົບປະຜູ້ເຂົ້າຮ່ວມໃນກິດຈະກໍາ ແລະຮ່ວມກັນຕັກບາດແດ່ພະສົງ 80 ອົງ.ໂດຍພຸດທະສາສະນິກະຊົນໄດ້ນັ່ງເປັນແຖວຍາວຕາມສອງຂ້າງຂົວເພື່ອໃສ່ບາດດ້ວຍຈິດໃຈເຫຼື້ອມໃສສັດທາໃນພຸດທະສາດສະໜາ.


ທັ້ງນີ້,ເພື່ອເປັນການເສີມສ້າງສາຍສຳພັນທະໄມຕີລະຫວ່າງ ເມືອງແກ່ນທ້າວ ແລະ ອໍາເພີທ່າລີ່ທີ່ມີມາແຕ່ດົນນານໃຫ້ແໜ້ນແຟ້ນຍິ່ງຂື້ນ,ສິ່ງສຳຄັນພຸດທະສາສະນິກະຊົນທັງສອງປະເທດໄດ້ຮ່ວມກັນເຮັດບຸນໃນວັນສຳຄັນທາງພຸດທະສາດສະໜາແລະນ້ອມນຳຄຳສອນຂອງອົງສຳມາສຳພຸດທະເຈົ້າໄປເປັນແນວທາງປະຕິບັດໃນຊີວິດປະຈຳວັນໃຫ້ໄດ້ຮັບຜົນດີຍິ່ງຂຶ້ນ.






ພາບ ແລະ ຂ່າວ: ຖວທ ເມືອງແການທ້າວ 
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.