Header Ads

ລັດຖະບານ​ໃຫ້​ຄວາມ​ສຳຄັນ​ໃນ​ການ​ຊຸກຍູ້​ພັດທະນາ ແລະ ສົ່ງເສີມ​ເດັກນ້ອຍ​ລາວ



ອີງຕາມການລາຍງານຂອງ ນສພ ວຽງຈັນໃຫ່ມ ວ່າ : ພິທີ​ສະເຫຼີມສະຫຼອງ​ວັນເດັກນ້ອຍ​ສາກົນ 1 ມິຖຸນາ 2018 ເຜີຍແຜ່​ແຜນ​ບຸລິມະສິດ​ຫຼາຍ​ຂະ ແໜງ​ການ​ໃນ​ການ​ແກ້​ໄຂ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ ແລະ ເວທີ​ຂອງ​ເດັກ​ຂອງ ​ສປປ ລາວ ຈັດ​ຂຶ້ນ​ວັນ​ທີ 31 ພຶດສະພາ 2018 ທີ່​ຫໍ​ວັດທະນະທຳ​ແຫ່ງ​ຊາດ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ທັງ​ເປັນ​ປະທານ​ຄະນະ​ກຳມາ​ທິ​ການ​ເພື່ອ​ຄວາມ​ກ້າວໜ້າ​ຂອງ​ແມ່ຍິງ ແລະ ແມ່-ເດັກ (​ຄຊກມດ) ທ່ານ ອົກ​ຕາ​ວຽນ ບີ​ໂວນ ຜູ້ຕາງໜ້າ​ອົງການ​ສະຫະ​ປະຊາ​ຊາດ ສຳລັບ​ເດັກ ປະຈຳ​ລາວ ຕະຫຼອດ​ຮອດ​ບັນດາ​ຮອງ​ລັດຖະມົນຕີ ຮອງ​ປະທານ​ອົງການ ກະຊວງ ອົງ​ການຈັດຕັ້ງ​ສາກົນ ອົງ​ການຈັດຕັ້ງ​ທາງ​ສັງຄົມ ຄູ-ອາຈານ ແລະ ນ້ອງ​ນັກຮຽນ​ຈາກ​ໂຮງຮຽນ​ອ້ອມ​ຂ້າງ ນະຄອນຫຼວງ​ວຽງ​ຈັນ 600 ຄົນ.



