Header Ads

ແຂວງເຊກອງ ເກັບລາຍຮັບໄດ້ 250 ຕື້ກວ່າກີບ



ໃນໄລຍະຜ່ານມາ ຄະນະບໍລິງານຊາວໝຸ່ມຮາກຖານພະແນກການເງິນແຂວງເຊກອງໄດ້ດຳເນີນການຊີ້ນຳໆພາສະມາຊິກຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າ ໂດຍສະເພາະແມ່ນແຜນການຈັດເກັບລາຍຮັບເຂົ້າງົບປະມານ ແລະການຄຸ້ມຄອງລາຍຈ່າຍ ຊຶ່ງຜ່ານການເຄື່ອນໄຫວສາມາດເກັບລາຍຮັບໄດ້ 250 ຕື້ກວ່າກີບ ແລະປະຕິບັດໄດ້ 1,1 ພັນກວ່າຕື້ກີບ.


ວັນທີ 18 ກໍລະກົດ 2018 ຄະນະບໍລິງານຊາວໝຸ່ມ ປປ ລາວຮາກຖານພະແນກການເງິນແຂວງເຊກອງໄດ້ຈັດຕັ້ງກອງປະຊຸມໃຫຍ່ຄັ້ງທີ IV ຂອງຕົນຂຶ້ນ ໂດຍມີສະຫາຍ ນາງ ວຽງສະໄໝ ວົງວິຈິດ ຮອງເລຂາຄະນະບໍລິຫານງານຊາວໝຸ່ມແຂວງ, ສະຫາຍ ລຳທອງ ຍົນມະຫາໄຊ ຄະນະພັກຮາກຖານພະແນກການເງິນແຂວງ, ພ້ອມນີ້ ກໍມີຄະນະໜ່ວຍຊາວໝຸ່ມພະແນກ, ຫ້ອງການ ແລະສະມາຊິກພັກເຂົ້າຮ່ວມຢ່າງພ້ອມພຽງ.



ໃນກອງປະຊຸມສະຫາຍ ສຸກສາຄອນ ຈັນທະພານິດ ເລຂາຄະນະບໍລິງານຊາວໝຸ່ມຮາກຖານພະແນກການເງິນແຂວງ ໄດ້ນຳສະເໜີບົດລາຍງານການເມືອງທີ່ໄດ້ຢັ້ງຢືນເຖິງຜົນງານ ແລະການເຄື່ອນໄຫວຈັດຕັ້ງປະຕິບັດວຽກງານຕະຫຼອດໄລຍະຜ່ານມາ ໂດຍພາຍໃຕ້ການຊີ້ນຳໆພາຂອງຄະນະພັກ-ຄະນະພະແນກ ແລະຄະນະບໍລິຫານງານຊາວໝຸ່ມແຂວງ, ຄະນະບໍລິຫານງານຊາວໝຸ່ມພະແນກການເງິນ ຍາມໃດກໍໄດ້ເອົາໃຈໃສ່ສຶກສາອົບຮົມການເມືອງແນວຄິດໃຫ້ສະມາຊິກຢ່າງເປັນປົກກະຕິ ໂດຍຖືເອົາການດຳເນີນຊີວິດການເມືອງຂອງໜ່ວຍ ແລະຂະແໜງ ພາຍໃນ ເປັນບ່ອນຕຳນິກໍ່ສ້າງ, ຈັດຕັ້ງການຄົ້ນຄວ້າເຊື່ອມຊຶມມະຕິ, ຄຳສັ່ງຕ່າງຂອງພັກ, ກົດໝາຍຂອງລັດ ແລະລະບຽບການຕ່າງໆທີ່ສູນກາງຊາວໝຸ່ມ ປປ ລາວວາງອອກ, ອັນໄດ້ເຮັດໃຫ້ພະນັກງານ, ສະມາຊິກຊາວໝຸ່ມຮັບຮູ້ເຂົ້າໃຈຕໍ່ແນວທາງການເມືອງຂອງພັກ-ລັດ, ຫັນເປັນແຜນງານ-ໂຄງການ ແລະຈັດຕັ້ງປະຕິບັດໃຫ້ປະກົດຜົນເປັນຈິງ. 


