Header Ads

ກອງປະຊຸມປຶກສາຫາລືທົບທວນຄືນຜົນການຈັດຕັ້ງປະຕິບັດ ປີທ່ອງທ່ຽວລາວ 2018



ໃນວັນທີ 13 ກໍລະກົດ 2018 ຢູ່ທີ່ຫໍວັດທະນະທໍາແຫ່ງຊາດ ໄດ້ຈັດກອງປະຊຸມປຶກສາຫາເພື່ອທົບທວນຄືນ ຜົນການຈັດຕັ້ງປະຕິບັດປີທ່ອງທ່ຽວລາວ 2018 ແລະ ທິດທາງແຜນການໃນຕໍ່ໜ້າ, ພາຍໃຕ້ການເປັນປະທານຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຊີ້ນໍາລະດັບຊາດ ໃນການຈັດປີທ່ອງທ່ຽວລາວ 2018, ມີທ່ານລັດຖະມົນຕີ, ບັນດາທ່ານຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ບັນດາທ່ານຮອງເຈົ້າແຂວງ ແລະ ອານຸກໍາມະການຂັ້ນສູນກາງ ແລະ ທ້ອງຖິ່ນ ເຂົ້າຮ່ວມ.



ໂອກາດດັ່ງກ່າວ, ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ຜູ້ຊີ້ນໍາວຽກງານທ່ອງທ່ຽວ ກໍ່ໄດ້ລາຍງານໃຫ້ຊາບ ກ່ຽວກັບຜົນຂອງການຈັດຕັ້ງປະຕິບັດປີທ່ອງທ່ຽວລາວ 2018 ເປັນຕົ້ນ: ໃນໄລຍະ 6 ເດືອນຕົ້ນປີ 2018 ໄດ້ມີຈໍານວນນັກທ່ອງທ່ຽວເຂົ້າມາທ່ຽວຊົມ ສປປ ລາວ ຕາມການສັງລວມເກັບກຳຂໍ້ມູນ ມີປະມານ 2 ລ້ານກວ່າເທື່ອຄົນ ເພີ່ມຂຶ້ນ 6% ເມື່ອທຽບໃສ່ໄລຍະດຽວກັນຂອງປີຜ່ານມາ ເຊິ່ງມີຫຼາຍກຸ່ມນັກທ່ອງທ່ຽວມີຈໍານວນເພີ່ມຂຶ້ນຢ່າງໂດດເດັ່ນ ຄື: ກຸ່ມນັກທ່ອງທ່ຽວອາເມລິກາ; ກຸ່ມນັກທ່ອງທ່ຽວອາຊີປາຊີຟິກ; ກຸ່ມນັກທ່ອງທ່ຽວເອີລົບ ແລະ ກຸ່ມນັກທ່ອງທ່ຽວປະເທດອາຟຣິກກາ ແລະ ຕາເວັນອອກກາງ. 

ພ້ອມດຽວກັນນີ້, ຂະແໜງການທ່ອງທ່ຽວ ຍັງໄດ້ເອົາໃຈໃສ່ພັດທະນາວຽກງານການທ່ອງທ່ຽວ ໂດຍໄດ້ມີການສ້າງ ແລະ ຮັບຮອງເອົາແຜນພັດທະນາການທ່ອງທ່ຽວ ລະດັບພາກ ຄື: ພາກເໜືອ, ພາກກາງ ແລະ ພາກໃຕ້ ສໍາລັບປີ 2016-2020; ໄດ້ຈັດຕັ້ງປະຕິບັດບັນດາກິດຈະກໍາພັດທະນາພື້ນຖານໂຄງລ່າງ ທີ່ຕິດພັນກັບການທ່ອງທ່ຽວ; ສ້າງຂີດຄວາມສາມາດໃນການພັດທະນາ, ການສົ່ງເສີມ ແລະ ຄຸ້ມຄອງຈຸດໝາຍປາຍທາງການທ່ອງທ່ຽວ ຕາມທີ່ອົງການທ່ອງທ່ຽວສາກົນໄດ້ກໍານົດ; ໄດ້ຈັດກອງປະຊຸມປຶກສາຫາລື ລະຫວ່າງ ພາກລັດກັບພາກທຸລະກິດຜູ້ປະກອບການ ກ່ຽວກັບການສະໜັບສະໜູນ ແລະ ພັດທະນາການທ່ອງທ່ຽວ. ຄຽງຄູ່ກັນນັ້ນ ກໍ່ໄດ້ມີການຈັດຝຶກອົບຮົມ ເພື່ອຍົກລະດັບຄຸນນະພາບ ໃນການບໍລິການໃຫ້ຜູ້ປະກອບການ ແລະ ການບໍລິການການທ່ອງທ່ຽວ ຢ່າງກວ້າງຂວາງ ເປັນຕົ້ນ ສະຖານທີ່ພັກເຊົາ, ຮ້ານອາຫານ ແລະ ອື່ນໆ ໃນ 10 ແຂວງທົ່ວປະເທດ. ສຳຄັນແມ່ນໄດ້ມີການຊຸກຍູ້, ສົ່ງເສີມການໂຄສະນາປະຊາສຳພັນ ເພື່ອດຶງດູດນັກທ່ອງທ່ຽວ ທັງພາຍໃນ ແລະ ຕ່າງປະເທດ ໂດຍການຕິດຕັ້ງປ້າຍໂຄສະນາ; ການຜະລິດສິ່ງພິມເພື່ອໂຄສະນາ; ການຜະລິດເຄື່ອງທີ່ລະນຶກ ແລະ ການໂຄສະນາປະຊາສຳພັນ ຜ່ານທາງສື່ພາຍໃນ ແລະ ຕ່າງປະເທດ ດ້ວຍຫຼາຍຮູບການ.



