Header Ads

ທ່ານນາຍົກລັດຖະມົນຕີເຂົ້າຮ່ວມພິທີປ່ອຍປາ ທີ່ອ່າງນໍ້າຫຸມ ເມືອງນາຊາຍທອງ ນະຄອນຫຼວງວຽງຈັນ



​​ໃນຕອນເຊົ້າ ຂອງວັນທີ 13 ກໍລະກົດ 2018 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານລັດຖະມົນຕີກະຊວງກະສິກຳ ແລະ ປ່າໄມ້, ບັນດາທ່ານລັດຖະມົນຕີ, ປະທານສູນກາງສະຫະພັນກຳມະບານລາວ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນປະຕິວັດລາວ, ພະເຖລາ, ນຸເຖລະ ຕະຫຼອດຮອດ ພະນັກງານ, ທະຫານ, ຕຳຫຼວດ, ນັກຮຽນ, ເຍົາວະຊົນຈຳນວນຫຼວງຫຼາຍ ໄດ້ພ້ອມກັນເຂົ້າຮ່ວມພິທີປ່ອຍປ່າ ຢູ່ທີ່ອ່າງນໍ້າຫຸມ, ເມືອງນາຊາຍທອງ, ນະຄອນຫຼວງວຽງຈັນ





ໃນໂອກາດນີ້, ທ່ານລັດຖະມົນຕີກະຊວງກະສິກຳ ແລະ ປ່າໄມ້ ໄດ້ລາຍງານໃຫ້ຮູ້ວ່າ: “ມື້ນີ້ກະຊວງກະສິກຳ ແລະ ປ່າໄມ້ ຮ່ວມກັບອົງການປົກຄອງນະຄອນຫຼວງວຽງຈັນ ແລະ ສູນກາງຊາວໜຸ່ມປະຊາຊົນປະຕິວັດລາວ ໄດ້ພ້ອມກັນເປັນເຈົ້າພາບ ຈັດພິທີປ່ອຍສັດນໍ້າ-ສັດປ່າ ເນື່ອງໃນວັນອະນຸລັກສັດນໍ້າ-ສັດປ່າແຫ່ງຊາດ ວັນທີ 13 ກໍລະ ກົດ ທີ່ໄດ້ໝູນວຽນມາອີກຄັ້ງໜຶ່ງໃນປີ 2018 ນີ້. ການກຳນົດເອົາວັນທີ 13 ກໍລະກົດ ເປັນວັນອະນຸລັກສັດນໍ້າ-ສັດ ປ່າ ຂອງ ສປປ ລາວ ປະການທີໜຶ່ງ: ເປັນການຈົດຈຳບຸນຄຸນອັນລໍ້າລຶກ, ຄຸນງາມຄວາມດີ ແລະ ຜົນງານອັນໃຫຍ່ຫຼວງ ຂອງປະທານສຸພານຸວົງ ທີ່ໄດ້ອຸທິດຕົນ ໃຫ້ແກ່ພາລະກິດແຫ່ງການຕໍ່ສູ້ກູ້ຊາດ ກໍ່ຄື ການປົກປັກຮັກສາ ແລະ ສ້າງສາພັດທະນາປະເທດຊາດຂອງພວກເຮົາ ຊຶ່ງວັນດັ່ງກ່າວແມ່ນກົງກັບວັນຄ້າຍວັນເກີດຂອງເພິ່ນ; ປະການທີສອງ: ເປັນການປູກຈິດສຳນຶກໃຫ້ແກ່ລູກຫຼານຜູ້ເກີດໃໝ່ໃຫຍ່ລຸນ ໄດ້ມີສະຕິຮັກ, ຫວງແຫນ ແລະ ເຂົ້າຮ່ວມໃນການຄຸ້ມຄອງ, ປົກປັກຮັກສາ, ພັດທະນາ ແລະ ນຳໃຊ້ ສັດນໍ້າ-ສັດປ່າຢ່າງຖືກຕ້ອງ, ເໝາະສົມ ແລະ ເຮັດໃຫ້ປະຊາກອນສັດນັບມື້ອຸດົມສົມບູນ ແລະ ກາຍເປັນທ່າແຮງໃຫ້ແກ່ການພັດທະນາເສດຖະກິດ-ສັງຄົມ ໂດຍສະເພາະ ການຄ້ຳສະບຽງອາຫານ, ໂພສະນາການ, ຢາປົວພະຍາດ, ການຄົ້ນຄວ້າສຶກສາຮໍ່າຮຽນ, ການທ່ອງທ່ຽວ ເພື່ອປັບປຸງຊີວິດການເປັນຢູ່ຂອງປະຊາຊົນລາວບັນດາເຜົ່າ ໃຫ້ນັບມື້ດີຂຶ້ນເປັນກ້າວໆ; ປະການທີສາມ: ເປັນການສືບຕໍ່ເສີມຂະຫຍາຍ ຮີດຄອງປະເພນີອັນດີງາມ ໄລຍະເຂົ້າພັນສາເປັນຊ່ວງທີ່ສັດຂະຫຍາຍພັນ. ສະນັ້ນ, ກາ​ນຖືເອົາໂອກາດນີ້ ງົດການລ່າສັດ ແມ່ນເປັນການດີ.





​ສຳລັບການປ່ອຍປາຢູ່ອ່າງນໍ້າຫຸມໃນຄັ້ງນີ້, ມີລູກປາປະມານ 150.000 ໂຕ; ໂດຍປະກອບມີ: ປາປາກ, ປາ ເອີນ ແລະ ປາແກງ ພ້ອມດ້ວຍພໍ່ພັນ, ແມ່ພັນປາພື້ນເມືອງ ຈຳນວນ 500 ໂຕ. ນອກນັ້ນ, ຍັງມີການປ່ອຍນົກຈຳນວນໜຶ່ງ.​


ແຫລ່ງ: ຫ້ອງວ່າການສໍານັກງານນາຍົກລັດຖະມົນຕີ 
© ໂຕະນໍ້າຊາ  | www.tonamcha.com | www.tonamchanews.com

_______

No comments

Powered by Blogger.