ວັນເດັກນ້ອຍ​ສາກົນ​ແມ່ນ​ເຫດການ​ໜຶ່ງ​ທີ່​ມີ​ຄວາມ​ໝາຍ ແນໃສ່​ບັນລຸ​ໃຫ້​ໄດ້​ຈຸດປະສົງ ທັງ​ປົກ​ປ້ອງ ແລະ ສັນລະເສີນ​ເດັກ​ໃນ​ທົ່ວ​ໂລກ ຍ້ອນ​ເຫັນ​ໄດ້​ຄວາມ​ສຳຄັນ​ຂອງ​ເດັກ​ທີ່​ເປັນ​ໜໍ່​ແໜງ​ແຫ່ງ​ຊີວິດ​ໃນ​ມື້ນີ້ ເພື່ອ​ກາຍເປັນ​ອະນາຄົດ​ອັນ​ແຈ່ມ​ໃສ​ຂອງ​ປະເທດ​ຊາດ​ໃນ​ມື້​ໜ້າ ບັນດາ​ປະຊາ​ຊາດ​ໃນ​ທົ່ວ​ໂລກ​ຈຶ່ງ​ໄດ້​ມີ​ການ​ສະເຫຼີມສະຫຼອງ​ວັນເດັກນ້ອຍ​ສາກົນ ໃນ​ປີ 2014 ສູນ​ສະຖິຕິ​ແຫ່ງ​ຊາດ ແລະ ຄະນະ​ກຳມາ​ທິ​ການ​ແຫ່ງ​ຊາດ​ເພື່ອ​ແມ່ ແລະ ເດັກ (ປັດຈຸບັນ ​ຄຊກມດ) ໄດ້​ດຳເນີນ​ການ​ສຳ​ຫຼວດ​ລະດັບ​ຊາດ​ກ່ຽວ​ກັບ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ​ເປັນ​ຄັ້ງ​ທຳ​ອິດ​ຢູ່ ​ສປປ ລາວ ເພື່ອ​ໃຫ້​ຮູ້​ບັນຫາ ແລະ ຊອກ​ວິທີ​ການ​ແກ້​ໄຂ ໃນ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ ເຊິ່ງ​ການ​ສຳ​ຫຼວດ​ໄດ້​ໃຫ້ການ​ຄາດ​ຄະເນ​ກ່ຽວ​ກັບ​ອັດຕາ​ສ່ວນ​ຄວາມ​ຮຸນ​ແຮງ​ທາງ​ຮ່າງກາຍ ທາງ​ຈິດໃຈ ແລະ ທາງ​ເພດ​ຕໍ່​ເດັກ ການ​ໃຫ້​ຂໍ້​ມູນ​ກ່ຽວ​ກັບ​ເງື່ອນໄຂ​ສະພາບ​ແວດ​ລ້ອມ​ທີ່​ມີ​ຄວາມ​ຮຸນ​ແຮງ​ຕໍ່​ເດັກ​ທີ່​ເກີດ​ຂຶ້ນ ພ້ອມ​ນັ້ນ ຜົນ​ຂອງ​ການ​ສຳ​ຫຼວດ​ຊີ້​ໃຫ້​ເຫັນ​ວ່າ ຍັງ​ມີ​ຫຼາຍ​ສິ່ງ​ທີ່​ສາມາດ​ດຳເນີນ​ການ​ໄດ້ ແລະ ຄວນ​ດຳເນີນ​ການ​ຕື່ມ​ອີກ ເພື່ອ​ປົກ​ປ້ອງ​ບັນຫາ​ຄວາມ​ຮຸນ​ແຮງ​ຕໍ່​ເດັກ​ໃນ ​ສປປ ລາວ ແນໃສ່​ຮັບປະກັນ​ວ່າ ເດັກ​ທຸກ​ຄົນ​ທີ່​ປະສົບ​ຄວາມ​ຮຸນ​ແຮງ​ໄດ້​ຮັບ​ການ​ປະສານ​ຊ່ວຍເຫຼືອ​ສົ່ງຕໍ່​ຢ່າງ​ທັນ​ການ ສາມາດ​ເຂົ້າ​ເຖິງ​ການ​ຊ່ວຍເຫຼືອ​ທີ່​ມີ​ຄຸນະພາບ​ສູງ ແລະ ເພື່ອ​ຫຼຸດຜ່ອນ​ຄວາມ​ສ່ຽງ​ທີ່​ຈະ​ເຮັດ​ໃຫ້​ມີ​ການ​ໃຊ້​ຄວາມ​ຮຸນ​ແຮງ​ຊ້ຳ​ອີກ ຫຼື ເກີດ​ຮ້າຍ​ແຮງ​ກວ່າ​ເກົ່າ ນອກ​ນີ້ ບົດ​ລາຍ​ງານ​ດັ່ງກ່າວ​ຍັງ​ໄດ້​ໃຫ້​ຂໍ້​ສະເໜີ​ແນະ​ທີ່​ມີ​ລັກສະນະ​ກວ້າງຂວາງ​ກ່ຽວ​ເນື່ອງ​ກັນ ເພື່ອ​ຊ່ວຍ ​ສປປ ລາວ ໃນ​ການ​ແກ້​ໄຂ​ບັນຫາ​ຄວາມ​ຮຸນ​ແຮງ​ຕໍ່​ເດັກ​ຢ່າງ​ມີ​ປະ​ສິດທິ​ຜົນ​ໃນ​ແຕ່​ລະ​ໄລຍະ ຄື: ໄລຍະ​ສັ້ນ ໄລຍະ​ກາງ ແລະ ໄລຍະ​ຍາວ.

