Header Ads

ມອບ-ຮັບໂຄງການກໍ່ສ້າງຂົວນໍ້າລົ້ນ ແລະ ເສັ້ນທາງຫາບ້ານຂອງເມືອງພູຄູນມູນຄ່າເກືອບ 1 ຕື້ກີບ



ພິທີມອບ-ຮັບໂຄງການກໍ່ສ້າງຂົວນໍ້າລົ້ນບ້ານນໍ້າສວນ ແລະ ໂຄງການສ້ອມແປງເສັ້ນທາງແຕ່ບ້ານນໍ້າສວນ ຫາ ບ້ານສວນໝາກ ເມືອງພູຄູນ ແຂວງຫຼວງພະບາງ ໄດ້ຈັດຂຶ້ນໃນວັນທີ 26 ມິຖຸນາ 2018 ທີ່ໂຮງຮຽນປະຖົມສົມບູນບ້ານນໍ້າສວນ ກຸ່ມຜາເກັ່ງ ເມືອງ ພູຄູນ,ໂດຍການເປັນປະທານຂອງທ່ານ ຄຳພັນ ພະນິນທອງ ຮອງເຈົ້າເມືອງໆພູຄູນ,ມີຫ້ອງການທີກ່ຽວຂ້ອງ,ຄະນະປະສານງານໂຄງການ ທລຍ ຂັ້ນເມືອງ-ຂັ້ນບ້ານ,ພ້ອມດ້ວຍ ກຸ່ມບໍລິສັດ DSLກໍ່ສ້າງຂົວ-ທາງເປັນຜູ້ຈັດຮັບເໝົາກໍ່ສ້າງ,ອຳນາດການປົກຄອງ,ເຖົ້າແກ່ແນວໂຮມ ແລະ ປະຊາຊົນ 2 ບ້ານເຂົ້າຮ່ວມ. 



ໂຄງການກໍ່ສ້າງຂົວນໍ້າລົ້ນບ້ານນໍ້າສວນ ກຸ່ມຜາເກ່ງ ແລະ ໂຄງການສ້ອມແປງເສັ້ນທາງ ແຕ່ບ້ານນໍ້າສວນ ຫາ ບ້ານສວນໝາກ ກຸ່ມພູສູງ ໄດ້ເລີ່ມລົງມືຈັດຕັ້ງປະຕິບັດ ນັບແຕ່ເດືອນ ມີນາ 2018 ເປັນຕົ້ນມາ ໂດຍແມ່ນບໍລິສັດ DSL ກໍ່ສ້າງຂົວ-ທາງເປັນຜູ້ຈັດຮັບເໝົາກໍ່ສ້າງ,ໃນມູນຄ່າທັງໝົດ 639.000.000ກີບ, ໂດຍແມ່ນທຶນຂອງກອງທຶນຫລຸດຜ່ອນຄວາມທຸກຍາກ ຮອບວຽນ 15 ສົກປີ 2018, ໃນນີ້ໂຄງການກໍ່ສ້າງຂົວນໍ້າລົ້ນ ໄດ້ກໍ່ສ້າງດ້ວຍເບຕົງເສີມເຫຼັກ ມີລວງຍາວ 24ແມັດ, ກ້ວາງ 2,5 ແມັດ ມູນຄ່າ 279.000.000ກີບ . 


ສ່ວນໂຄງການສ້ອມແປງເສັ້ນທາງຊົນນະບົດແຕ່ບ້ານນໍ້າສວນ ຫາ ບ້ານສວນໝາກ ກຸ່ມພູສູງ,ມີໄລຍະທາງຍາວ 6,5 ກິໂລແມັດ,ໜ້າວຽກປະກອບມີ: ຂະຫຍາຍແລວທາງໃໝ່, ຕັດດິນ, ວາງທໍລອດທາງ 15 ຈຸດ,ຫຼັກນິລະໄພ 60 ຕົ້ນ,ລວມມູນຄ່າ 360.000.000ກີບ,ໃນນີ້ມີທຶນສົມທົບກັບແຮງງານຂອງປະຊາຊົນ. ເພື່ອເຮັດໃຫ້ການຈັດຕັ້ງປະຕິບັດວຽກງານສຳເລັດຕາມແຜນການ ທ່ານ ບົວສອນ ເອິນທະວັນ ຕາງໜ້າບໍລິສັດ DSLກໍ່ສ້າງຂົວ-ທາງກໍ່ໄດ້ກ່າວມອບໂຄງການກໍ່ສ້າງຂົວນໍ້າລົ້ນ ແລະ ໂຄງການສ້ອມແປງເສັ້ນທາງເຂົ້າບ້ານໃຫ້ຫ້ອງການໂຍທາທິການ ແລະ ຂົນສົ່ງເມືອງພູຄູນ ເພື່ອມອບ ແລະ ເປີດໃຫ້ປະຊາຊົນໄດ້ນໍາຊົມໃຊ້ ແລະ ປົກປັກຮັກສາໃຫ້ໄດ້ຍາວນານ. 

ທ່ານ ຄຳພັນ ພະນິນທອງ ຮອງເຈົ້າເມືອງ ໄດ້ກ່າວຕໍ່ອຳນາດການປົກຄອງທັງສອງບ້ານ ໂດຍໃຫ້ແຕ່ລະບ້ານແບ່ງຈຸດຂອບເຂດຮັບຜິດຊອບເຂດແດນໃນການປົກປັກຮັກສາ ເປັນຕົ້ນແມ່ນ ການຖ່າງຫຍ້າແຄມທາງ,ອະນາໄມຮ່ອງລະບາຍນໍ້າໃນເວລາດິນເຊາະເຈື່ອນ,ທາງຂາດ,ທໍ່ຕັນ.ເພື່ອໃຫ້ໄດ້ຊົມໃຊ້ຍາວນານ,ອັນນີ້ກໍ່ເພື່ອສ້າງຄວາມສະດວກໃຫ້ແກ່ປະຊາຊົນໃນການໄປມາ ແລະ ທຳການຜະລິດສິນຄ້າ ເພື່ອຫລຸດຜ່ອນການແບກຫາບຂອງແມ່ຍິງ ແລະ ເດັກນ້ອຍ,ພາຍຫລັງມອບຮັບໂຄງການແລ້ວ ທາງບໍລິສັດຍັງຈະໄດ້ຄໍ້າປະກັນໃນການກໍ່ສ້າງເປັນເວລາ 6 ເດືອນ,ໃນມູນຄ່າ 10% ຂອງມູນຄ່າການກໍ່ສ້າງ. 

ຂ່າວ: ນ. ໄລວັນ ໄຕຍະມາດ

© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.