Header Ads

ປະຊາຊົນ 2 ບ້ານຢູ່ເມືອງ ໄຊຍະບູລີ ໄດ້ຊົມໃຊ້ຂົວຂ້າມແມ່ນໍ້າແມດແລ້ວ



ໃນວັນທີ 21/7/2018 ຜ່ານມານີ້ ໂຄງການກໍ່ສ້າງຂົວຂ້າມແມ່ນໍ້າແມດ ຕັ້ງຢູ່ລະຫວ່າງກາງຂອງ ບ້ານທ່າ ແລະ ບ້າຍໂພນໂຮມ ຢູ່ເມືອງໄຊຍະບູລີ ແຂວງໄຊຍະບູລີ, ຫ່າງຈາກເທດສະບານເມືອງ ໄປທາງທິດຕາເວັນຕົກ 25 ກິໂລແມັດ, ໂຄງການດັ່ງກ່າວໄດ້ຮັບທຶນອານຸມັດການລົງທຶນຂອງລັດ ສົກ 2017-2018 ເປັນທຶນພັດທະນາຂອງຊົນນະບົດ, ເຊິ່ງເລີ່ມລົງມືກໍ່ສ້າງແຕ່ວັນທີ 27 ມີນາ 2017 ຮອດປະຈຸບັນແມ່ນສຳເລັດ 100 %, ຂົວດັ່ງກ່າວມີຄວາມຍາວ 30,45 ແມັດ, ກ້ວາງ 3,5 ແມັດ, ໂຄງສ້າງເບື້ອງລຸ່ມເປັນເສົາເບຕົງເສີມເຫຼັກ, ໂຄງສ້າງເບື້ອງເທີງເປັນຂົວເຫຼັກຮາວດຽວ, ສາມາດຮັບນໍ້າໜັກໄດ້ 7 ໂຕນ, ມູນຄ່າການກໍ່ສ້າງທັງໝົດ 3 ຕື້ 2 ຮ້ອຍລ້ານ ກວ່າກີບ, ໃນນັ້ນທຶນສົມທົບຂອງປະຊາຊົນ 1 ຮ້ອຍລ້ານ ກວ່າກີບ, ໂດຍແມ່ນບໍລິສັດ ອຸທຸມພອນ ກໍ່ສ້າງຂົວທາງ ເປັນຜູ້ຮັບເໝົາກໍ່ສ້າງ.


ພິທີມອບ-ຮັບ ແລະ ເປີດນຳໃຊ້ຂົວຢ່າງເປັນທາງການ ໄດ້ຈັດຂຶ້ນໃນວັນທີ 15 ກໍລະກົດ 2018 ທີ່ບ້ານ ໂພນໂຮມ ເມືອງ ໄຊຍະບູລີ, ໂດຍການເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີ , ມີທ່ານ ຄຳສິງສໍລະສຸກ ເຈົ້າເມືອງ ໄຊຍະບູລີ, ມີບັນດາແຂກພາກສ່ວນທີ່ກ່ຽວຂ້ອງອ້ອມຂ້າງແຂວງ ແລະ ເມືອງ ໄຊຍະບູລີ, ຕະຫຼອດເຖິງປະຊາຊົນພາຍໃນສອງບ້ານເຂົ້າຮ່ວມຢ່າງຫຼວງຫຼາຍ, ໃນພິທີກໍ່ໄດ້ມີການມອບຮັບຂົວ ລະຫວ່າງບໍລິສັດຜູ້ຮັບເໝົາກໍ່ສ້າງໂດຍແມ່ນ ທ່ານ ຄຳຂ່ອງ ແກ້ວມະນີ ຕາງໜ້າໃຫ້ບໍລິສັດ ອຸທຸມພອນກໍ່ສ້າງຂົວທາງ, ເຈົ້າຂອງໂຄງການໂດຍແມ່ນ ທ່ານ ສີສຸກ ສີພານິດ ຫົວໜ້າຫ້ອງການ ໂຍທາ ເມືອງ ໄຊຍະບູລີ ແລະ ມອບຕໍ່ໃຫ້ອຳນາດການປົກຄອງສອງບ້ານ ເປັນຜູ້ຄຸ້ມຄອງປົກປັກຮັກສາ ແລະ ນຳໃຊ້, ຈາກນັ້ນ ທ່ານ ພົງສະຫວັນ ສິດທະວົງ ເຈົ້າແຂວງ ໄຊຍະບູລີກໍ່ໄດ້ໃຫ້ກຽດໂອ້ລົມຕໍ່ພິທີ, ກ່ອນອື່ນ ທ່ານໄດ້ຍ້ອງຍໍຊົມເຊີຍຕໍ່ຜົນສຳເລັດດັ່ງກ່າວອັນເປັນສິ່ງສຳຄັນໃນການເປັນຂົວຕໍ່ໄປ-ມາຫາສູ່ກັນຂອງປະຊາຊົນເຂດດັ່ງກ່າວ, ທັງເປັນຄວາມສະດວກສະບາຍໃນການລຳລຽງສິນຄ້າ, ຂົນສົ່ງຜົນຜະຜິດກະສິກຳໄປສູ່ຕົວເມືອງໄດ້ວ່ອງໄວ, ທ່ານ ຍັງໄດ້ກ່າວຕື່ມອີກວ່າ: ເມືອມີຂົວຂ້າມແມ່ນໍ້າແລ້ວ ປະຊາຊົນທຸກຄົນຕ້ອງເປັນເຈົ້າການໃນການປົກປັກຮັກສາ ເພື່ອໃຫ້ນຳໃຊ້ໄດ້ຍາວນານ, ເອົາໃຈໃສ່ໃນການຜະລິດກະສິກໍາໃຫ້ຫຼາຍໃຫ້ກາຍເປັນສິນຄ້ານຳພາຄອບຄົວໃຫ້ຮັ່ງມີ ແລະ ຕ້ອງເອົາໃຈໃສ່ເປັນຫູເປັນຕາ ພ້ອມທັງຕ້ານ ແລະ ສະກັດກັ້ນປະກົດການຫຍໍ້ທໍ້ ເປັນຕົ້ນແມ່ນບັນຫາຢາເສບຕິດ, ໂອກາດດັ່ງກ່າວອຳນາດການປົກຄອງບ້ານກໍ່ໄດ້ບາສີໃຫ້ການນຳຂອງແຂວງ ແລະ ເມືອງທີ່ເຂົ້າຮ່ວມພິທີ, ທັງນີ້ກໍ່ເພື່ອເປັນການສະແດງຄວາມຮູ້ບຸນຄຸນຕໍ່ການນຳພັກ-ລັດ, ເວົ້າລວມ, ເວົ້າສິເພາະແມ່ນການນຳຂອງແຂວງ ແລະ ເມືອງ ໄຊຍະບູລີ ທີ່ຍາມໃດກໍ່ເປັນຫວ່ງເປັນໄຍຕໍ່ການດຳລົງຊີວິດຂອງປະຊາຊົນດ້ວຍດີຕະຫຼອດມາ.

ຂ່າວ-ພາບ : ອຸ່ນເຮືອນ ໂພທິລັກ
© ໂຕະນໍ້າຊາ  | www.tonamcha.com | www.tonamchanews.com
_______



No comments

Powered by Blogger.