ຮອງນາຍົກເນັ້ນນະຄອນຫຼວງ ສູ້ຊົນເກັບລາຍຮັບໃຫ້ໄດ້ຄາດໝາຍ

ອີງຕາມການລາຍງານຂອງ ນສພ ນສພ ວຽງຈັນໃຫ່ມ  ວ່າ : ທ່ານ ສົມ​ດີ ດວງ​ດີ ຮອງ​ນາຍົກລັດຖະມົນຕີ ລັດຖະມົນຕີ​ກະຊວງ​ການ​ເງິນ ໄດ້​ພົບ​ປະ​ໂອ້​ລົມ​ພະນັກງານຫຼັກ​ແຫຼ່ງ​ຂະແໜງການ​ເງິນ ແລະ ຂົງເຂດ​ເສດຖະກິດ​ຂອງ​ນະຄອນຫຼວງ​ວຽງ​ຈັນ (ນວ) ວັນ​ທີ 31 ພຶດສະພາ 2018 ຢູ່​ຫ້ອງ​ວ່າການ ນວ ມີ​ທ່ານ ແກ້ວ​ພິລາ​ວັນ ອາ​ໄພ​ລາດ ຮອງ​ເຈົ້າ​ຄອງ ນວ ທ່ານ ຄຳ​ພັນ ມາລາ​ບັນດິດ ຫົວໜ້າ​ພະແນກການ​ເງິນ ນວ ພ້ອມ​ດ້ວຍ​ເຈົ້າເມືອງ ຮອງ​ເຈົ້າເມືອງ ຜູ້​ຊີ້​ນຳ​ວຽກ​ງານ​ເສດຖະກິດ ແລະ ພາກສ່ວນ​ກ່ຽວຂ້ອງ​ເຂົ້າ​ຮ່ວມ.

ທ່ານ ຄຳ​ພັນ ມາລາ​ບັນດິດ ກ່າວ​ວ່າ: ພະແນກການ​ເງິນ ນວ ມີ​ສາຍ​ຕັ້ງ​ຂຶ້ນ​ກັບ​ກະຊວງ​ການ​ເງິນ ສາຍ​ຂວາງ​ຂຶ້ນ​ກັບ ນວ ປະກອບ​ມີ 5 ຂະແໜງການ​ອ້ອມ​ຂ້າງ​ເປັນ​ຄະນະ​ພັກ​ຮາກ​ຖານ​ໜຶ່ງ​ຊີ້​ນຳ-ນຳພາ 5 ຂະແໜງການ​ອ້ອມ​ຂ້າງ ແລະ 3 ຂະແໜງການ​ສາຍ​ຕັ້ງ (ພາສີ ສ່ວຍ​ສາ​ອາກອນ ນວ ຄັງ​ເງິນ​ແຫ່ງ​ຊາດ ນວ) ດ້ານ​ວິຊາ​ສະເພາະ ເຄື່ອນ​ໄຫວ​ຕາມ​ພາລະ​ບົດບາດ ສິດ ແລະ ໜ້າທີ່​ຂອງ​ໃຜລາວ ຄາດໝາຍ​ລາຍ​ຮັບ​ງົບປະມານ​ປີ 2018 ທີ່​ກະຊວງ​ການ​ເງິນ​ແຈ້ງ​ໃຫ້​ເບື້ອງ​ຕົ້ນ 4.540,21 ຕື້​ກີບ ໃນ​ນີ້ ພູດ​ສູນ​ກາງ (ພາສີ) 3.327,96 ຕື້​ກີບ ທ້ອງຖິ່ນ (ນວ) 1.212,24 ຕື້​ກີບ ຜ່ານ​ການ​ຈັດ​ເກັບ​ລາຍ​ຮັບ​ຕົວ​ຈິງ ມາ​ຮອດ​ວັນ​ທີ 28 ພຶດສະພາ 2018 ປະຕິບັດ​ໄດ້ 1.638,97 ຕື້​ກີບ ເທົ່າ​ກັບ 36,09% ຂອງ​ແຜນການ ໃນ​ນີ້ ສູນ​ກາງ​ປະຕິບັດ​ໄດ້ 36,24% ທ້ອງຖິ່ນ 35,73% ດ້ານ​ລາຍ​ຈ່າຍ​ໄດ້​ຮັບ​ຕົວ​ເລກ 637,97 ຕື້​ກີບ ປະຕິບັດ​ໄດ້ 290,49 ຕື້​ກີບ ເທົ່າ​ກັບ 45,53% ແຜນການ​ດຸ່ນ​ດ່ຽງ​ໃຫ້​ສູນ​ກາງ 142,59 ຕື້​ກີບ ເທົ່າ​ກັບ 24,83% ການ​ຈັດ​ເກັບ​ລາຍ​ຮັບ​ໃນ​ໄລຍະ​ຜ່ານ​ມາ​ບໍ່​ໄດ້​ຕາມ​ຄາດໝາຍ ຍ້ອນ​ດ້ານ​ນິຕິ​ກຳ​ມີ​ການ​ປ່ຽນແປງ (ການ​ກຳນົດ​ເກັບ​ຄ່າ​ທຳນຽມ​ຄັງ​ແຮ​ນ້ຳມັນ​ຫຼຸດ​ລົງ ແລະ ເງິນ​ຄັງ​ແຮ​ຫຼຸດ​ລົງ) ການ​ນຳ​ເຂົ້າ​ສິນຄ້າ (ເຄື່ອງ​ອຸປະໂພກ-ບໍລິໂພກ) ຫຼຸດ​ລົງ ແລະ ການ​ຈັດ​ເກັບ​ລາຍ​ຮັບ​ບໍ່​ສາມາດ​ປະຕິບັດ​ໄດ້​ເຕັມ​ເວລາ ຄາດໝາຍ​ສູ້​ຊົນ​ເກັບ​ລາຍ​ຮັບ 6 ເດືອນ​ຕົ້ນ​ປີ​ໃຫ້​ໄດ້ 601,57 ຕື້​ກີບ ເທົ່າ​ກັບ 49,62% ແລະ 6 ເດືອນ​ທ້າຍ​ປີ 2018 ໃຫ້​ໄດ້ 610,67 ຕື້​ກີບ ເທົ່າ​ກັບ 50,37% ແລະ ຄາດ​ຄະເນ​ໝົດ​ປີ​ໃຫ້​ໄດ້ 100% ສ່ວນ​ລາຍ​ຈ່າຍ 6 ເດືອນ​ທ້າຍ​ປີ​ຈະ​ປະຕິບັດ​ຕາມ​ຕົວ​ເລກ​ທີ່​ສະພາ​ແຫ່ງ​ຊາດ​ຮັບຮອງ.

