Header Ads

ວັງວຽງ ວາງເປົ້າຈະສ້າງເມືອງໃຫ້ເປັນເມືອງທ່ອງທ່ຽວສະອາດອາຊຽນ ໃນປີ 2020



ອີງຕາມການລາຍງານຂອງ ໜັງສືພິມເສດຖະກິດ-ການຄ້າ ວ່າ: ເມືອງວັງວຽງ ຖືວ່າເປັນເມືອງທ່ອງທ່ຽວລະດັບຕົ້ນໆຂອງປະເທດລາວ ເນື່ອງຈາກວ່າມີສະຖານທີ່ທ່ອງທ່ຽວທີ່ເປັນທຳມະຊາດຫຼາກຫຼາຍບ່ອນ ເໝາະແກ່ການມາທ່ຽວຊົມ, ພັກຜ່ອນ ແລະ ເຮັດກິດຈະກຳຕ່າງໆໄດ້ເປັນຢ່າງດີ. ສະນັ້ນ, ຈຶ່ງເຮັດໃຫ້ນັກທ່ອງທ່ຽວພາກັນຫຼັ່ງໄຫຼເຂົ້າໄປທ່ອງທ່ຽວທີ່ເມືອງວັງວຽງ ນັບມື້ຫຼາຍຂຶ້ນໂດຍສະເພາະແມ່ນນັກທ່ອງທ່ຽວທີ່ມາຈາກຕ່າງປະເທດ.






ຈາກການເຂົ້າມາຂອງນັກທ່ອງທ່ຽວ ເຖິງວ່າຈະເປັນຜົນດີໃຫ້ແກ່ການພັດທະນາເສດຖະກິດ – ສັງຄົມ, ສາມາດສ້າງວຽກເຮັດງານທຳ ແລະ ສ້າງລາຍຮັບໃຫ້ກັບປະຊາຊົນຊາວເມືອງວັງວຽງແລ້ວ ອີກດ້ານໜຶ່ງກໍ່ຍັງເປັນສິ່ງທີ່ທ້າທາຍໃນການຄວບຄຸມແກ້ໄຂບັນຫາຕ່າງໆທີ່ອາດຈະເກີດຂຶ້ນຈາກການເຂົ້າມາຂອງນັກທ່ອງທ່ຽວ ເປັນຕົ້ນແມ່ນ: ບັນຫາເລື່ອງສິ່ງແວດລ້ອມ, ການຮັກສາຄວາມສະອາດ, ການຮັກສາວັດທະນະທຳ – ຮີດຄອງປະເພນີອັນດີງາມຂອງລາວ ແລະ ອື່ນໆ ເຊິ່ງອາດຈະເປັນສິ່ງທ້າທາຍໃນການທີ່ເມືອງວັງວຽງ ຈະກ້າວໄປເປັນເມືອງທ່ອງທ່ຽວສະອາດອາຊຽນໄດ້ໃນປີ 2020.



