Header Ads

ແຂວງໄຊຍະບູລີຈັດພິທີທໍາລາຍຢາເສບຕິດ ເນື່ອງໃນໂອກາດສະເຫຼີມ - ສະຫຼອງ ວັນສາກົນຕ້ານຢາເສບຕິດ ຄົບຮອບ 31 ປີ




ເນື່ອງໃນໂອກາດສະເຫຼີມ - ສະຫຼອງ ວັນສາກົນຕ້ານຢາເສບຕິດ ຄົບຮອບ 31 ປີ ( ວັນທີ 26 ມິຖຸນາ 1987 – 26 ມິຖຸນາ 2018 ) ຄະນະພັກ - ອໍານາດການປົກຄອງແຂວງ ໄຊຍະບູລີ ໄດ້ຈັດພິທີທໍາລາຍຢາເສບຕິດຂື້ນ. ຢູ່ທີ່ເດີ່ນກິລາຂອງແຂວງ ໃນຕອນເຊົ້າວັນທີ 26 ມິຖຸນາ 2018 ນີ້. ໂດຍການໃຫ້ກຽດເຂົ້າຮ່ວມເປັນປະທານຂອງທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ; ມີບັນດາທ່ານພະນັກງານການນໍາຂອງແຂວງ, ການນໍາເມືອງໄຊຍະບູລີ , ພະນັກງານຫຼັກແຫຼ່ງຈາກບັນດາພະແນກການ , ອົງການ, ກົມກອງ, ສະຖາບັນການສຶກສາ, ໂຮງຮຽນ , ລັດວິສາຫະກິດ, ພ້ອມດ້ວຍຕາງໜ້າຈາກ 15 ບ້ານ ເທດສະບານແຂວງເຂົ້າຮ່ວມ ຢ່າງຫຼວງຫຼາຍ.






ທ່ານ ພົງສະຫວັນ ສິດທະວົງ ຕາງໜ້າຄະນະພັກ - ອໍານາດການປົກຄອງ ແລະ ປະຊາຊົນບັນດາເຜົ່າພາຍໃນແຂວງ ໄດ້ໃຫ້ກຽດຂື້ນກ່າວຄໍາປາໄສຕໍ່ພິທີໂຮມຊຸມນຸມ ໂດຍຍົກໃຫ້ເຫັນຄວາມ ໝາຍຄວາມສໍາຄັນຂອງວັນສາກົນຕ້ານຢາເສບຕິດ, ສະພາບການແຜ່ຂະຫຍາຍຂອງຢາເສບຕິດ; ມາດຕະການປ້ອງກັນ ແລະ ປາບປາມຢາເສບຕິດໃນໄລຍະຜ່ານມາ ທ່ານກ່າວວ່າ: ບັນຫາຢາເສບຕິດແມ່ນບັນຫາກວມລວມຂອງໂລກທີ່ເປັນໄພອັນຕະລາຍຮ້າຍແຮງຕໍ່ມວນມະນຸດ; ເປັນອຸປະສັກໃນການກົດໜ່ວງຖ່ວງດຶງແກ່ການສ້າງສາພັດທະນາເສດຖະກິດ - ສັງຄົມ; ທັງເປັນບໍ່ເກີດແຫ່ງການກໍ່ອາຊະຍາກໍາ ແລະ ຍັງໄດ້ນໍາເອົາຄວາມຫາຍຍານະມາສູ່ຊີວິດ ແລະ ຄອບຄົວຂອງຜູ້ທີ່ຕົກເປັນທາດຂອງຢາເສບຕິດ; ສໍາລັບຢູ່ແຂວງໄຊຍະບູລີ ກໍ່ໄດ້ຊຸກຍູ້ຄະນະກວດກາ ແລະ ຄວບຄຸມຢາເສບຕິດແຕ່ລະຂັ້ນ, ຂະແໜງການ - ອົງການທີ່ກ່ຽວຂ້ອງທຸກພາກສ່ວນເພີ່ມທະວີເອົາໃຈໃສ່ໃນການສະກັດກັ້ນ ແລະ ປາບປາມສິ່ງເສບຕິດດ້ວຍຄວາມຮັບຜິດຊອບສູງ. ໂດຍການນໍາເອົາລະບຽບກົດໝາຍ, ຜົນຮ້າຍຂອງຢາເສບຕິດ ລົງໂຄສະນາສຶກສາອົບຮົມທຸກຊັ້ນຄົນໃນສັງຄົມທັງໝົດ 38 ຄັ້ງ ມີຜູ້ເຂົ້າຮ່ວມ 5.600 ກວ່າເທື່ອຄົນ; ສ້າງບ້ານປອດຢາເສບຕິດໄດ້ 207 ບ້ານ, ໂຮງຮຽນປອດຢາເສບຕິດ 84 ແຫ່ງ.