ໂອກາດເຂົ້າຮ່ວມກອງປະຊຸມໃນຄັ້ງນີ້, ທ່ານ ສອນໄຊ ສີພັນດອນ ໄດ້ສະແດງຄວາມຍ້ອງຍໍ, ຊົມເຊີຍ ຕໍ່ກະຊວງຖະແຫຼງຂ່າວ, ວັດຖະນະທໍາ ແລະ ທ່ອງທ່ຽວ ໂດຍສະເພາະແມ່ນ ບັນດາອານຸກໍາມະການ ໃນການຈັດປີທ່ອງທ່ຽວລາວ ທັງຂັ້ນສູນກາງ ແລະ ທ້ອງຖິ່ນ ທີ່ສາມາດຍາດມາໄດ້ໃນໄລຍະທີ່ຜ່ານມາ, ເພື່ອເຮັດໃຫ້ວຽກງານດັ່ງກ່າວ ສືບຕໍ່ດຳເນີນໄປຢ່າງມີປະສິດທິຜົນ ແລະ ບັນລຸຕາມລະດັບຄາດໝາຍ ທີ່ວາງໄວ້ນັ້ນ. ໃນໂອກາດດຽວກັນ ທ່ານ ສອນໄຊ ສີພັນດອນ ກໍ່ໄດ້ເນັ້ນໜັກໃຫ້ຂະແໜງການທີ່ກ່ຽວຂ້ອງສືບຕໍ່ເອົາໃຈ ເປັນຕົ້ນ ສືບຕໍ່ຊຸກຍູ້ສົ່ງເສີມວຽກງານການທ່ອງທ່ຽວ ໃຫ້ມີການຂະຫຍາຍ ຕົວຢ່າງແຂງແຮງ; ປັບປຸງ ແລະ ສ້າງສິ່ງອໍານວຍຄວາມສະດວກໃຫ້ແກ່ນັກທ່ອງທ່ຽວ ໂດຍສະເພາະ ຂັ້ນຕອນໃນການເຂົ້າ-ອອກ, ຄ່າບໍລິການ ແລະ ຄ່າທໍານຽມຕ່າງໆ ໃຫ້ເໝາະສົມ. ພ້ອມນັ້ນ ກໍ່ໃຫ້ເອົາໃຈໃສ່ປັບປຸງ ແລະ ກໍ່ສ້າງພື້ນຖານໂຄງລ່າງທີ່ຈໍາເປັນຢູ່ສະຖານທີ່ທ່ອງທ່ຽວຕ່າງໆ ອັນໃດທີ່ຕ້ອງໃຫ້ລັດລົງທຶນ ອັນໃດທີ່ພາກເອກະຊົນຕ້ອງມີສ່ວນຮ່ວມ, ເພີ່ມທະວີວຽກງານໂຄສະນາປະຊາສຳພັນ ຜ່ານສື່ທັງພາຍໃນ ແລະ ຕ່າງປະເທດ ດ້ວຍຫຼາຍແບບ, ຫຼາຍສີສັນ ເພື່ອດຶງດູດນັກທ່ອງທ່ຽວ ໃຫ້ໄດ້ຕາມເປົ້າໝາຍຄື 5 ລ້ານເທື່ອຄົນຕໍ່ປີ. ສໍາຄັນແມ່ນ ​ຕ້ອງເອົາໃຈໃສ່ໃນວຽກງານຮັກສາຄວາມສະຫງົບປອດໄພ ແລະ ສ້າງຄວາມປະທັບໃຈໃຫ້ແກ່ນັກທ່ອງທ່ຽວ.

ແຫລ່ງ: ກົມ​ປະ​ຊາ​ສຳ​ພັນ, ພະ​ແນກ​ໂຄ​ສະ​ນາ 
© ໂຕະນໍ້າຊາ  | www.tonamcha.com | www.tonamchanews.com

_______


No comments

Powered by Blogger.