ອີງຕາມ ທ່ານ ຄຳຜ່ອງ ດວງວິໄລ ເຈົ້າເມືອງໆວັງວຽງ ໃຫ້ຄວາມຄິດເຫັນວ່າ: ການທີ່ເມືອງວັງວຽງ ຈະກ້າວໄປເປັນເມືອງທ່ອງທ່ຽວສະອາດອາຊຽນໄດ້ນັ້ນ ແມ່ນບໍ່ໄດ້ຂຶ້ນຢູ່ກັບສະເພາະແຕ່ພາກສ່ວນທີ່ກ່ຽວຂ້ອງເປັນຜູ້ຈັດຕັ້ງປະຕິບັດແຕ່ຝ່າຍດຽວ, ແຕ່ມັນຂຶ້ນຢູ່ກັບການຮ່ວມມືຂອງທຸກໆພາກສ່ວນ ບໍ່ວ່າຈະເປັນອົງການພັດທະນາ ແລະ ບໍລິຫານຕົວເມືອງ ( ອພບຕ ) ເມືອງ, ຫ້ອງການຊັບພະຍາກອນ ແລະ ສິ່ງແວດລ້ອມ, ຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງ, ຫ້ອງການໂຍທາທິການ ແລະ ຂົນສົ່ງເມືອງ, ຕະຫຼອດຮອດຜູ້ປະກອບການດ້ານທຸລະກິດຕ່າງໆ ໄປຈົນເຖິງພໍ່ແມ່ປະຊາຊົນທີ່ອາໄສຢູ່ທີ່ເມືອງວັງວຽງ ແລະ ນັກທ່ອງທ່ຽວທີ່ເຂົ້າມາທ່ຽວຢູ່ທີ່ເມືອງວັງວຽງ ທີ່ຕ້ອງໄດ້ເປັນເຈົ້າການເພື່ອຊ່ວຍກັນຮັກສາສິ່ງແວດລ້ອມ, ການຮັກສາຄວາມສະອາດຢູ່ຕາມແຫຼ່ງທ່ອງທ່ຽວຕ່າງໆ, ຕາມຖະໜົນຫົນທາງ ແລະ ສະຖານທີ່ອື່ນໆ ໃຫ້ມີຄວາມສະອາດຈົບງາມ, ມີຄວາມເປັນລະບຽບຮຽບຮ້ອຍຢູ່ເລື້ອຍໆ.





ນອກຈາກນັ້ນ, ບັັນດາພະແນກການທີ່ກ່ຽວຂ້ອງຕ່າງໆຕ້ອງໄດ້ມີການຂຽນໂຄງການກ່ຽວກັບການສ້າງເມືອງວັງວຽງ ໃຫ້ກາຍເປັນເມືອງທ່ອງທ່ຽວສະອາດຂຶ້ນມາ ໂດຍອີງໃສ່ມາດຕະຖານຂອງອາຊຽນໄດ້ວາງອອກ, ອີກທັງຕ້ອງໄດ້ປະສານສົມທົບກັບອົງການຈັດຕັ້ງສາກົນທີ່ມີຄວາມຕ້ອງການຢາກສະໜັບສະໜູນໃນໂຄງການດັ່ງກ່າວ ເພື່ອຂໍບົດຮຽນກ່ຽວກັບມາດຕະຖານ, ຄວາມສະອາດ ແລະ ການພັດທະນາຈາກຕ່າງປະເທດທີ່ໄດ້ຮັບເລືອກໃຫ້ເປັນເມືອງທ່ອງທ່ຽວສະອາດມາກ່ອນໜ້ານີ້.

ທ່ານເຈົ້າເມືອງ ບອກອີກວ່າ: ແນວໃດກໍ່ດີທາງເມືອງຂອງພວກເຮົາກໍ່ໄດ້ມີການວາງຄາດໝາຍສູ້ຊົນ ເພື່ອສ້າງໃຫ້ເປັນເມືອງທ່ອງທ່ຽວສະອາດໃຫ້ໄດ້ ເຖິງວ່າຈະມີສິ່ງທ້າທາຍຫຼາຍຢ່າງກໍ່ຕາມ. ນອກຈາກນີ້, ກໍ່ຍັງຈະມີການອອກລະບຽບການຕ່າງໆກ່ຽວກັບການປົກປັກຮັກສາຄວາມສະອາດ, ສິ່ງແວດລ້ອມ ແລະ ອື່ນໆພາຍໃນຕົວເມືອງ ເພື່ອເປັນການຄຸ້ມຄອງໃຫ້ມີຄວາມເປັນລະບຽບຮຽບຮ້ອຍຫຼາຍຂຶ້ນ ກວ່າເກົ່າ.



