Header Ads

ລັດຖະບານຈີນ ມອບເຄື່ອງຊ່ວຍເຫລືອຜູ້ປະສົບ ໄພ ຢູ່ອັດຕະປື



ໃນວັນທີ 30 ກໍລະກົດ 2018,  ລັດຖະບານ ​ແຫ່ງ ສປ ຈີນ ​ໄດ້​ລົງ​ນາມ​ເພື່ອ ​ມອບ​ເຄື່ອງ​ຊ່ວຍ​ເຫລືອ​​ ໃຫ້​ແກ່ລັດຖະບານ ແຫ່ງ ສປປ ລາວ  ເພື່ອນຳໄປຊ່ວຍຜູ້ປະສົບ​​ໄພພິບັດ ຢູ່ເມືອງ ສະໜາມໄຊ ແຂວງ ອັດຕະປື.



ອຸປະກອນ​ທີ່​ນຳ​ມາ​ຊ່ວຍ​ເຫລືອ​ ໃນ​ຄັ້ງ​ນີ້, ​ປະກອບ​ມີ: ​ເຕັ້ນ 500 ອັນ,  ຜ້າ​ຫົ່ມ 1.000 ຜືນ,  ມຸ້ງ 1.000 ດາງ,  ​ເຮືອ 100 ລຳ​ ​ແລະ ​ເຄື່ອງ​ກອງ​ນ້ຳ 100 ຊຸດ  ​ລວມມູນ​ຄ່າ​ທັງ​ໝົດປະມານ 24,6 ຕື້​ກີບ (20 ລ້ານ​ຢວນ)  ໂດຍ​ໄດ້​ແບ່ງ​ອອກ​ເປັນ 2 ງວດ,  ​ເຊິ່ງງວດ​ທຳ​ອິດ ໄດ້ຂົນສົ່ງມາເຖິງ ສະໜາມບິນສາກົນວັດໄຕ ນະຄອນຫລວງວຽງຈັນ,  ໃນຕອນບ່າຍວັນທີ 30 ກໍລະກົດ 2018,  ສ່ວນງວດ​ທີ​ສອງ​ແມ່ນ​ຈະ​ມາ​ຮອດ​ ໃນ​ວັນ​ທີ 31 ກໍລະກົດ 2018  ໂດຍແມ່ນບໍລິສັດນຳເຂົ້າ-ສົ່ງອອກເຄື່ອງກົນຈັກ  ແຂວງເຫີເປີຍ ສປ ຈີນ  ຈຳກັດ  ເປັນຜູ້ຮັບຜິດຊອບການຈັດຕັ້ງປະຕິບັດຕົວຈິງ​.

ໃຫ້​ກຽດລົງ​ນາມ​ໃນ​ຄັ້ງນີ້,  ຊຶ່ງ​ຕາງໜ້າ​ໃຫ້​ລັດຖະບານ​ແຫ່ງ ສປປ ລາວ  ​​ໂດຍ ທ່ານ ນາງ ​ໃບ​ຄຳ ຂັດ​ທິຍະ ຮອງ​ລັດຖະມົນຕີ  ກະຊວງ​ແຮງ​ງານ ​ແລະ ສະຫວັດດີ​ການ​ສັງຄົມ  ​ແລະ ​ຕາງໜ້າ​ໃຫ້​ລັດຖະບານ​ແຫ່ງ ສປ ຈີນ,  ​ໂດຍ ທ່ານ ຫວາງ ​ເວີນ ທຽນ ​ເອກ​ອັກຄະ​ລັດຖະທູດ  ສປ ຈີນ ປະຈຳ ສປປ ລາວ.  ການ​ຊ່ວ​ຍ​ເຫລືອ​ໃນ​ຄັ້ງ​ນີ້,  ເປັນການຊວຍເຫລືອດ້ານມະນຸດສະທຳ  ໃຫ້ແກ່ລັດຖະບານ ສປປ ລາວ,  ທັງ​ນີ້​ ກໍເພື່ອເປັນການສະແດງ ເຖິງນ້ຳໃຈໄມຕີຈິດມິດຕະພາບ  ຂອງລັດຖະບານ ແລະ ປະຊາຊົນຈີນ  ທີ່ມີຕໍ່ລັດຖະບານ ແລະ ປະຊາຊົນລາວ.





​ໂອກາດ​ດັ່ງກ່າວ, ທ່ານ ຫວາງ ​ເວີນ ທຽນ  ກໍ​ໄດ້​ສະ​ແດ​ງຄວາມ​ເສົ້າ​ສະຫລົດ​ໃຈ​ ຢ່າງ​ສຸດ​ຊຶ້ງ ຕໍ່​ພີ່ນ້ອງ​ຊາວ​ລາວ​ທີ່​ເສຍ​ຊີວິດ  ​ແລະ ສະ​ແດງ​ຄວາມ​ເຫັນ​ອົກ​ເຫັນ​ໃຈ​ຢ່າງ​ຈິງ​ໃຈ​  ຕໍ່​ຄອບຄົວ​ຜູ້​ເສຍ​ຊີວິດ ​ແລະ ບາດ​ເຈັບ,  ພ້ອມ​ທັງ​ສະ​ແດງ​ຄວາມ​ເຊື່ອໝັ້ນວ່າ  ພາຍ​ໃຕ້​ການ​ນຳພາ​ອັນ​ເຂັ້ມ​ແຂງ​ ຂອງ​ພັກ ​ແລະ ລັດຖະບານ​ລາວ,  ປະຊາຊົນ​ລາວ​ຜູ້​ປະສົບ​ໄພ​  ຈະ​ສາມາດ​ຜ່ານ​ຜ່າ​ຄວາມ​ຫຍຸ້ງຍາກ​ໄດ້ ​ຢ່າງ​ແນ່ນອນ, ພ້ອມ​ທັງຟື້ນ​ຟູ​ການ​ຜະລິດ  ​ແລະ ຊີວິດ​ການ​ເປັນ​ຢູ່​​ໃຫ້​ຄືນ​ສູ່​ຄວາມ​ເປັນ​ປົກກະຕິ ​ໂດຍ​ໄວ.

ທ່ານ ນາງ ​ໃບ​ຄຳ ຂັດ​ທິຍະ ກໍ​ໄດ້ກ່າວສະ​ແດງ ​ຄວາມ​ຂອບ​ໃຈ ​ແລະ ຮູ້​ບຸນຄຸນ​ ມາ​ຍັງ​ລັດຖະບານ ​ແລະ ປະຊາຊົນ​ຈີນ  ຕໍ່​ກັບ​ການ​ຊ່ວຍ​ເຫລືອ​ຄັ້ງ​ນີ້,  ພ້ອມ​ທັງ​​ໃຫ້​ຄຳ​ໝັ້ນ​ສັນ​ຍາວ່າ ຈະ​ນຳ​ເອົາອຸປະກອນ ​ການ​ຊ່ວຍ​ເຫລືອ​ດັ່ງ​ກ່າວ  ​ສົ່ງ​​ໄປ​ຮອດ​ໄປ​​ເຖິງຜູ້​ປະສົບ​ໄພ​ຢ່າງ​ທົ່ວ​ເຖິງ  ​ແລະ ທັນ​ການ.


ຂ່າວ: ສິງ​ຄຳ, ພາບ: ​ເກດສະໜາ
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.