Header Ads

ປະກາດແຕ່ງຕັ້ງໜ້າທີ່ ຮັກສາການຫົວໜ້າຫ້ອງວ່າການປົກຄອງແຂວງຫຼວງພະບາງ



ວັນທີ່ 6 ມິຖຸນາ 2018 ຜ່ານມານີ້ ຫ້ອງວ່າການປົກຄອງ ແຂວງຫຼວງພະບາງ ໄດ້ຈັດພິທີເຊັນບົດບັນທຶກມອບ-ຮັບ ໜ້າທີ່ ຫົວໜ້າຫ້ອງການວ່າການປົກຄອງແຂວງ ລະຫວ່າງ ຜູ້ເກົ່າ ແລະຜູ້ໃໝ່ຂື້ນ ຢູ່ຫ້ອງປະຊຸມໃຫຍ່ຂອງຫ້ອງວ່າການປົກຄອງແຂວງ ໂດຍການເປັນປະທານຂອງ ທ່ານ ບົວຄົງ ນາມມະວົງ ຮອງເຈົ້າແຂວງຫຼວງພະບາງ, ມີຫົວໜ້າພະແນກການຂອງແຂວງ, ຫົວໜ້າຫ້ອງວ່າການປົກຄອງເມືອງ, ຕະຫຼອດຮອດ ພະນັກງານລັດຖະກອນ ພາຍໃນຫ້ອງວ່າການປົກຄອງແຂວງເຂົ້າຮ່ວມ. ພິທີ ທ່ານ ຫຼ້າ ສຸດາພອນ ຮອງຫົວໜ້າຄະນະຈັດຕັ້ງແຂວງ ໄດ້ຂຶ້ນຜ່ານຂໍ້ຕົກລົງຂອງທ່ານເຈົ້າແຂວງຫຼວງພະບາງ ວ່າດ້ວຍການແຕ່ງຕັ້ງ ທ່ານ ຈິນດາວົງ ໂພສີຄຳ ຮອງຫົວໜ້າວ່າການປົກຄອງແຂວງ ຂຶ້ນເປັນຮັກສາການ ຫົວໜ້າຫ້ອງວ່າການປົກຄອງແຂວງ. 

ຈາກນັ້ນ ຫົວໜ້າຫ້ອງວ່າການປົກຄອງແຂວງຜູ້ເກົ່າ ໄດ້ຂຶ້ນຜ່ານຜົນງານ ການຈັດຕັ້ງປະຕິບັດຊີ້ນຳນຳພາວຽກງານໃນໄລຍະສອງປີຜ່ານມາ ພ້ອມທັງກ່າວມອບ ໜ້າທີ ແລະຮ່ວມລົງນາມເຊັນບົດບັນທຶກວຽກງານຂອງຫ້ອງວ່າປົກຄອງແຂວງ ໃຫ້ຜູ້ໃໝ່ຮັບຜິດຊອບຊີ້ນຳຕໍ່ໄປ.
ເພື່ອເຮັດໃຫ້ການມອບຮັບໜ້າທີ່ຄັ້ງນີ້ ມີຄວາມໝາຍສຳຄັນນັ້ນ ທ່ານ ບົວຄົງ ນາມມະວົງ ໄດ້ມີຄຳເຫັນວ່າ: ການແຕ່ງຕັ້ງ, ຍົກຍ້າຍຊັບຊ້ອນບ່ອນປະຈຳການຂອງພະ ນັກງານລັດຖະກອນ ພາຍໃນຫ້ອງວ່າການປົກຄອງແຂວງຄັ້ງນີ້, ເພື່ອແນໃສ່ ປັບປຸງກົງຈັກການຈັດຕັ້ງພາຍໃນແຂວງ ໃຫ້ມີຄວາມໜັກແໜ້ນ-ເຂັ້ມແຂງຂື້ນກວ່າເກົ່າ ແລະທັງເປັນການຊັບຊ້ອນພະນັກງານ ຜູ້ທີ່ມີບົດຮຽນ, ປະສົບການ, ຄວາມຮູ້ຄວາມສາມາດໃຫ້ຖືກຕ້ອງ ແລະສອດຄ່ອງກັບໜ້າທີ່ເມືອງ ໃນໄລຍະໃໝ່ ເພື່ອເຮັດໃຫ້ການຈັດຕັ້ງປະຕິບັດວຽກງານຂອງຫ້ອງວ່າການປົກຄອງແຂວງ ໄດ້ຮັບການປັບປຸງແກ້ໄຂດີຂື້ນກວ່າເກົ່າ. 

ສຳລັບ ທ່ານ ສຸລິສັກ ພົມມາລີ ຫົວໜ້າຫ້ອງວ່າການປົກຄອງແຂວງຜູ້ເກົ່າ ໄດ້ຮັບການແຕ່ງຕັ້ງ ໄປເປັນຮັກສາການ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງຫຼວງພະບາງ.
ໂດຍ: ແຫຼ້ ສຸລີນພອນ (Lao National Radio)
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.