ດ້ານ ທ່ານ ບຸນມີ ພົມມະວົງສາ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ເມືອງວັງວຽງ ກ່າວວ່າ: ຕາມສະຖິຕິນັກທ່ອງທ່ຽວເຂົ້າມາທ່ຽວທີ່ເມືອງວັງວຽງ ໃນປີ 2017 ຜ່ານມາມີທັງໝົດ 189,000 ກວ່າຄົນ. ໃນນັ້ນ, ມີນັກທ່ອງທ່ຽວພາຍໃນ 40 ພັນກວ່າຄົນ ແລະ ນັກທ່ອງທ່ຽວຕ່າງປະເທດ 149,000 ກວ່າຄົນ, ສະເລ່ຍລາຍຮັບເຂົ້າເມືອງວັງວຽງ ປະມານ 94 ຕື້ກວ່າກີບ; ທົ່ວເມືອງມີໂຮງແຮມ 19 ແຫ່ງ, ຣີສອດ 12 ແຫ່ງ, ເຮືອນພັກ 122 ແຫ່ງ, ໂຮມສະເຕ 1 ແຫ່ງ ( ມີ 8 ຫຼັງຕັ້ງຢູ່ບ້ານນາດ້ວງ ), ມີຮ້ານອາຫານທັງໝົດ 106 ແຫ່ງ, ຮ້ານກິນດື່ມ 24 ແຫ່ງ ແລະ ຮ້ານບັນເທີງ 7 ແຫ່ງ, ມີຮ້ານນວດແຜນບູຮານ 24 ຫົວໜ່ວຍ; ມີແຫຼ່ງທ່ອງທ່ຽວທຳມະຊາດທັງໝົດ 43 ແຫ່ງ. ໃນນັ້ນ, ມີຖ້ຳ 34 ແຫ່ງ, ຜາຊົມວິວ 4 ແຫ່ງ, ອ່າງນ້ຳທຳມະຊາດ 3 ແຫ່ງ ແລະ ນ້ຳຕົກຕາດ 2 ແຫ່ງ; ມີໜ່ວຍບໍລິການກົງເບັງ 12 ໜ່ວຍ, ໜ່ວຍບໍລິການເຮືອກາຍັກ 24 ໜ່ວຍ, ໜ່ວຍບໍລິການທ່ອງທ່ຽວບອລລູນ 1 ໜ່ວຍ ( ມີບອລລູນ 3 ໜ່ວຍ ); ມີໜ່ວຍບໍລິການເຮືອຈັກຫາງຍາວນຳທ່ຽວ 1 ກຸ່ມ, ມີ 6 ໜ່ວຍ ( ມີເຮືອ 90 ລຳ ), ມີລົດຈັກ, ລົດຖີບ ແລະ ລົດ 4 ລໍ້ໃຫ້ເຊົ່າ 7 ຫົວໜ່ວຍ ລວມທັງໝົດ 235 ຄັນ; ມີໜ່ວຍບໍລິການປີນຜາ 1 ຫົວໜ່ວຍ ແລະ ມີສາຍສະລິງ 7 ໜ່ວຍ; ມີບໍລິສັດທ່ອງທ່ຽວພາຍໃນເມືອງວັງວຽງ 18 ບໍລິສັດ ແລະ ໜ່ວຍບໍລິການຂາຍປີ້ທົວມີ 6 ຫົວໜ່ວຍ.



ສຳລັບມາດຕະຖານເມືອງທ່ອງທ່ຽວສະອາດອາຊຽນ ແລະ ຕົວຊີ້ວັດທີ່ທາງອາຊຽນ ໄດ້ກຳນົດໄວ້ໃນເບື້ອງຕົ້ນ ປະກອບດ້ວຍຕົວຊີ້ວັດດ້ານການຄຸ້ມຄອງສິ່ງແວດລ້ອມ, ຜັງເມືອງ, ລະບຽບດ້ານສິ່ງແວດລ້ອມ, ມົນລະພິດ ( ທາງນໍ້າ, ທາງອາກາດ ແລະ ທາງສຽງ ), ການຂົນສົ່ງທີ່ເປັນມິດກັບສິ່ງແວດລ້ອມ, ການນໍາໃຊ້ພະລັງງານແບບຍືນຍົງ; ຕົວຊີ້ວັດດ້ານຄວາມສະອາດ ປະກອບມີ: ຄວາມສະອາດຂອງສະຖານທີ່ສາທາລະນະ, ຄວາມສະອາດຂອງຫ້ອງນໍ້າສາທາລະນະ, ຄວາມສະອາດຂອງແຫຼ່ງທ່ອງທ່ຽວ ( ຫໍພິພິທະພັນ, ວັດ, ສວນອຸທິຍານ, ຫາດຊາຍ ແລະ ອື່ນໆ ), ຄວາມສະອາດຕາມຖະໜົນຫຼັກ