ເພື່ອ​ເປັນ​ການ​ປົກ​ປ້ອງ ແລະ ຊ່ວຍເຫຼືອ​ເດັກ​ໃນ ​ສປປ ລາວ ຈາກ​ການ​ໃຊ້​ຄວາມ​ຮຸນ​ແຮງ ທັງ​ເປັນ​ການ​ຊຸກຍູ້​ສົ່ງເສີມ​ໃຫ້​ເດັກ​ໄດ້​ຮັບ​ການ​ພັດທະນາ ກໍ່​ຄື ເປັນ​ການ​ປະຕິບັດ​ຕາມ​ຂໍ້​ສະເໜີ​ແນະ​ຂອງ​ການ​ສຳ​ຫຼວດ ​ຄຊກມດ ໄດ້​ສ້າງ​ແຜນ​ຮ່ວມ​ມື​ຫຼາຍ​ຂະແໜງການ​ທີ່​ກຳນົດ​ບັນດາ​ບຸລິມະສິດ ເພື່ອ​ແກ້​ໄຂ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ​ໃນ​ລາວ ບັນດາ​ບຸລິມະສິດ​ເຫຼົ່ານັ້ນ​ໄດ້​ຮັບ​ການ​ປຶກສາ ແລະ ເຫັນ​ດີ​ເປັນ​ເອກະ​ພາບ​ກັນ​ລະຫວ່າງ​ຂະແໜງການ​ກ່ຽວຂ້ອງ​ພາກ​ລັດ ເຊິ່ງ​ໄດ້​ສອດຄ່ອງ ແລະ ສະໜັບສະໜູນ​ການຈັດຕັ້ງ​ປະຕິບັດ​ແຜນ​ດຳເນີນ​ງານ​ແຫ່ງ​ຊາດ ວ່າ​ດ້ວຍ​ການ​ປ້ອງ​ກັນ ແລະ ລຶບລ້າງ​ຄວາມ​ຮຸນ​ແຮງ​ຕໍ່​ແມ່ຍິງ ຄວາມ​ຮຸນ​ແຮງ​ຕໍ່​ເດັກ ໄລຍະ​ປີ 2014-2020 ກໍ່​ຄື ການຈັດຕັ້ງ​ປະຕິບັດ​ບັນດາ​ຍຸດ​ທະ​ສາດ​ນະໂຍບາຍ ເຄື່ອງມື​ທາງ​ດ້ານ​ລະບຽບ​ກົດໝາຍ​ອື່ນໆ​ຂອງ​ປະເທດ ການ​ດຳເນີນ​ດັ່ງກ່າວ​ຍັງ​ຊ່ວຍ ​ສປປ ລາວ ໃນ​ການ​ປະຕິບັດ​ພັນທະ​ສາກົນ​ຂອງ​ຕົນ ເພື່ອ​ສົ່ງເສີມ​ສິດທິ​ເດັກ​ແຕ່ລະຄົນ ໂດຍ​ສອດຄ່ອງ​ກັບ​ສົນທິສັນຍາ​ວ່າ​ດ້ວຍ​ສິດທິ​ເດັກ ແລະ ເພື່ອ​ບັນລຸ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ​ຕ່າງໆ​ທີ່​ກ່ຽວຂ້ອງ​ກັບ​ຄວາມ​ຮຸນ​ແຮງ

ໂອກາດ​ດັ່ງກ່າວ ທ່ານ ສອນ​ໄຊ ສີ​ພັນ​ດອນ ໄດ້​ເນັ້ນ​ວ່າ: ລັດຖະບານ​ລາວ​ຍາມ​ໃດ​ກໍ່​ໄດ້​ໃຫ້​ຄວາມ​ສຳຄັນ​ເອົາໃຈໃສ່​ຢ່າງ​ຕັ້ງໜ້າ​ໃນ​ການ​ຊຸກຍູ້​ພັດທະນາ ແລະ ສົ່ງເສີມ​ເດັກນ້ອຍ​ລາວ​ໃຫ້​ເຕີບ​ໃຫຍ່​ໃນ​ສະພາບ​ແວດ​ລ້ອມ​ທີ່​ມີ​ຄວາມ​ປອດ​ໄພ ໄດ້​ຮັບ​ການ​ສຶກ​ສາ ແລະ ການ​ບໍລິການ​ສຸຂະພາບ​ໃນ​ພື້ນຖານ​ທີ່​ດີ ເພື່ອ​ບັນລຸ​ຈຸດປະສົງ ແລະ ເປົ້າ ໝາຍ​ກຳນົດ​ໄວ້ ລັດຖະບານ​ໄດ້​ກຳນົດ​ແນວທາງ​ນະໂຍບາຍ ນິຕິ​ກຳ ພ້ອມ​ຈັດ​ສັນ​ງົບປະມານ​ຈຳນວນ​ໜຶ່ງ ໂດຍ​ມອບ​ໃຫ້​ຂະແໜງການ​ກ່ຽວຂ້ອງ ທັງ​ສູນ​ກາງ ແລະ ທ້ອງຖິ່ນ ເປັນ​ເຈົ້າ​ການ​ຮ່ວມ​ໂຄສະນາ ເຜີຍແຜ່ ການ​ປ້ອງ​ກັນ ແລະ ລຶບລ້າງ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ ການ​ຄ້າ-ຂາຍ​ປະເວນີ ແລະ ການ​ໃຊ້​ຄວາມ​ຮຸນ​ແຮງ​ຕໍ່​ເດັກ.

ພາບ ແລະ ຂ່າວ: ນສພ ວຽງຈັນໃຫ່ມ
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.