ໂອກາດ​ນີ້ ທ່ານ ສົມ​ດີ ດວງ​ດີ ໄດ້​ສະແດງ​ຄວາມ​ຊົມເຊີຍ​ຕໍ່​ຜົນງານ​ທີ່​ຂະແໜງການ​ເງິນ ນວ ຍາດ​ມາ​ໄດ້​ໃນ​ໄລຍະ​ຜ່ານ​ມາ ພ້ອມ​ນີ້​ທ່ານ​ຍັງ​ໄດ້​ເນັ້ນ​ບາງ​ບັນຫາ ຄື: ເອົາໃຈໃສ່​ວຽກ​ງານ​ສຶກ​ສາ​ອົບ​ຮົບ​ແນວ​ຄິດ-ການເມືອງ​ໃຫ້​ສະມາຊິກ​ພັກ ພະນັກງານ-ລັດຖະກອນ ເອົາໃຈໃສ່​ປະຕິບັດ​ວິໄນ 10 ຂໍ້​ຫ້າມ​ຂອງ​ພະນັກງານ-ລັດຖະກອນ​ຂະແໜງການ​ເງິນ ກົດໝາຍ ແລະ ລະບຽບ​ການ​ເງິນ​ຢ່າງ​ເຄັ່ງ​ຄັດ ປະຕິບັດ​ຕາມ​ຫຼັກການ​ລວມ​ສູນ​ປະຊາທິປະໄຕ ເຮັດ​ວຽກ​ເປັນ​ໝູ່​ຄະນະ ບຸກຄົນ​ຮັບຜິດຊອບ ມີ​ການ​ແບ່ງ​ຄວາມ​ຮັບຜິດຊອບ​ຢ່າງ​ຄັກແນ່ ຢຶດ​ໝັ້ນ​ໜ້າທີ່​ການເມືອງ​ໃນ​ການ​ປະຕິບັດ​ວິຊາ​ສະເພາະ ບໍ່​ໃຫ້​ສວຍ​ໃຊ້​ໜ້າທີ່​ຕໍ່​ລອງ​ກັບ​ຫົວໜ່ວຍ​ທຸລະ​ກິດ ເພີ່ມ​ທະວີ​ຄວາມ​ສາມັກຄີ​ພາຍ​ໃນ ແລະ ພາຍ​ນອກ ເອົາໃຈໃສ່​ປະຕິບັດ​ໜ້າທີ່​ໄດ້​ມອບ​ໝາຍ​ດ້ວຍ​ຈິດໃຈ​ບຸກ​ບືນ ແລະ ມີ​ຄວາມ​ຮັບຜິດຊອບ​ສູງ ສູ້​ຊົນ​ເກັບ​ລາຍ​ຮັບ​ໃນ​ໄລຍະ​ເວລາ​ທີ່​ຍັງ​ເຫຼືອ​ໃຫ້​ໄດ້​ຕາມ​ແຜນການ ຫຼື ລື່ນ​ແຜນການ ບົນ​ພື້ນຖານ​ລະບຽບ​ກົດໝາຍ ຊອກ​ຄົ້ນ ແລະ ເກັບ​ລາຍ​ຮັບ​ທີ່​ເປັນ​ທ່າແຮງ​ບົ່ມ​ຊ້ອນ ຄຸ້ມ​ຄອງ-ສ້າງ​ຖານ​ລາຍ​ຮັບ​ໃຫ້​ມີ​ຄວາມ​ເຂັ້ມແຂງ​ໝັ້ນຄົງ ແລະ ສາມາດ​ກວດກາ​ໄດ້ ເອົາໃຈໃສ່​ຈັດ​ຕັ້ງ​ປະຕິບັດ​ການ​ຈົດ​ຮັບ-ຈົດ​ຈ່າຍ ແນໃສ່​ໃຫ້​ສາມາດ​ປະຕິບັດ​ທັນ​ຕາມ​ກຳນົດ​ເວລາ ແລະ ເປັນ​ປົກກະຕິ.