ຕົວຊີ້ວັດການຈັດການຂີ້ເຫຍື້ອ ປະກອບມີ: ການເກັບນໍ້າເສຍ, ການເກັບຂີ້ເຫຍື້ອ, ການເກັບ ແລະ ບໍາບັດນໍ້າເສຍ, ການເກັບ ແລະ ບໍາບັດຂີ້ເຫຍື້ອ, ການນໍາເອົາຂີ້ເຫຍື້ອມາໃຊ້ຄືນໃໝ່, ການປູກຈິດສໍານຶກກ່ຽວກັບການອະນຸລັກສິ່ງແວດລ້ອມ ແລະ ຕົວຊີ້ວັດຄວາມສະອາດ ປະກອບມີ: ການປູກຈິດສໍານຶກກ່ຽວກັບການອະນຸລັກສິ່ງແວດລ້ອມ ແລະ ຄວາມສະອາດໃຫ້ແກ່ປະຊາຊົນໃນທ້ອງຖິ່ນ, ການປູກຈິດສໍານຶກກ່ຽວກັບການອະນຸລັກສິ່ງແວດລ້ອມ ແລະ ຄວາມສະອາດໃຫ້ແກ່ຜູ້ປະກອບການທ່ອງທ່ຽວ, ການປູກຈິດສໍານຶກກ່ຽວກັບການອະນຸລັກສິ່ງແວດລ້ອມ ແລະ ຄວາມສະອາດໃຫ້ແກ່ນັກທ່ອງທ່ຽວ

ຕົວຊີ້ວັດພື້ນທີ່ສີຂຽວ ປະກອບມີ: ຈໍານວນພື້ນທີ່ສີຂຽວໃນເມືອງ, ການຮັກສາ ແລະ ຄຸ້ມຄອງພື້ນທີ່ສີຂຽວ; ຕົວຊີ້ວັດຄວາມປອດໄພດ້ານສຸຂະພາບ, ຄວາມປອດໄພ ແລະ ຄວາມສະຫງົບໃນເມືອງ ປະກອບມີ: ຄວາມປອດໄພດ້ານສຸຂະພາບ, ຄວາມປອດໄພ ແລະ ຄວາມສະຫງົບໃນເມືອງ, ການປ້ອງກັນອາຊະຍາກໍາ ແລະ ການບັງຄັບໃຊ້ກົດລະບຽບ ( ການຄ້າໂສເພນີເດັກ, ຢາເສບຕິດ ແລະ ອື່ນໆ ), ແຜນການຮັບມືກັບຄວາມສ່ຽງ; ຕົວຊີ້ວັດໂຄງລ່າງພື້ນຖານ ແລະ ສິ່ງອໍານວຍຄວາມສະດວກດ້ານການທ່ອງທ່ຽວ ປະກອບມີ: ການວາງແຜນການທ່ອງທ່ຽວ, ສູນຂໍ້ມູນ, ປ້າຍບອກທາງ ແລະ ແຜນທີ່ທ່ອງທ່ຽວ, ທີ່ຕັ້ງສູນການຄ້າ ແລະ ຮ້ານເຄື່ອງຍ່ອຍ, ສະຖານທີ່ພັກຜ່ອນ ( ສະຖານທີ່ທ່ອງທ່ຽວ, ສວນອຸທິຍານ, ກີລາ ແລະ ການພັກຜ່ອນ ), ລະດັບຄວາມເພິ່ງພໍໃຈຂອງນັກທ່ອງທ່ຽວ ແລະ ອື່ນໆ.


ຂໍ້ມູນ : ໜັງສືພິມເສດຖະກິດ-ການຄ້າ
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.