Header Ads

ຫ້ອງວ່າການສຳນັກງານນາຍົກລັດຖະມົນຕີ ຮ່ວມກັບກະຊວງພາຍໃນ ແລະ ກະຊວງຍຸຕິທຳ ໄດ້ຈັດກອງປະຊຸມເຜີຍແຜ່ກົດໝາຍວ່າ ດ້ວຍລັດຖະບານ ແລະ ນິຕິກຳທີ່ກ່ຽວຂ້ອງ



ໃນວັນທີ 3 ກໍລະກົດ 2018 ທີ່ຫໍປະຊຸມແຫ່ງຊາດ, ຫ້ອງວ່າການສຳນັກງານນາຍົກລັດຖະມົນຕີ ຮ່ວມກັບກະຊວງພາຍໃນ ແລະ ກະຊວງຍຸຕິທຳ ໄດ້ຈັດກອງປະຊຸມເຜີຍແຜ່ກົດໝາຍວ່າ ດ້ວຍລັດຖະບານ ແລະ ນິຕິກຳທີ່ກ່ຽວຂ້ອງ. ພາຍໃຕ້ການເປັນປະທານ ຂອງທ່ານ ສຈ.ປອ. ຈະເລີນ ເຢຍປາວເຮີ, ລັດຖະມົນຕີປະຈຳສຳນັກງານນາຍົກລັດຖະມົນຕີ ແລະ ໃຫ້ກຽດເຂົ້າຮ່ວມຂອງທ່ານ ປອ. ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ; ມີບັນດາທ່ານ ຮອງລັດຖະມົນຕີ, ຮອງຫົວໜ້າອົງການທຽບເທົ່າກະຊວງ, ຮອງເຈົ້າຄອງນະຄອນຫຼວງວຽງຈັນ, ຮອງປະທານກຳມາທິການ ສະພາແຫ່ງຊາດ, ຄະນະກົມ, ຫົວໜ້າພະແນກການ ແລະ ເຈົ້າເມືອງ ພາຍໃນນະຄອນຫຼວງວຽງຈັນ ເຂົ້າຮ່ວມ.




ກອງປະຊຸມຄັ້ງນີ້, ໄດ້ຮັບຟັງການເຜີຍແຜ່ ກົດໝາຍວ່າດ້ວຍລັດຖະບານ ສະບັບປັບປຸງ ປີ 2016 ຈາກທ່ານ ພູທອນ ແກ້ວດວງມະນີ, ຫົວໜ້າກົມໂຄສະນາເຜີຍແຜ່ກົດໝາຍ, ກະຊວງຍຸຕິທຳ; ດຳລັດວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຫ້ອງວ່າການສຳນັກງານນາຍົກລັດຖະມົນຕີ ຈາກທ່ານ ສຈ.ປອ. ຈະເລີນ ເຢຍປາວເຮີ, ລັດຖະມົນຕີປະຈຳສຳນັກງານນາຍົກລັດຖະມົນຕີ ແລະ ດຳລັດວ່າດ້ວຍການປະສານງານ ລະຫວ່າງ ບັນດາກະຊວງ, ອົງການທຽບເທົ່າກະຊວງ, ແຂວງ, ນະຄອນຫຼວງວຽງຈັນ ກັບສຳນັກງານນາຍົກລັດຖະມົນຕີ ຈາກທ່ານ ສີພຸກ ວົງພັກດີ, ຮອງລັດຖະມົນຕີກະຊວງພາຍໃນ. ທັງນີ້ ກໍ່ເພື່ອເຮັດໃຫ້ຜູ້ເຂົ້າຮ່ວມ ໄດ້ຮັບຮູ້, ເຊື່ອມຊຶມ ບັນດາເນື້ອໃນຈິດໃຈ ຂອງບັນດານິຕິກຳດັ່ງກ່າວ ແລະ ນຳໄປຈັດຕັ້ງຂະຫຍາຍ ເຂົ້າສູ່ຂົງເຂດວຽກງານ ແລະ ທ້ອງຖິ່ນຂອງຕົນ ໃຫ້ປະກົດຜົນເປັນຈິງ, ແນໃສ່ເຮັດໃຫ້ການຄຸ້ມຄອງລັດ-ຄຸ້ມຄອງສັງຄົມ ມີປະສິດທິພາບ, ມີຄວາມເປັນເອກະພາບ, ໄດ້ຮັບປະສິດທິຜົນ, ສອດຄ່ອງກັບແນວທາງນະໂຍບາຍຂອງພັກ, ແທດເໝາະກັບສະພາບການພັດທະນາເສດຖະກິດ-ສັງຄົມ ກໍ່ຄື ເງື່ອນໄຂຈຸດພິເສດ ໃນການບໍລິຫານ-ຄຸ້ມຄອງລັດ ໃນແຕ່ລະໄລຍະ, ທັງເຮັດໃຫ້ ການປະສານງານ ລະຫວ່າງ ຫ້ອງວ່າການສຳນັກງານນາຍົກລັດຖະມົນຕີ ກັບບັນດາຂະແໜງການສູນກາງ ແລະ ທ້ອງຖິ່ນ ມີຄວາມກົມກຽວກັນດີ, ມີຄວາມຄ່ອງແຄ້ວ ແລະ ກາຍເປັນບ່ອນອີງ ໃຫ້ແກ່ການຈັດຕັ້ງ ແລະ ເຄື່ອນໄຫວວຽກງານ ນັບມື້ໄດ້ຮັບຜົນດີຂຶ້ນເປັນກ້າວໆ. 