ໃນໄລຍະຜ່ານມາ ຄະນະບໍລິງານຊາວໝຸ່ມຮາກຖານພະແນກການເງິນແຂວງເຊກອງໄດ້ດຳເນີນການຊີ້ນຳສະມາ ຊິກຈັດຕັ້ງປະຕິບັດວຽກງານວິຊາສະເພາະຢ່າງຕັ້ງໜ້າ ໂດຍສະເພາະແມ່ນແຜນການຈັດເກັບລາຍຮັບ ແລະຄຸ້ມຄອງລາຍຈ່າຍ ຊຶ່ງຜ່ານການເຄື່ອນໄຫວສາມາດເກັບລາຍຮັບໄດ້ 259,04 ຕື້ກີບ ໃນນີ້ຮັບຈາກສ່ວຍສາອາກອນ 220,27 ຕື້ກີບ ແລະລາຍຮັບຈາກຊັບສິນ 38,77 ຕື້ກີບ, ສ່ວນລາຍຈ່າຍປະຕິບັດໄດ້ 1.108,01 ຕື້ກີບ.

ຂະນະດຽວກັນ ກອງປະຊຸມຍັງໄດ້ຜ່ານມະຕິ, ທິດທາງແຜນການ ແລະຄາດໝາຍສູ້ຊົນໃນສະເພາະໜ້າ, ຈາກນັ້ນ ກໍໄດ້ດຳເນີນການປ່ອນບັດຄັດເລືອກເອົາຄະນະຊຸດໃໝ່ ໂດຍກອງປະຊຸມເຫັນດີເລືອກເອົາສະຫາຍ ໄກ່ອຳພອນ ພົມມະຈັນ ເປັນເລຂາ ເພື່ອເປັນໃຈກາງໃນການເຕົ້າໂຮມຄວາມສາມັກຄີ ແລະຊີ້ນຳໆພາວຽກງານຊາວໝຸ່ມພະແນກການເງິນແຂວງໃນຕໍ່ໜ້າ, ສະຫາຍ ໄພວັນ ສີວິໄລ ເປັນຮອງເລຂາ, ສະຫາຍ ຄຳປານ ພິມມະເສນ ເປັນຮອງເລຂາ, ທັງເປັນປະທານກວດກາ, ສ່ວນສະຫາຍ ສີໄຄ້ ລຽງສະຫວັດ, ສະຫາຍ ຄຳພູ ສຸດທະວິໄລ, ສະຫາຍ ພົງສະຫວັນ ບຸດດາວຽງ ແລະສະຫາຍ ນາງ ພຸດທະມະລີ ຈັນທອງສີ ເປັນຄະນະ.

ໂອກາດດັ່ງກ່າວ ສະຫາຍ ນາງ ວຽງສະໄໝ ວົງວິຈິດ ກໍໄດ້ຕີລາຄາສູງຕໍ່ການຊີ້ນຳໆພາ ແລະການເຄື່ອນໄຫວວຽກງານຂອງຄະນະຊາວໝຸ່ມຮາກຖານພະແນກການເງິນແຂວງໃນໄລຍະຜ່ານມາ ແລະຮຽກຮ້ອງໃຫ້ສືບຕໍ່ເສີມຂະຫຍາຍຜົນງານທີ່ພົ້ນເດັ່ນເຂົ້າໃນການຈັດຕັ້ງປະຕິບັດໜ້າທີ່ວຽກງານຂອງຕົນ, ເອົາໃຈໃສ່ແກ້ໄຂຈຸດອ່ອນ-ຂໍ້ຄົງຄ້າງ ແລະຕ້ານທຸກບັນຫາປະກົດການຫຍໍ້ທໍ້ບໍ່ໃຫ້ເກີດຢູ່ກົມກອງ, ພ້ອມນີ້ ສະຫາຍຍັງໄດ້ໃຫ້ທິດຊີ້ນຳຕໍ່ກອງປະຊຸມ, ທັງນີ້ ກໍເພື່ອໃຫ້ຄະນະບໍລິຫານງານຊຸດໃໝ່ ແລະສະມາຊິກນຳໄປຈັດຕັ້ງຜັນຂະຫຍາຍ ແນໃສ່ເຮັດສຳເລັດໜ້າທີ່ການເມືອງທີ່ຄະນະພັກ-ຄະນະພະແນກ ກໍຄືການຈັດຕັ້ງຂັ້ນເທິງມອບໝາຍໃຫ້.

ຂ່າວ-ພາບ: ສັນຍາ

© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.