ເອົາໃຈໃສ່​ການ​ປະຕິບັດ​ລາຍ​ຈ່າຍ​ຢ່າງ​ເຂັ້ມ​ງວດ ບົນ​ພື້ນຖານ​ລະບຽບ​ກົດໝາຍ ໂດຍ​ຖື​ເອົາ​ການ​ເບີກ​ຈ່າຍ​ເງິນເດືອນ ເງິນ​ອຸດ​ໝູນ ​ແລະ ລາຍ​ຈ່າຍ​ຮັບ​ໃຊ້​ການເຄື່ອນໄຫວ​ວຽກ​ງານ​ຂອງ​ກົງຈັກ ພັກ-ລັດ ເປັນ​ບຸລິມະສິດ​ຕົ້ນຕໍ​ປະຕິບັດ​ລາຍ​ຈ່າຍ​ໃຫ້​ແທດເໝາະ​ກັບ​ງົບປະມານ​ທີ່​ໄດ້​ຈັດ​ສັນ​ໃຫ້​ໃນ​ແຕ່​ລະ​ປີ ການຈັດຕັ້ງ​ປະຕິບັດ​ວຽກ​ງານ​ວິຊາ​ສະເພາະ​ແມ່ນ​ໃຫ້​ຖື​ເອົາ​ການ​ປະຢັດ​ເປັນຕົ້ນ​ຕໍ ໃຫ້​ຂະແໜງການ​ເງິນ​ກຳນົດ​ຈະແຈ້ງ​ກ່ຽວ​ກັບ​ຂັ້ນ​ຕອນ​ໄລຍະ​ເວລາ​ການ​ຄົ້ນຄວ້າ​ເອກະສານ ການ​ເບີກ​ຈ່າຍ​ເງິນ ແລະ ແຈ້ງ​ຄ່າ​ທຳນຽມ​ໃຫ້​ຜູ້​ໃຊ້​ບໍລິການ​ຮັບ​ຮູ້​ລະອຽດ​ເອົາໃຈໃສ່​ສ້າງ​ສິ່ງ​ອຳນວຍ​ຄວາມ​ສະດວກ​ ໃຫ້​ຫົວໜ່ວຍ​ທຸລະ​ກິດ​ມີ​ຄວາມ​ສະດວກ​ວ່ອງໄວ ໂດຍ​ສະເພາະ ການ​ຕໍ່​ທະບຽນ​ອາກອນ ແລະ ອື່ນໆ ຍົກ​ສູງ​ຂອດ​ການ​ປະສານ​ງານ​ລະຫວ່າງ​ຂະແໜງການ ສູນ​ກາງ ແລະ ທ້ອງຖິ່ນ ເພື່ອ​ເຮັດ​ໃຫ້​ວຽກ​ງານ​ຕ່າງໆ​ໄດ້​ຮັບ​ການ​ແກ້​ໄຂ ແລະ ຈັດ​ຕັ້ງ​ປະຕິບັດ​ຢ່າງ​ຕໍ່​ເນື່ອງ ​ແລະ ມີ​ປະ​ສິດທິ​ຜົນ​ພະແນກການ​ເງິນ ນວ ແລະ 3 ຂະແໜງການ​ສາຍ​ຕັ້ງ​ຕ້ອງ​ປະຕິບັດ​ພາລະ​ບົດບາດ​ຢ່າງ​ເຂັ້ມ​ງວດ ພ້ອມ​ນີ້ ກໍ່​ຕ້ອງ​ກະກຽມ​ຂຶ້ນ​ແຜນ​ງົບປະມານ​ປີ 2019 ແຕ່​ຫົວທີ ເພື່ອ​ໃຫ້​ທັນ​ກັບ​ສະພາບ​ການ​ຕົວ​ຈິງ ໂດຍ​ໃຫ້​ພະ​ແນ​ການ​ເງິນ​ແຂວງ ເປັນ​ເຈົ້າ​ການ​ປະສານ​ສົມທົບ​ກັບ​ຂະແໜງການ​ກ່ຽວຂ້ອງ​ອ້ອມ​ຂ້າງ​ແຂວງ ແລະ ສູນ​ກາງ ສິ່ງ​ສຳຄັນ​ການ​ຂຶ້ນ​ແຜນ​ແມ່ນ​ໃຫ້​ແທດເໝາະ​ກັບ​ສະພາບ​ການ​ຕົວ​ຈິງ ແລະ ສາມາດ​ປະຕິບັດ​ໄດ້.

ພາບ ແລະ ຂ່າວ: ນສພ ວຽງຈັນໃຫ່ມ

© ໂຕະນໍ້າຊາ  | www.tonamcha.com | www.tonamchanews.com

_______

___________