Header Ads

ສວນພຶກສາສາດ ຫ້ວຍ​ຍາງ-ດົງ​ໝາກຄາຍ ຈະກາຍເປັນບ່ອນປູກຕົ້ນໄມ້ນານາຊະນິດ



ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ​ໄດ້​ຈັດ​ພິທີ​ປະກາດ ສວນພຶກສາສາດ ຫ້ວຍ​ຍາງ-ດົງ​ໝາກຄາຍ ຢູ່ບ້ານ ດົງ​ໝາກ​ຄາຍ ​ແລະ ບ້ານ ​ໂນນ​ສະຫວ່າງ, ເມືອງ ໄຊທານີ, ນະຄອນຫລວງວຽງຈັນ ເພື່ອ​ໃຫ້​ກາຍເປັນບ່ອນປູກຕົ້ນໄມ້ນານາຊະນິດ ​ໃນການປະກອບສ່ວນເພີ່ມອັດຕາປ່າໄມ້ປົກຫຸ້ມ ກໍຄືປົກປັກຮັກສາ ແລະ ຄຸ້ມຄອງເຂດນີ້ໃຫ້ກາຍເປັນເຂດສີຂຽວ ເໝືອນດັ່ງປອດຂອງນະຄອນຫລວງວຽງຈັນ.



ພິທີເປີດສວນດັ່ງກ່າວ ໄດ້ຈັດຂຶ້ນໃນວັນທີ 9 ມິຖຸນາ 2018 ​ໂດຍ​ໃຫ້ກຽດ​ເຂົ້າ​ຮ່ວມ​ຂອງ ທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫລວງວຽງຈັນ, ມີບັນດາລັດຖະມົນຕີ, ຮອງລັດຖະມົນຕີ, ຜູ້ຕາງໜ້າຈາກອົງການຈັດຕັ້ງມະຫາຊົນ, ອົງການຈັດຕັ້ງສາກົນ, ພະນັກ​ງານ, ອຳນາດ​ການ​ປົກຄອງ​ທ້ອງ​ຖິ່ນ ແລະ ພໍ່ແມ່ປະຊາຊົນ​.



​ໃນ​ໂອກາດ​ດັ່ງກ່າວ, ທ່ານ ສົມ​ມາດ ພົນ​ເສນາ ລັດຖະມົນຕີກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ກ່າວ​ວ່າ: ສວນພຶກສາສາດ ຫ້ວຍ​ຍາງ-ດົງ​ໝາກຄາຍ ​ແຫ່ງ​ນີ້ກວມ​ເອົາເນື້ອ​ທີ່​ທັງ​ໝົດ 268 ​ເຮັກຕາ, ຊຶ່ງ​ໃນ​ອະນາຄົດ ກະຊວງ​ຊັບພະຍາກອນ​ທຳ​ມະ​ຊາດ ​ແລະ ສິ່ງ​ແວດ​ລ້ອມ ຈະ​ໄດ້​ສົມທົບກັບ ກະຊວງ​ກະສິກຳ ​ແລະ ປ່າ​ໄມ້ ​ເພື່ອ​ວາງ​ແຜນການ​ນຳ​ໃຊ້​ພື້ນ​ທີ່​ສີຂຽວ​ແຫ່ງ​ນີ້ ​ໃຫ້​ກາຍ​ເປັນ​ເຂດ​ສຶກສາ​ນິ​ເວດ​ວິທະຍາ ​ແລ​ະ ​ແຫ​ລ່ງທ່ອງ​ທ່ຽວທາງ​ທຳ​ມະ​ຊາດ ​ເພື່ອ​ເປັນ​ບ່ອນ​ພັກຜ່ອນ​ສຳລັບ​ພະນັກງານ ກໍ​ຄື​ພໍ່​ແມ່​ປະຊາຊົນ​ທີ່ຢູ່​ໃກ້ ​ແລະ ​ໄກ. ພ້ອມ​ດຽວ​ກັນ​ນີ້, ກໍ​ໄດ້​ສະ​ເໜີ​ມາ​ຍັງ​ອົງການ​ປົກຄອງເມືອງໄຊທານີ, ຄະນະບ້ານ ​ແລະ ພໍ່​ແມ່​ປະຊາຊົນ ບ້ານ ດົງ​ໝາກ​ຄ້າຍ ​ແລະ ບ້ານ ​ໂນນ​ສະຫວ່າງ ຈົ່ງ​ຮ່ວມ​ມື​ໃນ​ການ​ປົກ​ປັກ​ຮັກສາ​ເຂດ​ສີຂຽວ​ນີ້ ​ໃຫ້​ກາຍ​ເປັນ​ສວນພຶກສາສາດ​ໃນ​ອະນາຄົດ​ຢ່າງ​ສົມບູນ.

​ໃນ​ໂອກາດ​ດຽວກັນ, ທ່ານ ບຸນຍັງ ວໍລະຈິດ ກໍ​ໄດ້​ນຳພາ​ບັນດາ​ ການ​ນຳ​ຂັ້ນ​ຕ່າງໆ ປູກ​ຕົ້ນ​ໄມ້​ຢູ່​ທາງ​ດ້ານ​ໜ້າ​ຂອງ ສວນພຶກສາສາດ ຫ້ວຍ​ຍາງ-ດົງ​ໝາກຄາຍ ດັ່ງກ່າວ, ຊຶ່ງ​ຢູ່ໃນ​ທ່າມກາງບັນຍາກາດ​ທີ່​ທົ່ວ​ປວງ​ຊົນ​ລາວ​ທັງ​ຊາດ ສະ​ເຫລີ​ມສະຫລອງ​ວັນ​ປູກ​ຕົ້ນ​ໄມ້​ແຫ່ງ​ຊາດ (1 ມິຖຸນາ), ວັນ​ສິ່ງ​ແວດ​ລ້ອມ​ແຫ່ງ​ຊາດ ແລະ ວັນ​ສິ່ງ​ແວດ​ລ້ອມ​ໂລກ (5 ມິຖຸນາ).


ຂ່າວ: ສິງ​ຄຳ, ພາບ: ​ເກດສະໜາ (ຂປລ)
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.