ປັດຈຸບັນ ທົ່ວແຂວງມີຜູ້ຕິດຢາເສບຕິດທັງໜົດ 1. 145 ຄົນ,ຍິງ 15 ຄົນ. ໃນປີຜ່ານມາໄດ້ນໍາເອົາຜູ້ຖືກເຄາະຮ້າຍຈາກຢາເສບຕິດເຂົ້າບໍາບັດປິ່ນປົວສຸຂະພາບ, ສຶກສາອົບຮົມທັງໝົດ 568 ຄົນ, ຍິງ 4 ຄົນ; ແກ້ໄຂຄະດີໄດ້ 151 ເລື່ອງ, ກັກຕົວຜູ້ຖືກຫາໄດ້ 281 ຄົນ, ຍິງ 31 ຄົນ ຍຶດຂອງກາງຢາບ້າ 109.707 ເມັດ, ຢາຝິ່ນ 735,8 ກຼາມ, ຢາໄອສ 1,4 ກຼາມ, ເງິນກີບ 405 ລ້ານກີບ, ເງິນບາດ 132.000 ກວ່າບາດ, ຄໍາຮູບປະພັນ 17 ເສັ້ນ, ລົດກະບະ 03 ຄັນ, ລົດເກັງ 01 ຄັນ, ລົດຈັກ 27 ຄັນ, ໂທລະສັບ 169 ເຄື່ອງ, ອາວຸດ 21 ກະບອກ, ລູກປືນ 591 ລູກ, ໜາກແຕກ 07 ໜ່ວຍ ມາດໍາເນີນຄະດີຕາມກົດໝາຍຢ່າງເຂັ້ມງວດ. ໂດຍຜ່ານການສືບສວນ - ສອບສວນສົ່ງຄະດີໃຫ້ອົງການໄອຍະການປະຊາຊົນສັ່ງຟ້ອງໃຫ້ສານຕັດສິນທີ່ໃຊ້ໄດ້ຢ່າງເດັດຂາດແລ້ວ 80 ເລື່ອງ, ມີຜູ້ຖຶກຫາ 117 ຄົນ, ຍິງ 19 ຄົນ, ມີຂອງກາງຢາບ້າ 60.760 ເມັດ.



ຈາກນັ້ນ, ທ່ານເຈົ້າແຂວງໄຊຍະບູລີ ພ້ອມດ້ວຍຄະນະປະທານ ແລະ ພາກສ່ວນຕ່າງໆ ໄດ້ຮ່ວມກັນຕັບແຖບຖ້າ ແລະ ຕັດຊອງຂອງກາງຢາເສບຕິດ, ພ້ອມທັງຈູດ ແລະ ທໍາລາຍຢາເສບຕິດທີ່ຍຶດໄດ້ຈາກຄະດີຢາເສບຕິດ ໃນປີ 2018 ໂດຍສານໄດ້ຕັດສິນແລ້ວ. ເຊິ່ງຢາເສບຕິດທີ່ນໍາມາຈູດ - ທໍາລາຍຖີ້ມໃນປີນີ້ມີຢາບ້າ 60.760 ເມັດ, ຫຼື ເທົ່າກັບ 6.445,2 ກຼາມ ແລະ ຢາຝິ່ນຈໍານວນ 219,5 ກຼາມ. ທ່ານ ພົງສະຫວັນ ສິດທະວົງ ຍັງໄດ້ຮຽກຮ້ອງບັນດາອົງການຈັດຕັ້ງສັງຄົມ ຈົ່ງຮ່ວມໃຈກັນ ເພີ່ມທະວີໃນການສະກັດກັ້ນ ແລະ ປາບປາມຢາເສບຕິດຢ່າງເຂັ້ມງວດ; ເຮັດໃຫ້ສິ່ງເສບຕິດທຸກປະເພດໝົດໄປຈາກສັງຄົມເຮົາຢ່າງສີ້ນເຊີງ. 



ຂໍ້ມູນ: ຂ່າວແຂວງໄຊຍະບູລີ
© ໂຕະນໍ້າຊາ  | www.tonamcha.com | www.tonamchanews.com
_______





No comments

Powered by Blogger.