Header Ads

ເກີດເຫດຫົດຫູ່ຈິດໃຈ ໄລ່ຟັນກັນຢູ່ຕະຫຼາດກາງຄືນ ແຂວງອຸດົມໄຊ




ອີງຕາມການລາຍງານຂ່າວຂອງ ວິທະຍຸໂທລະພາບ ອຸດົມໄຊ ວ່າ: ເວລາປະມານ 22:00 ໂມງຂອງວັນທີ 3 ມິຖຸນາ ໄດ້ເກີດເຫດຟັນກັນ ຢູ່ທີ່ຕະຫຼາດກາງຄືນແຂວງອຸດົມໄຊ. ພາຍຫຼັງເກີດເຫດ ເຈົ້າໜ້າທີ່ ປກສ ແຂວງອຸດົມໄຊໄດ້ລົງເຄື່ອນໄຫວກວດກາເບິ່ງສະພາບຕົວຈິງ ຈິ່ງພົບວ່າ ຜູ້ຖືກເຄາະຮ້າຍແມ່ນທ້າວ ຄຳຫຼ້າ ປັດຈຸບັນຢູ່ບ້ານ ດອນໄຊ ເມືອງໄຊ ແຂວງອຸດົມໄຊ ຖຶກງ້າວຟັນເຂົ້າຕາມຫົວ, ແຂນ, ຂາ ແລະ ຫຼາຍຈຸດຕາມຕົນຕົວ ເຮັດໃຫ້ໄດ້ຮັບບາດເຈັບສາຫັດ. ສຳຫຼັບຜູ້ກໍ່ເຫດຊາບຊື່ທ້າວ ໝາຍ ຫຼື ໄນ ອາຍຸ 21 ປີ ຊົນເຜົ່າມົ້ງ ອາຊີບກຳມະກອນ ຢູ່ບ້ານໂພລົມ ເມືອງຄຳເກີດ ແຂວງບໍລິຄຳໄຊ. 






ຕາມຄຳໃຫ້ການເບື້ອງຕົ້ນຂອງທ້າວ ໝາຍ ຜູ້ກໍ່ເຫດໃຫ້ຮູ້ວ່າ ເວລາປະມານ 19 ໂມງຂອງວັນດຽວກັນ ຜູ້ກ່ຽວກັບແຟນສາວໄດ້ໄປນັ່ງກິນເບຍນຳກັນຢູ່ຮ້ານອາຫານແຫ່ງໜຶ່ງທີ່ບ້ານນາແລເມືອງໄຊ ພໍກິນໄປໄດ້ໄລຍະໜຶ່ງ ຢູ່ໆ ທ້າວ ຄຳຫຼ້າ ກໍເຂົ້າມາທັກທາຍສະບາຍດີກັບຕົນເອງ ພ້ອມທັງໄດ້ເວົ້າວ່າ ຖ້າແມ່ນຄົນອື່ນຖຶກເຈັບແຕ່ດົນແລ້ວ ແລະ ຂະນະດຽວກັນນັ້ນ ທ້າວ ຄຳຫຼ້າ ຍັງໄດ້ເອົາສອກມາທຸບຫົວຕົນເອງ 2 ຄັ້ງ. ເມື່ອເຫັນແນວນັ້ນ ຜູ້ເປັນແຟນສາວ ແລະ ໝູ່ຂອງທ້າວ ຄຳຫຼ້າກໍໄດ້ເຂົ້າຫ້າມ. ຫຼັງຈາກນັ້ນ ຕົນເອງກໍໄດ້ຊວນແຟນສາວໜີຈາກຮ້ານ ມາບ່ອນພັກຕົນເອງ. 


ພໍໄດ້ປະມານ 10-20 ນາທີ ຕົນເອງກໍໄດ້ຈັບເອົາງ້າວຢູ່ຫ້ອງນອນ ເພື່ອຈະໄປຊອກຟັນທ້າວ ຄຳຫຼ້າ ເປັນການສັ່ງສອນໃຫ້ເຂັດຫຼາບ ແລ້ວຕົນເອງກໍໄດ້ຂີ່ລົດຈັກອອກໄປເລາະຊອກທ້າວ ຄຳຫຼ້າ ຈົນໄປພໍ້ຢູ່ທີ່ຕະຫຼາດກາງຄືນ ໃນຂະນະນັ້ນ ທ້າວ ຄຳຫຼ້າ ກຳລັງນັ່ງກິນເບຍຢູ່ກັບຜູ້ຍິງອີກ 1 ຄົນ, ຕົນເອງກໍໄດ້ຍ່າງລົງໄປຫາທ້າວ ຄຳຫຼ້າ ພ້ອມກັບຖືງ້າວຢູ່ໃນມືແລ້ວຖາມທ້າວ ຄຳຫຼ້າວ່າ ເຈົ້າຈະເອົາແນວໃດກັບຂ້ອຍແທ້ ທ້າວ ຄຳຫຼ້າ ໄດ້ຢືນຂຶ້ນພ້ອມທັງ ຍື້ແຂນມາຫາຕົນເອງ ແລ້ວຕົນເອງກໍໄດ້ໃຊ້ງ້າວຟັນໃສ່ແຂນ, ຂາ, ບໍລິເວນຫົວ ລວມທັງໝົດປະມານ 10 ກວ່າຄັ້ງ.





 ຫຼັງຈາກນັ້ນກໍ່ໄດ້ຂີ່ລົດຈັກກັບທີ່ພັກ ພໍໄດ້ປະມານ 1 ຊົ່ວໂມງກວ່າ ຕົນເອງກໍໄດ້ເຂົ້າມອບຕົວຕໍ່ເຈົ້າໜ້າທີ່ຕຳຫຼວດ ປກສ ແຂວງອຸດົມໄຊ. ສ່ວນທ້າວ ຄຳຫຼ້າ ທົນຕໍ່ບາດແຜ ແລະ ຄວາມເຈັບປວດບໍ່ໄດ້ ຈິ່ງໄດ້ໝົດສະຕິຈົມຢູ່ກອງເລືອດ ໄດ້ໄລຍະໜຶ່ງ ພີ່ນ້ອງກໍໄດ້ນຳສົ່ງໂຮງໝໍໄຊມັງກອນ. ສ່ວນສາເຫດໃນການ ລົງມືຟັນກັນຄັ້ງນີ້ ທາງເຈົ້າໜ້າທີ່ ປກສ ແຂວງອຸດົມໄຊ ກຳລັງເລັ່ງເກັບກຳຂໍ້ມູນ ແລະ ສືບສວນສອບສວນຢູ່. ຂ່າວໃຫ້ຮູ້ອີກວ່າ ມາຮອດຕອນເຊົ້າຂອງວັນທີ 4 ມິຖຸນາ ທ້າວ ຄຳຫຼ້າ ໄດ້ຟື້ນສະຕິຄືນມາແລ້ວ ແຕ່ອາການຍັງຢູ່ໃນຂັ້ນອັນຕະລາຍຢູ່.



ຂ່າວ: ໄມພອນ ພົມມະຈັນ  (ວິທະຍຸໂທລະພາບ ອຸດົມໄຊ)
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.