​​​​ ​ໃນໂອກາດເຜີຍແຜ່ນິຕິກຳຄັ້ງນີ້, ທ່ານ ສຈ.ປອ. ຈະເລີນ ເຢຍປາວເຮີ ຍັງໄດ້ຍົກໃຫ້ເຫັນ ປະຫວັດຄວາມເປັນມາ, ສະພາບ ການຈັດຕັ້ງປະຕິບັດ ແລະ ເຫດຜົນ ໃນການສ້າງ ແລະ ປັບປຸງກົດໝາຍວ່າດ້ວຍລັດຖະບານ ໃນແຕ່ລະໄລຍະ ໂດຍສະເພາະ ສະບັບປີ 1995 ມາເປັນສະບັບປັບປຸງ ປີ 2003, ຈາກປີ 2003 ເປັນປີ 2015 ແລະ ຈາກປີ 2015 ເປັນປີ 2016. ພ້ອມທັງ ອະທິບາຍຕື່ມ ຕໍ່ເນື້ອໃນບາງມາດຕາ ໂດຍສະເພາະ ມາດຕາທີ່ມີການເພີ່ມ ແລະ ປັບປຸງເນື້ອໃນ ໃນສະບັບປີ 2016. ນອກຈາກນັ້ນ, ທ່ານຍັງໄດ້ສະເໜີໃຫ້ຜູ້ເຂົ້າຮ່ວມ ຈົ່ງພ້ອມກັນຄົ້ນຄວ້າ, ເຊື່ອມຊຶມ ເພື່ອຄວາມເປັນເອກະພາບ ແລະ ນຳໄປຈັດຕັ້ງຜັນຂະຫຍາຍ ເຂົ້າສູ່ວຽກງານຕົວຈິງ ຢ່າງຖືກຕ້ອງ ແລະ ແທດເໝາະກັບ ສະພາບເງື່ອນໄຂຄວາມເປັນຈິງ. ກໍລະນີມີບັນຫາໃດ ບໍ່ທັນຈະແຈ້ງ, ບໍ່ທັນສອດຄ່ອງ ຫຼື ບໍ່ທັນເຂົ້າໃຈ ກໍ່ສາມາດປະກອບຄຳເຫັນ ຫຼື ຊັກຖາມ ຕໍ່ຄະນະຮັບຜິດຊອບເຜີຍແຜ່ ເພື່ອເປັນຂໍ້ມູນ ໃຫ້ແກ່ການຄົ້ນຄວ້າ ແລະ ປັບປຸງນິຕິກຳດັ່ງກ່າວ ໃນອະນາຄົດ.​

ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ 

© ໂຕະນໍ້າຊາ  | www.tonamcha.com | www.tonamchanews.com
_______

No comments

Powered by Blogger.