Header Ads

ທ່ານເຈົ້າແຂວງຈຳປາສັກລົງຕິດຕາມສະພາບນໍ້າຖ້ວມຢູ່ເມຶອງຕ່າງໆ



ດ້ວຍຄວາມເປັນຫ່ວງເປັນໄຍຕໍ່ຊີວິດການເປັນຢູ່ຂອງປະຊາຊົນບັນດາເຜົ່າໂດຍສະເພາະປະຊາຊົນທີ່ອາໃສຢູ່ໃນເຂດນໍ້າຖ້ວມ, ໃນວັນທີ 29 ກໍລະກົດ 2018 ນີ້, ທ່ານ ດຣ ບຸນຖອງ ດີວິໄຊ ເຈົ້າແຂວງຈຳປາສັກ ແລະ ທ່ານ ພົນຈັດຕະວາ ສີພັນ ວົງເຮືອງຄຳ ຫົວໜ້າກອງບັນຊາການ ປ ກ ສ ແຂວງ ໄດ້ເດີນທາງດ້ວຍເຮືອໄວ ລົງເຄື່ອນໄຫວຕິດຕາມສະພາບນໍ້າຖ້ວມຢູ່ເມຶອງຕ່າງໆ ຂອງແຂວງຈໍາປາສັກ ທ່າມກາງການເດີນທາງທີ່ຫຍຸ້ງຍາກລໍາບາກມີຝົນຕົກຕະຫຼອດທາງ. 



ໃນໂອກາດທີ່ລົງໄປຕິດຕາມສະພາບນໍ້າຖ້ວມໃນຄັ້ງນີ້ຄະນະໄດ້ໄປສຳຫຼວດເບິ່ງສະພາບນໍ້າຂື້ນໃນຈຸດຫວຍຂະໝວນ,ຊຶ່ງ ທ່ານ ສົມສີ ມະນີນິນ ເຈົ້າເມຶອງສຸຂຸມາໄດ້ລາຍງານສະພາບການກະກຽມຮັບມືກັບສະພາບນໍ້າຖ້ວມ ເຊັ່ນ: ເມືອງສຸຂຸມາໄດ້ມີການແຕ່ງຕັ້ງຄະນະກຳມະການເຝົ້າລະວັງຢ່າງໄກ້ຊິດ ແລະ ແຈ້ງເຕືອນໃຫ້ປະຊາຊົນມີຄວາມກຽມພ້ອມມ້ຽນມັດເຄື່ອງຂອງ ແລະ ລຳລຽງສັດລ້ຽງໄປໄວ້ທີ່ສູງເພື່ອຫຼີກລ່ຽງຜົນເສຍຫາຍ. ພ້ອມນັ້ນ ທ່ານເຈົ້າແຂວງຍັງໄດ້ເນັ້ນໃຫ້ກະກຽມມີຄວາມພ້ອມຮອບດ້ານ ເມື່ອເກີດເຫດນຳ້ຖ້ວມກໍ່ຕ້ອງມີການເກັບກຳຂໍ້ມູນເພື່ອຂໍການຊ່ວຍເຫຼືອ ແລະ ທັງໃຫ້ເອົາໃຈໃສ່ລະມັດລະວັງໃນການບໍລິໂພກຂ່າວ,ຢ່າຫຼົງເຊື່ອກຸ່ມຄົນບໍ່ຫວັງດີທີ່ປ່ອຍຂ່າວລື ແລະ ຂ່າວອະກຸສົນ, ແລະ ຈົ່ງໄດ້ມີສະຕິຮັກສາຄວາມສະຫງົບຊ່ວຍກັນ. ນອກຈາກໄດ້ຕິດຕາມເບິ່ງສະພາບນໍ້າຖວ້ມຢູ່ເຂດເມຶອງສຸຂຸມາແລ້ວ ຄະນະດັ່ງກ່າວຍັງໄດ້ເຄື່ອນໄຫວຕິດຕາມເບິ່ງສະພາບນໍ້າຖ້ວມຢູ່ບ້ານຕ່າງໆຢູ່ເຂດເມຶອງຈຳປາສັກ ແລະ ເຂດເມຶອງປາກເຊ ເຊິ່ງຕະຫຼອດໄລຍະການເດີນທາງແມ່ນເຫັນໄດ້ສະພາບໄຮ່ນາຮົ້ວສວນ, ເຮືອນຊານບ້ານຊ່ອງຂອງປະຊາຊົນທີ່ຖືກນໍ້າແຕກແກ່ງໄຫຼເຂົ້າຖ້ວມ ເຊິ່ງໄດ້ສ້າງຄວາມເສຍຫາຍ ແລະຫຍຸ້ງຍາກຕໍ່ການດຳລົງຊີວິດຂອງປະຊາຊົນ. 



ດັ່ງນັ້ນ, ການລົງໄປຢ້ຽມຢາມຂອງທ່ານເຈົ້າແຂວງຈຳປາສັກ ແລະ ຄະນະໃນເທື່ອນີ້ ຈຶ່ງຍັງແມ່ນເພື່ອເປັນການຊຸກຍູ້ໃຫ້ກຳລັງໃຈແກ່ກຳລັງອ້າຍນ້ອງທີ່ພວມປະຕິບັດໜ້າທີ່ຢ່າງຕັ້ງຫນ້າໃນການເຝົ້າລະວັງຕິດຕາມສະພາບ ແລະ ຊ່ວຍເຫຼືອປະຊາຊົນຈາກເຫດໄພນໍ້າຖ້ວມອີກດ້ວຍ.

ຂ່າວ: ນາງ ພິລາວັນ ເພັງສະຫວັດ (ສວຈ )
© ໂຕະນໍ້າຊາ  | www.tonamcha.com | www.tonamchanews.com
_______


No comments

Powered by Blogger.