Header Ads

ຈັບຍົກຄົວ ຮ່ວມກັນຂາຍຢາບ້າ ລວມຂອງກາງ 5.894 ເມັດໄປດໍາເນີນຄະດີຕາມກົດໝາຍ



ອີງຕາມການລາຍງານຂອງ ນສພ ຄວາມສະຫງົບ  ວ່າ :  ຢາເສບຕິດເປັນສິ່ງທີ່ຜິດກົດໝາຍ ແຕ່ກໍ່ມີກຸ່ມຄົນຈຳນວນໜຶ່ງລັກລອບເຄື່ອນໄຫວຊື້ຂາຍ ແລະ ປັດຈຸບັນເຫັນວ່າ ມີທ່າອ່ຽງເພີ່ມຂຶ້ນຍ້ອນຢາກຮັ່ງມີທາງລັດ ໂດຍບ່ໍເກງກົວຕໍ່ກົດໝາຍ, ຍິ່ງກວ່ານັ້ນມີບາງຄອບຄົວພາກັນເຄື່ອນໄຫວຊື້-ຂາຍຢາເສບຕິດໝົດຄອບຄົວ. ດັ່ງກໍລະນີຄະດີໃນວັນທີ 18 ພຶດສະພາ 2018, ເຈົ້າໜ້າທີ່ໜ່ວຍງານຕໍາຫຼວດສືບສວນ-ສອບສວນຄະດີອາຍາ ພະແນກຕໍາຫຼວດກອງບັນຊາການ ປກສ ເມືອງແກ່ນທ້າວ ແຂວງໄຊຍະບູລີ ໄດ້ຈັບຕົວຜົວ-ເມຍ ແລະ ແມ່ ທີ່ຮ່ວມກັນລັກລອບຊື້-ຂາຍຢາບ້າລວມຂອງກາງທັງໝົດ 5.894 ເມັດ ໄປດໍາເນີນຄະດີຕາມກົດໝາຍ.



ເຈົ້າໜ້າທີ່ກອງບັນຊາການ ປກສ ເມືອງແກ່ນທ້າວ ໃຫ້ຮູ້ວ່າ: ພາຍຫຼັງໄດ້ຮັບແຫຼ່ງຂ່າວໃນວັນທີ 18 ພຶດສະພາ 2018 ມີຜົວ-ເມຍຄູ່ໜຶ່ງ ກໍາລັງນໍາເອົາຢາບ້າອອກຈາກບ້ານມ່ວງເພົ້າ ເມືອງແກ່ນທ້າວ ໄປຂາຍໃຫ້ກຸ່ມມົ້ວສຸມເສບຢາເສບຕິດຢູ່ບ້ານຂຸ່ມສ້ຽວ ເມືອງແກ່ນທ້າວ ແຂວງໄຊຍະບູລີ. ຈາກນັ້ນ, ຈຶ່ງຈັດກໍາລັງວິຊາສະເພາະລົງຕິດຕາມເປົ້າໝາຍຢູ່ເສັ້ນທາງ ລະຫວ່າງ ບ້ານປາກແຄມ ຫາ ບ້ານນໍ້າເຕົ່າ ເມືອງແກ່ນທ້າວ. ຜ່ານການຕິດຕາມເປົ້າໝາຍຮອດເວລາປະມານ 13:00 ໂມງ ຂອງວັນດຽວກັນ, ພົບເຫັນເປົ້າໝາຍ 2 ຄົນຂີ່ລົດຈັກຍີ່ ຫໍ້ເຄນໂບ້ ສີແດງ-ດໍາ ໝາຍເລກທະບຽນ ຈສ 5578 ໄຊຍະບູລີ ຈຶ່ງສະກັດລັດກວດຄົ້ນພົບ ເຫັນຢາບ້າຢູ່ກະເປົາທີ່ຊຸກເຊື່ອງໄວ້ກ້ອງເບາະລົດຈັກມີຢາບ້າ 3.800 ເມັດ ແລະ ເຫັນຢາບ້າຢູ່ຖົງເສື້ອຂອງຜູ້ຂັບຂີ່ຕື່ມອີກ ຈໍານວນ 61 ເມັດ ຈຶ່ງກັກຕົວຜູ້ຂັບຂີ່ທັງ 2 ຄົນ ຊື່ ທ້າວ ສີ້ວ ອາຍຸ 24 ປີ ແລະ ນາງ ປອງລັກ ອາຍຸ 20 ປີ ( ຜົວ-ເມຍ ) ບ້ານມ່ວງເພົ້າ ເມືອງແກ່ນທ້າວ ໄປສອບສວນ.



