Header Ads

ຈັບຜູ້ຄ້າຢາເສບຕິດພ້ອມຂອງກາງ ປະເພດ ເຮໂຣອິນ ແລະຢາບ້າ ຈຳນວນຫລາຍ



ໃນວັນທີ 10 ມິຖຸນາ 2018, ໜ່ວຍງານຕໍາຫຼວດສະກັດກັ້ນ ແລະ ຕ້ານຢາເສບຕິດ ກອງບັນຊາການ ປກສ ເມືອງໃໝ່ ແຂວງຜົ້ງສາລີ ໄດ້ນໍາກໍາລັງເຈົ້າໜ້າທີ່ວິຊາສະເພາະປິດລ້ອມຈັບເປົ້າໝາຍຄ້າຂາຍຢາເສບຕິດ ຈຳນວນ 3 ຄົນ ຢູ່ຖຽງນາ ເຂດບ້ານຫ້ວຍຫວ່າງເກົ່າ ເມືອງໃໝ່ ໄດ້ພ້ອມຢາເສບຕິດຫຼາຍລາຍການ; ໃນນີ້, ມີເຮໂຣອິນ 7 ແທ່ງ, ຢາບ້າ 30.000 ກວ່າເມັດ, ຝິ່ນດໍາ 2 ກ້ອນ, ປືນລູກອັດ 1 ກະບອກ ແລະ ປືນແກັບ 4 ກະບອກ.

ເຈົ້າໜ້າທີ່ ປກສ ເມືອງໃໝ່ ເປີດເຜີຍໃຫ້ຮູ້ວ່າ: ພາຍຫຼັງທີ່ໄດ້ສືບຮູ້ວ່າ ພວກກ່ຽວກໍາລັງເອົາຢາເສບຕິດໄປສົ່ງໃຫ້ຜູ້ສັ່ງຊື້ ໂດຍນັດກັນຢູ່ຖຽງນາ ເຂດບ້ານຫ້ວຍຫວ່າງເກົ່າ ເມືອງໃໝ່ ຈຶ່ງໄດ້ນໍາກໍາລັງວິຊາສະເພາະໄປຕິດຕາມ; ຮອດວັນທີ 10 ມິຖຸນາ 2018, ເຫັນເປົ້າໝາຍຢູ່ຖຽງນາຫຼັງດັ່ງກ່າວ ຈຶ່ງເຂົ້າກວດຄົ້ນພົບເຫັນຢາເສບຕິດ ປະເພດເຮໂຣອິນ 7 ແທ່ງ, ຢາບ້າ 15 ມັດ ກັບ 1.312 ເມັດ ລວມທັງໝົດ 31.312 ເມັດ ແລະ ຝິ່ນຈໍານວນ 2 ກ້ອນ ໜັກ 1,6 ກິໂລກຼາມ, ປືນລູກອັດ 1 ກະບອກ, ປືນແກັບ 4 ກະບອກ. ຜູ້ຖືກຫາ 3 ຄົນ ຊື່ທ້າວ ເສືອຍ ອາຍຸ 34 ປີ, ນາງ ນຸ້ຍ ອາຍຸ 30 ປີ ຢູ່ບ້ານຫ້ວຍຫວ່າງເກົ່າ ເມືອງໃໝ່ (ຜົວ-ເມຍ) ແລະ ນາງ ເຢັນ ອາຍຸ 24 ປີ ຢູ່ບ້ານຫ້ວຍເຮ່ຍ ເມືອງໃໝ່ ແຂວງຜົ້ງສາລີ.

ຜ່ານການສືບສວນ-ສອບສວນ ພວກກ່ຽວຮັບສາລະພາບວ່າ: ຢາເສບຕິດຈໍານວນດັ່ງກ່າວ ແມ່ນຈະເອົາໄປສົ່ງໃຫ້ຜູ້ສັ່ງຊື້ ໂດຍນັດຈຸດຊື້-ຂາຍຢູ່ຖຽງນາ, ແຕ່ຖືກເຈົ້າໜ້າທີ່ຈັບຕົວກ່ອນ; ປັດຈຸບັນ, ຄະດີດັ່ງກ່າວພວມຢູ່ໃນຂັ້ນຕອນການສືບສວນ-ສອບສວນຂະຫຍາຍຜົນຜູ້ຮ່ວມຂະບວນການໄປດໍາເນີນຄະດີຕາມກົດໝາຍ.

ພາບ-ຂ່າວ: ນສພ ຄວາມສະຫງົບ 
© ໂຕະນໍ້າຊາ  | www.tonamcha.com | www.tonamchanews.com

______


No comments

Powered by Blogger.