Header Ads

ປກສ ເມືອງສີໂຄດຕະບອງ ຈັບຊາຍ 51 ປີ ຂາຍຢາບ້າ ຍ້ອນໄວລຸ້ນຊັກຊວນ




ບັນຫາຢາເສບຕິດຍັງເປັນບັນຫາທີ່ເກີດຂຶ້ນໃນສັງຄົມ ໂດຍສະເພາະນະຄອນຫຼວງວຽງຈັນ ຜ່ານມາບັນດາເຈົ້າໜ້າທີ່ ປກສ ໄດ້ສຸມໃສ່ແກ້ໄຂ ເຊິ່ງສາມາດຕິດຕາມຈັບຜູ້ຄ້າຂາຍໄປດຳເນີນຄະດີຕາມກົດໝາຍໄດ້ຫຼາຍສົມຄວນ ແຕ່ສະພາບດັ່ງກ່າວກໍຍັງສືບຕໍ່ລະບາດໃນກຸ່ມໄວລຸ້ນ ເຮັດໃຫ້ສັງຄົມບໍ່ມີຄວາມສະຫງົບ ແລະ ສະພາບປະກົດການຫຍໍ້ທໍ້ເກີດຂຶ້ນຕາມມາ; ຫ້ຼາສຸດໃນວັນທີ 29 ພຶດສະພາ 2018, ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ປກສ ເມືອງສີໂຄດຕະບອງ ໄດ້ກັກຕົວຜູ້ຄ້າຂາຍຢາເສບຕິດ ອາຍຸ 51 ປີ ພ້ອມຂອງກາງຢາບ້າຈຳນວນ 1.049 ເມັດ.



ເຈົ້າໜ້າທີ່ ປກສ ເມືອງສີໂຄດຕະບອງ ໃຫ້ຮູ້ວ່າ: ໃນວັນທີ 28 ພຶດສະພາ 2018, ໄດ້ລາຍງານຈາກແຫຼ່ງຂ່າວວ່າ ມີຊາຍສູງອາຍຸຢູ່ບ້ານໂນນສົມບູນ ເມືອງສີໂຄດຕະບອງ ນະຄອນຫຼວງວຽງຈັນ ມີພຶດຕິກຳລັກລອບຊື້-ຂາຍຢາເສບຕິດປະເພດຢາບ້າ ສ້າງຄວາມບໍ່ສະຫງົບໃຫ້ປະຊາຊົນເຂດດັ່ງກ່າວ; ຈາກນັ້ນ, ໄດ້ມອບ ໝາຍໃຫ້ເຈົ້າໜ້າທີ່ວິຊາສະເພາະ ລົງເກັບກຳຂໍ້ມູນຈົນຮູ້ໄດ້ເປົ້າໝາຍຊື່ ທ້າວ ລັດຕະນະພອນ ຫຼື ເຕັ່ງ ອາຍຸ 51 ປີ ອາຊີບກຳມະກອນຢູ່ໂຮງງານເຟີນີເຈີແຫ່ງໜຶ່ງເຂດບ້ານໂນນສົມບູນ ຂາຍຢາເສບຕິດແທ້, ມາວັນທີ 29 ພຶດສະພາ 2018 ຈຶ່ງນຳກຳລັງເຂົ້າກັກຕົວຜູ້ກ່ຽວພ້ອມຂອງກາງຢາບ້າ 1.049 ເມັດ ມາສອບສວນ.

ທ້າວ ລັດຕະນະພອນ ສາລະພາບວ່າ: ຜ່ານມາເຄີຍມີເມຍມາແລ້ວ 3 ຄົນ ຄົນສຸດທ້າຍມີລູກນຳກັນ 2 ຄົນ ແລະ ກໍເຮັດວຽກເປັນກຳມະກອນ ຢູ່ຮ້ານເຟີນີເຈີ ແຖວບ້ານ ໄດ້ເງິນເດືອນລະ 700.000-800.000 ກີບ, ມາຮອດຕົ້ນປີ 2018 ມີໄວລຸ້ນອາຍຸປະມານ 28 ປີ ມາຊັກຊວນຕົນຂາຍຢາບ້າ ເຊິ່ງໃນເບື້ອງຕົ້ນຊາຍຄົນນັ້ນເອົາຢາບ້າມາຂາຍຈຳນວນ 10 ເມັດ ເມື່ອຂາຍໝົດຈຶ່ງເອົາເງິນໄປຈ່າຍຕາມຫຼັງໃນການຂາຍແມ່ນມີໄວລຸ້ນທຽວມາຊື້ນຳຢູ່ເຮືອນ ແລະ ບ່ອນເຮັດວຽກ. ຈາກນັ້ນ, ກໍເລີ່ມຮັບເອົາຢາບ້າມາຂາຍຄັ້ງລະ 1-2 ຖົງ ຖົງລະ 200 ເມັດ ເຄີຍຂາຍປະມານ 4-5 ຄັ້ງ, ຫຼ້າສຸດວັນທີ 29 ພຶດສະພາ 2018 ໄດ້ຕິດຕໍ່ຊື້ຢາບ້ານຳຊາຍຄົນດັ່ງກ່າວຈຳນວນ 5 ຖົງ ເທົ່າກັບ 1.000 ເມັດ ແລະ ຍັງເຫຼືອຢາບ້າຈາກຊຸດກ່ອນ 49 ເມັດ ລວມທັງໝົດ 1.049 ເມັດ ມາເວລາປະມານ 12:00 ໂມງ ມີໄວລຸ້ນໂທລະສັບມາສັ່ງຊື້ຢາບ້າ 200 ເມັດ, ຫຼັງຈາກນັ້ນກໍຖືກເຈົ້າໜ້າທີ່ກັກຕົວ ແລະ ກວດຄົ້ນເຮືອນພົບຢາບ້າຈຳນວນດັ່ງກ່າວໄປດຳເນີນຄະດີ.


ພາບ ແລະ ຂ່າວ: ນສພ ຄວາມສະຫງົບ 
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.