ຜ່ານການສອບສວນ ພວກກ່ຽວໄດ້ຊັດຖອດຫາເຄືອຂ່າຍດຽວກັນ ຊື່ ນາງ ຕຸ່ມຄໍາ ອາຍຸ 40 ປີ ເຊິ່ງເປັນແມ່ຂອງ ນາງ ປອງລັກ ເປັນຜູ້ຂາຍຢູ່ເຮືອນ. ຈາກນັ້ນ, ເວລາປະມານ 18:00 ໂມງ ວັນດຽວກັນ ເຈົ້າໜ້າທີ່ໄດ້ເຂົ້າປິດລ້ອມເຮືອນຂອງເປົ້າໝາຍພົບເຫັນ ນາງ ຕຸ່ມຄໍາ ເອົາຢາບ້າ ຈໍານວນ 33 ເມັດ ໂຍນຖິ້ມອອກຈາກເຮືອນ ເພື່ອທໍາລາຍຫຼັກຖານ ແລະ ຜ່ານການກວດຄົ້ນພົບເຫັນຢາບ້າຕື່ມອີກ 2.000 ເມັດ ລວມຂອງກາງຢາບ້າທັງໝົດ 5.894 ເມັດ.

ຜ່ານການສືບສວນ-ສອບສວນເບື້ອງຕົ້ນ ພວກກ່ຽວຮັບສາລະພາບວ່າ: ການເຄື່ອນໄຫວພົວພັນຄ້າ-ຂາຍຢາບ້າຄັ້ງນີ້ເປັນຄັ້ງທີສອງ, ໂດຍຄັ້ງທໍາອິດຢູ່ໃນໄລຍະເດືອນມີນາ ປີ 2018 ໄດ້ມີຄົນນໍາເອົາຢາບ້າມາຂາຍໃຫ້ 2.000 ເມັດ. ຈາກນັ້ນ, ຈຶ່ງຕິດຕໍ່ຊື້-ຂາຍຢາບ້າຕື່ມອີກຈໍານວນ 3 ມັດ ເທົ່າກັບ 6.000 ເມັດ ໂດຍນັດສົ່ງໃຫ້ກັນໃນວັນທີ 16 ພຶດສະພາ 2018 ພາຍຫຼັງໄດ້ຢາບ້າມາແລ້ວ; ນາງ ປອງລັກ ກໍໄດ້ເອົາຢາບ້າຈໍານວນດັ່ງກ່າວແບ່ງໃຫ້ ນາງ ຕຸ້ມຄໍາ ຜູ້ເປັນແມ່ ໄປຂາຍໃຫ້ກຸ່ມມົ້ວສຸມເສບຢາເສບຕິດ.

ຂ່າວໃຫ້ຮູ້ຕື່ມອີກວ່າ: ໃນວັນທີ 20 ພຶດສະພາ 2018 ເຈົ້າໜ້າທີ່ກອງບັນຊາການ ປກສ ເມືອງແກ່ນທ້າວ ໄດ້ຈັບຕົວ ທ້າວ ຮຸ່ງ ອາຍຸ 35 ປີ ຢູ່ບ້ານນາແກ້ບ ເມືອງຊະນະຄາມ ແຂວງວຽງຈັນ ພ້ອມຂອງກາງຢາບ້າ ຈໍານວນ 100 ເມັດ ແລະ ນາງ ຍຸ້ນ ອາຍຸ 44 ປີ ຢູ່ບ້ານດອນເມນ ເມືອງແກ່ນທ້າວ ແຂວງໄຊຍະບູລີ ພ້ອມຂອງກາງຢາບ້າ 65 ເມັດ ໃນຂະນະທີ່ເອົາຢາບ້າໄປຂາຍໃຫ້ກັນຢູ່ບ້ານດອນເມນ. ພວກກ່ຽວສາລະພາບວ່າ: ໄດ້ຮ່ວມກັນກັບ ທ້າວ ປ່ຽນ ອາຍຸ 45 ປີ, ນາງ ດາວ ອາຍຸ 46 ປີ ຢູ່ບ້ານດອນເມນ ເມືອງແກ່ນທ້າວ ແລະ ນາງ ແພວ ອາຍຸ 35 ປີ ເມືອງແກ່ນທ້າວ ແຂວງໄຊຍະບູລີ ເຄື່ອນໄຫວຊື້-ຂາຍຢາບ້າ


ພາບ-ຂ່າວ: ນສພ ຄວາມສະຫງົບ
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.